ନବରଙ୍ଗପୁର: ଚାଉଳରେ ପୋକ ସାଲୁବାଲୁ । ହେଲେ ସେଥିରୁ ଭାତ ତିଆରି ହେବ । ଆଉ ତାକୁ ମଧ୍ୟାହ୍ନ ଭୋଜନରେ ଖାଇବେ ଛାତ୍ରଛାତ୍ରୀ । ଖାଇବେ ନୁହେଁ, ରୋଷେଇ କରି ଛାତ୍ରୀଛାତ୍ରଙ୍କୁ ପୋକରା ଚାଉଳ ଖାଇବାକୁ ଦିଆଯାଉଛି । ଏଭଳି ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲା ନନ୍ଦାହାଣ୍ଡି ବ୍ଲକ ଦଳେଇଗୁଡା ଗ୍ରାମରେ ଥିବା ପ୍ରାଥମିକ ବିଦ୍ୟାଳୟରେ ।
"ସଭିଏଁ ପଢନ୍ତୁ, ସଭିଏଁ ବଢନ୍ତୁ" ଏହି କାର୍ଯ୍ୟକମକୁ ସଫଳ କରିବା ପାଇଁ ସରକାର ବିଭିନ୍ନ ଯୋଜନା ମାଧ୍ୟମରେ କୋମଳମତି ପିଲାଙ୍କୁ ଶିକ୍ଷା ପ୍ରତି ଆଗ୍ରହ ସୃଷ୍ଟି କରିବା ପାଇଁ ସମସ୍ତ ସ୍କୁଲରେ ମଧ୍ୟାହ୍ନ ଭୋଜନର ବ୍ୟବସ୍ଥା କରିଛନ୍ତି । ହେଲେ ବିଦ୍ୟାଳୟରେ ବିଦ୍ୟାଳୟରେ ମଧ୍ୟାହ୍ନ ଭୋଜନର ଛାତ୍ରଛାତ୍ରୀଙ୍କୁ ପରସା ଯାଉଛି ପୋକରା ଚାଉଳର ଭାତ । ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ଅନ୍ତର୍ଗତ ଦଳେଇଗୁଡା ଗ୍ରାମରେ ଥିବା ପ୍ରାଥମିକ ବିଦ୍ୟାଳୟରେ ଏଭଳି ଦେଖା ଦେଇଛି । ଦୈନିକ ଆବଶ୍ୟକୀୟ ରାସନ ବାହାରୁ କିଣି ଆଣୁଥିବା ବେଳେ ପୋକ ଲାଗିଥିବା ପୋକରା ଚାଉଳ ରୋଷେଇ କରି ସ୍କୁଲ ପିଲାଙ୍କୁ ଦିଆଯାଉଥିବା ଦେଖିବାକୁ ମିଳିଛି । ଏହି ସମସ୍ୟାକୁ ନେଇ ସ୍କୁଲର ପ୍ରଧାନ ଶିକ୍ଷୟିତ୍ରୀଙ୍କୁ ପଚାରିବାରୁ ରୋଷେଇ ସମ୍ବନ୍ଧିତ ଦାୟିତ୍ୱ ସ୍ୱୟଂ ସହାୟକ ଗୋଷ୍ଠୀଙ୍କର ବୋଲି କହିଛନ୍ତି ।
ଅନ୍ୟପଟେ ଉକ୍ତ ସ୍କୁଲର ରୋଷେଇ ଦାୟିତ୍ୱ ନେଇଥିବା ଶ୍ରଦ୍ଧାଞ୍ଜଳି ସ୍ୱୟଂ ସହାୟକ ଗୋଷ୍ଠୀର ମହିଳାମାନଙ୍କୁ ପଚାରିଲେ ସେମାନଙ୍କୁ ଯେଉଁ ଚାଉଳ ଯୋଗେଇ ଦିଆଯାଉଛି ତାହା ସେମାନେ ରୋଷେଇ କରି ଦେଉଛନ୍ତି ବୋଲି କହିଛନ୍ତି । ନନ୍ଦାହାଣ୍ଡି ବ୍ଲକରେ ସ୍ଥାୟୀ ଗୋଷ୍ଠୀ ଶିକ୍ଷା ଅଧିକାରୀ ନଥିବା ବେଳେ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ କିମ୍ବା ବି.ଆର.ସି.ସି ସ୍କୁଲ ପରିଦର୍ଶନରେ ଯାଇ ଶିକ୍ଷାଦାନ ଏବଂ ମଧ୍ୟାହ୍ନ ଭୋଜନର ସୁପରିଚାଳନା ବିଷୟରେ ବୁଝି କୌଣସି ତ୍ରୁଟି ବିଚ୍ୟୁତି ଥିଲେ ରିପୋର୍ଟ ପ୍ରଦାନ କରିବା ନିୟମ ରହିଛି । କିନ୍ତୁ ସେମାନେ କାଗଜ କଲମରେ ବିଦ୍ୟାଳୟ ଗୁଡିକ ପରିଦର୍ଶନ କରୁଥିବା ନଜରକୁ ଆସୁଛି ।