ଭୁବନେଶ୍ବର:ସରିଲା ତୃତୀୟ ପର୍ଯ୍ୟାୟ ନିର୍ବାଚନ । କଡ଼ା ସୁରକ୍ଷା ଭିତରେ ରହିଛି ଇଭିଏମ୍ ମେସିନ । ଷ୍ଟ୍ରଙ୍ଗ ରୁମ ଚାରିପଟେ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା । ସେପଟେ ନିର୍ବାଚନ ପରବର୍ତ୍ତୀ ହିଂସା ଉପରେ ପୋଲିସ ନଜର । ଏନେଇ ଭୁବନେଶ୍ୱର ବ୍ଲକିଂ ଓ ଚେକିଂ ଜାରି ରହିବ ବୋଲି ସୂଚନା ଦେଇଛନ୍ତି ପୋଲିସ କମିସନର ସଞ୍ଜୀବ ପଣ୍ଡା ।
ପୋଲିସ କମିଶନର କହିଛନ୍ତି,"ଟ୍ବିନ ସିଟିରେ ଶାନ୍ତି ଶୃଙ୍ଖଳାର ସହ ଶେଷ ହୋଇଛି ନିର୍ବାଚନ । ନାଗରିକମାନେ ଖରାରେ ଆସି ବହୁ ସଂଖ୍ୟାରେ ଭୋଟ ଦେଇଛନ୍ତି । ଆମର ଭଲ ବ୍ୟବସ୍ଥା ଉପରେ ଲୋକଙ୍କ ଭରସା ରହିଛି । ଧନ୍ୟବାଦ ଦେବି ଆମ ପୋଲିସ କର୍ମଚାରୀଙ୍କୁ ବହୁତ ପରିଶ୍ରମ କରି ଶାନ୍ତି ଶୃଙ୍ଖଳା ବଜାୟ ରଖିଛନ୍ତି । ଲୋକଙ୍କୁ ମଧ୍ୟ ଧନ୍ୟବାଦ ଦେଇ ଭଲ ସହଯୋଗ କରିଛନ୍ତି । ଖରା ଓ ଇଭିଏମ ତ୍ରୁଟି ସତ୍ତ୍ବେ ଖରାରେ ଧର୍ଯ୍ୟ ଧରି ପୋଲିସ ସହିତ ସହଯୋଗ ରହିଛନ୍ତି । ଯେଉଁଥି ପାଇଁ ନିର୍ବାଚନ ଶାନ୍ତି ଶୃଙ୍ଖଳାର ସହ ଚଳିତ ନିର୍ବାଚନ ସରିଛି ଭୁବନେଶ୍ବର ୫ଟି ବିଧାନସଭା କ୍ଷେତ୍ରର ଇଭିଏମ ବିଜେବି କଲେଜ ଷ୍ଟ୍ରଙ୍ଗ ରୁମରେ ରଖି ସିଲ୍ କରାଯାଇଛି ।"
ସେ ଆହୁରି ମଧ୍ୟ କହିଛନ୍ତି ଯେ, ଷ୍ଟ୍ରଙ୍ଗ ରୁମକୁ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଯୋଗାଇ ଦିଆଯାଇଛି । ବିଲଡିଂ ଭିତରେ ସିଏପିଏଫର ସୁରକ୍ଷା କର୍ମଚାରୀ । ବିଲଡିଂ ବାହାରେ ଷ୍ଟେଟ୍ ଆର୍ମଡ ପୋଲିସ ଗୋଟିଏ ପ୍ଲାଟୁନ ମଧ୍ୟ ଜଗି ରହିଛନ୍ତି । ଆଉ ଚାରି ପାଖରେ ୪ ପ୍ଲାଟୁନ କମିଶନରେଟ ପୋଲିସ ମଧ୍ୟ ଡ୍ୟୁଟିରେ ଅଛନ୍ତି । ଚାରି ପଟେ ସିସିଟିଭି ରହିଛି ଯାହାକୁ କଣ୍ଟ୍ରୋଲ ରୁମ୍ ମନିଟର କରାଯାଉଛି ।