ରୋଜଗାର ଦେଇଛି ଷ୍ଟ୍ରବେରୀ, ୟୁଟ୍ୟୁବରୁ ଶିଖି ସଫଳ ଚାଷୀ ପାଲଟିଛନ୍ତି ସୁରେନ୍ଦ୍ର

ଯାଜପୁରର ସଫଳ ଚାଷୀ ସୁରେନ୍ଦ୍ର ସାହୁ । ଫଳ ଫୁଲ ସାଙ୍ଗକୁ ପନିପରିବା ଚାଷ କରି ବର୍ଷକୁ ରୋଜଗାର କରୁଛନ୍ତି ଲକ୍ଷ ଲକ୍ଷ ଟଙ୍କା । ଯାଜପୁରରୁ ଜ୍ଞାନରଞ୍ଜନ ଓଝାଙ୍କ ରିପୋର୍ଟ ।

ଯାଜପୁର: କ୍ଷେତରେ ହସୁଛି ରଙ୍ଗ ବେରଙ୍ଗର ଫୁଲ, ଫଳ ଓ ପନିପରିବା ଚାଷ । ଗୋଟିଏ କ୍ଷେତରେ ଷ୍ଟ୍ରେବେରୀ, ଆଉ ଗୋଟିଏରେ ଭଳିକି ଭଳି ଫୁଲ ଓ ଅନ୍ୟ ଫଳ ଚାଷ । ସତେ ଯେମିତି ଦେଖା ଯାଉଛି ଲାଲ ଟୁକୁ ଟୁକୁ ସାଧବ ବୋହୁର ମଖ ମଲି ଗାଲିଚା ବିଛେଇ ହୋଇଛି ଜମି ଉପରେ । ଯିଏ ଦେଖୁଛି ତା ମନ ଏହି ଫଳ ଫୁଲ ଉପରେ ରହିଯାଉଛି । ଏକର ଏକର ଜମିରେ ଚାଷ ହୋଇଛି ଲାଲ ଷ୍ଟ୍ରବେରୀ । ଏହାକୁ ଚାଷ କରି ନିଜେ ରୋଜଗାର କ୍ଷମ ହେବା ସହ ଅନ୍ୟକୁ ରୋଜଗାର ଦେଇଛନ୍ତି ଯାଜପୁର ଜିଲ୍ଲାର ସଫଳ ଚାଷୀ ସୁରେନ୍ଦ୍ର ସାହୁ ।

ୟୁଟ୍ୟୁବରୁ ଦେଖି ଷ୍ଟ୍ରବେରୀ ଚାଷ କରିଛନ୍ତି ସୁରେନ୍ଦ୍ର:

ୟୁଟ୍ୟୁବ ଦେଖି ଷ୍ଟ୍ରବେରୀ ଚାଷ (ETV BHARAT ODISHA)

ମଧୁବନ ଗାଁର ସୁରେନ୍ଦ୍ର ସାହୁ । ଆଲିହା ଗାଁରେ 3 ଏକରରୁ ଊର୍ଦ୍ଧ୍ବ ଚାଷ ଜମିରେ ସେ ଷ୍ଟ୍ରବେରୀ ସାଙ୍ଗକୁ ବିଭିନ୍ନ ଫଳ ଓ ଫୁଲ ଚାଷ କରି ଜିଲ୍ଲା ଯଥା ରାଜ୍ୟରେ ବେଶ ନାଁ କରିଛନ୍ତି । ପ୍ରଥମେ ଆମ୍ବ, ସପେଟା, କଦଳୀ, ଅମୃତ ଭଣ୍ଡା, ଗାଈ, କୁକୁଡ଼ା ଓ ମାଛ ଚାଷ କରୁଥିଲେ । ସେଥିରୁ ସଫଳ ହେଲା ପରେ ଦାନଗଦି ବ୍ଲକ ଉଦ୍ୟାନ କୃଷି ବିଭାଗର ସହାୟତା ଫଳରେ ଷ୍ଟ୍ରବେରୀ ଚାଷକୁ ଆପଣେଇ ନେଇଛନ୍ତି । କୃଷି ଉଦ୍ୟାନରୁ ଚାରା ମିଳିବା ପରେ ସେ ଷ୍ଟ୍ରବେରୀ ଚାଷ ଆରମ୍ଭ କରିଥିଲେ । ୟୁଟ୍ୟୁବରେ ଚାଷର ପ୍ରଣାଳୀ ଦେଖି ଚାଷ କରିବା ପରେ ଏବେ ସୁରେନ୍ଦ୍ରଙ୍କ ଜମିରୁ ପ୍ରତିଦିନ 15ରୁ 16 କେଜି ଷ୍ଟ୍ରବେରୀ ଫଳୁଥିବା ଦେଖିବାକୁ ମିଳୁଛି । କେଜି 3ଶହ ଟଙ୍କାରେ ସେ ଏହାକୁ ବିକ୍ରି କରୁଛନ୍ତି । ଷ୍ଟ୍ରବେରୀ ଓ କ୍ଵାସ ଫଳ ଚାଷରୁ ଦିନକୁ 5 ହଜାରରୁ 10 ହଜାର ଟଙ୍କା ରୋଜଗାର କରିପାରୁଛନ୍ତି । ଚାଷକୁ ପେଶା କରି ବାର୍ଷିକ 10 ଲକ୍ଷରୁ ଊର୍ଦ୍ଧ୍ବ ଟଙ୍କା ରୋଜଗାର କରୁଛନ୍ତି ସୁରେନ୍ଦ୍ର ।

ଜମିରେ ଷ୍ଟ୍ରବେରୀ ଚାଷ (ETV BHARAT ODISHA)

ଏହା ମଧ୍ୟ ପଢନ୍ତୁଦାଦନ ଗଡର ସଫଳ ଚାଷୀ ମନ୍ମୟ, ଅନ୍ୟ ପାଇଁ ସାଜିଛନ୍ତି ପ୍ରେରଣା ଏହା ମଧ୍ୟ ପଢନ୍ତୁଜୈବିକ ପଦ୍ଧତିରେ ଚାଷ କରି ଚର୍ଚ୍ଚାରେ ବିନୟ, ସମାଜକୁ ସୁସ୍ଥ ରଖିବାକୁ ଲକ୍ଷ୍ୟ

ଚାଷ ପାଇଁ ସମ୍ମାନିତ:

ଚାଷ ପାଇଁ ସୁରେନ୍ଦ୍ର ସମ୍ମାନିତ ହୋଇଛନ୍ତି (ETV BHARAT ODISHA)

ଖାଲି ଏତିକି ନୁହେଁ ସୁରେନ୍ଦ୍ର 3 ଏକରରୁ ଊର୍ଦ୍ଧ୍ବ ଚାଷ ଜମି ଲିଜ ଆକାରରେ ନେଇ ଏବେ କ୍ଵାସ, କାଶ୍ମିରୀ ବେରୀ ଓ ପିଜୁଳି ଆଦି ଫଳ ଚାଷ କରିଛନ୍ତି । ଚାଷ ପାଇଁ ଏବେ ସୁରେନ୍ଦ୍ର ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କ ପକ୍ଷରୁ ଅନେକ ବାର ସଫଳ ଚାଷୀ ହିସାବରେ ପୁରସ୍କୃତ ହେଉଛନ୍ତି । ଏହି ପୁରସ୍କାର ତାଙ୍କୁ ଆହୁରି ଚାଷ ପ୍ରତି ଆକୃଷ୍ଟ କରୁଥୁବା ସୁରେନ୍ଦ୍ର କହିଛନ୍ତି । ସେପଟେ ସୁରେନ୍ଦ୍ରଙ୍କ ପାଇଁ ରୋଜଗାର ପାଇବା ସହିତ ଫଳ ବଗିଚାରେ କାମ କରି ଖୁସିବ୍ୟକ୍ତ କରିଛନ୍ତି କର୍ମଚାରୀ ।

ୟୁଟ୍ୟୁବରୁ ଶିଖି ସଫଳ ଚାଷୀ ପାଲଟିଛନ୍ତି ସୁରେନ୍ଦ୍ର (ETV BHARAT ODISHA)

3 ଏକରରୁ ଉର୍ଦ୍ଧ୍ବ ଚାଷ ଜମିରେ ଫଳ, ଫୁଲ ଓ ପନିପରିବା ଚାଷ:

ସୁରେନ୍ଦ୍ର କୃଷି ବିଭାଗରେ ଏକ ଠିକା କର୍ମଚାରୀ ଭାବେ କାର୍ଯ୍ୟ କରନ୍ତି । କିନ୍ତୁ ସବୁବେଳେ ତାଙ୍କର କୃଷି ପ୍ରତି ଅଧିକ ରୁଚି ଥିଲା । ପ୍ରଥମେ ନିଜ ବାଡ଼ିରେ ଗେଣ୍ଡୁଫୁଲ ଚାଷ ଆରମ୍ଭ କରିଥିଲେ । ସେଥିରେ ଆଶାତୀତ ସଫଳତା ପାଇଲେ । ମନ ବଳ ବୃଦ୍ଧି ପାଇବାରୁ କୋରେଇ ବ୍ଲକ ଧନେଶ୍ୱର ପଂଚାୟତ ଆଲିହା ଗାଁରେ ଜଣେ ବ୍ୟକ୍ତିଙ୍କ ଠାରୁ 3 ଏକରରୁ ଊର୍ଦ୍ଧ୍ବ ଚାଷ ଜମି ଲିଜ ଆକାରରେ ନେଇ ଏକ ପୋଖରୀ ଖୋଳି ମାଛଚାଷ କରିବା ସାଙ୍ଗକୁ ଆରମ୍ଭ କଲେ କାଶ୍ମିରୀ ବେରୀ, ଅମୃତଭଣ୍ଡା ସାଙ୍ଗକୁ ବିଭିନ୍ନ ପନିପରିବା ଓ ଗେଣ୍ଡୁ,ରଜନୀଗନ୍ଧା, ଗୋଲାପ ଫୁଲ ଚାଷ । ସୁରେନ୍ଦ୍ରଙ୍କର ଇଚ୍ଛା ଥିଲା ସବୁବେଳେ କିଛି ନୂଆ ନୂଆ ଫଳ ଚାଷ କରିବା ପାଇଁ ଏଥି ପାଇଁ ସେ ଉଦ୍ୟାନ ବିଭାଗର ସହାୟତାରେ ଅକ୍ଳାନ୍ତ ପରିଶ୍ରମ ଓ ନିଜର ଉଦ୍ୟମ ଫଳରେ ଆରମ୍ଭ କଲେ ଷ୍ଟ୍ରବେରୀ ସାଙ୍ଗକୁ କ୍ଵାସ ଫଳ ଚାଷ ।

ଫୁଲ ଚାଷ କରିଛନ୍ତି ସୁରେନ୍ଦ୍ର (ETV BHARAT ODISHA)

ଅନ୍ୟଙ୍କୁ ଦେଇଛନ୍ତି ରୋଜଗାର:

ଚାଷ କରି କେବଳ ନିଜେ ସ୍ୱାବଲମ୍ବୀ ହୋଇଛନ୍ତି ତା ନୁହେଁ ସେ ନିଜ ଅଞ୍ଚଳର 10ଜଣ ବ୍ୟକ୍ତିଙ୍କୁ ମଧ୍ୟ ଏଥିରେ ନିୟୋଜିତ କରି ରୋଜଗାରକ୍ଷମ କରାଇ ପାରିଛନ୍ତି । ସେପଟେ ସୁରେନ୍ଦ୍ରଙ୍କୁ ଏହି ଚାଷ କାର୍ଯ୍ୟରେ ସହଯୋଗ କରିବା ସହିତ ଏଭଳି ଚାଷ କାର୍ଯ୍ୟକୁ ବେଶ ପ୍ରଶଂସା କରିଛନ୍ତି ତାଙ୍କ ସମ୍ପର୍କୀୟ । ପ୍ରଥମେ ଏଭଳି ଟାଙ୍ଗରା ଜମିରେ ଷ୍ଟ୍ରବେରୀ ଚାଷ ହେବ ବୋଲି ବିଶ୍ୱାସ କରୁନଥିଲେ ସ୍ଥାନୀୟ ବାସିନ୍ଦା । ତେବେ ପରବର୍ତ୍ତୀ ସମୟରେ ଭଳିକି ଭଳି ଫଳ ଚାଷ ସାଙ୍ଗକୁ ଷ୍ଟ୍ରବେରୀ ଚାଷକୁ ଦେଖି ବେଶ ଆତ୍ମବିଭୋର ହେଇଛନ୍ତି ସ୍ଥାନୀୟ ବାସିନ୍ଦା । ଧୀରେ ଧୀରେ ଷ୍ଟ୍ରବେରୀ ଚାଷ ଯାଜପୁର ଜିଲ୍ଲାର ଅନେକ ବ୍ଲକରେ ଚାଷ ହେଉଥିବା ଦେଖିବାକୁ ମିଳୁଛି । ଏହି ଚାଷ କରି ଅନେକ ଚାଷୀ ଭଲ ଦୁଇ ପଇସା ରୋଜଗାର କରିବାରେ ସଫଳ ହେଉଛନ୍ତି ।

ରଙ୍ଗ ବେରଙ୍ଗର ଫୁଲ ଚାଷ (ETV BHARAT ODISHA)

ଏନେଇ ଚାଷୀ ସୁରେନ୍ଦ୍ର କହିଛନ୍ତି, '' ଚଳିତ ବର୍ଷ ଉଦ୍ୟାନ ବିଭାଗ ତରଫରୁ ଷ୍ଟ୍ରବେରୀ ଚାରା ମିଲିଥିଲା ଚାଷ କରିବା ପାଇଁ । ୟୁଟ୍ୟୁବରୁ ଦେଖି ଏହିଚାଷ କରିଥିଲି । ମରଚିଙ୍ଗ ଓ ଡ୍ରିପ କରିକି ଚାଷ କଲି । ଏହାକୁ ବିକ୍ରି କରିବାରେ କୌଣସି ଅସୁବିଧା ନାହିଁ । କ୍ବାସ ଫଳ ମଧ୍ୟ ଚାଷ କରୁଛି । ଆମ୍ବ, ପିଜୁଳି, ସପେଟା, ଅମୃତଭଣ୍ଡା ବିଭିନ୍ନ ପ୍ରକାର ଫୁଲ ଚାଷ ମଧ୍ୟ ହେଉଛି । ''

ସୁରେନ୍ଦ୍ରଙ୍କ ଶାଶୁ ଲୋଚନୀ ସାହୁ କହିଛନ୍ତି, ''କୋରୋନା ପରେ ପରେ ଚାଷ ଆରମ୍ଭ ହୋଇଥିଲା । ଭଳ ରୋଜଗାର ମଧ୍ୟ ହେଉଛି । ଆମ ଜ୍ବାଇଁ ଯୋଗୁ ଚାଷ କରୁଛୁ । ଆମ୍ବ, ପିଜୁଳି ଓ କଦଳୀ ଚାଷ ମଧ୍ୟ ହେଉଛି । ମାଛ ଚାଷ ମଧ୍ୟ ପୋଖରିରେ ହେଉଛି । ବିନା ଶାରରେ ଚାଷ ହେଉଛି ।''

ଇଟିଭି ଭାରତ, ଯାଜପୁର