କଟକ: ଆମେ ସମସ୍ତେ ପ୍ରାୟ ଗ୍ୟାସ ସିଲିଣ୍ଡର ବ୍ୟବହାର କରୁଛେ । ଅନେକ ସମୟରେ ଗ୍ୟାସ ସିଲିଣ୍ଡର ଫାଟି ଅନେକ ଅଘଟଣ ମଧ୍ୟ ଘଟାଇଥାଏ । ଏପରିକି ସିଲିଣ୍ଡର ବିସ୍ଫୋରଣରେ ଅନେକ ଲୋକ ମୃତାହତ ହୋଇଥାଆନ୍ତି ଏବଂ ଆହତ ମଧ୍ୟ ହୋଇଥାଆନ୍ତି । ମାତ୍ର ଜାଣିଛନ୍ତି କି ଏହି ସିଲିଣ୍ଡର ବିସ୍ଫୋରଣରେ ଯଦି କିଛି ଅଘଟଣ ଘଟେ ଆପଣଙ୍କୁ ଉପଯୁକ୍ତ କ୍ଷତିପୂରଣ ମିଳିବ । ଆଜ୍ଞା ହଁ ଆପଣ ଠିକ ପଢୁଛନ୍ତି । ଗ୍ୟାସ ବିସ୍ଫୋରଣରେ ଯଦି ଅଘଟଣ ଘଟେ ତେବେ ମୃତକଙ୍କ ୬ ଲକ୍ଷ ଟଙ୍କା କ୍ଷତିପୂରଣ ମିଳିବ ଏବଂ ଆହାତଙ୍କୁ ୨ ଲକ୍ଷ ଟଙ୍କାର କ୍ଷତିପୂରଣ ମିଳିବ । କେବଳ ସେତିକି ନୁହେଁ ବରଂ ଏହି ଅଘଟଣରେ ଆପଣଙ୍କ ସମ୍ପତ୍ତି ନଷ୍ଟ ହେଲେ ଆପଣଙ୍କୁ ମଧ୍ୟ ୨ ଲକ୍ଷ ଟଙ୍କାର କ୍ଷତିପୂରଣ ମଧ୍ୟ ମିଳିବ । ଏହି ମାମଲାରେ ଓଡିଶା ହାଇକୋର୍ଟ ନିକଟରେ ଗୁରୁତ୍ତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି । ଏହି କ୍ଷତିପୂରଣ ସମ୍ପର୍କିତ ତଥ୍ୟ ସିଲିଣ୍ଡର ରସିଦ ପଛ ପଟରେ ଲେଖିବା ପାଇଁ ଓଡିଶା ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।
Gas Cylinder Blast (ETV Bharat Odisha) ଏହା ବି ପଢନ୍ତୁ- ହାଇକୋର୍ଟଙ୍କ ଛାଟରେ ସମାଧନ ହେଉଛି ସହରର ସମସ୍ୟା, ଏଣିକି ଠକିଲେ ହେବ କଡ଼ା କାର୍ଯ୍ୟାନୁଷ୍ଠାନ - Orissa High Court ରସିଦ ପଛରେ ତଥ୍ୟ ଛପାଯିବ-
"ଗ୍ୟାସ ସିଲିଣ୍ଡର ଦୁର୍ଘଟଣା କ୍ଷେତ୍ରରେ ବୀମା କ୍ଷତିପୂରଣ ବ୍ୟବସ୍ଥା ସଂକ୍ରାନ୍ତରେ ଏଣିକି ରସିଦ ପଛରେ ତଥ୍ୟ ଛପାଯିବ ବୋଲି ହାଇକୋର୍ଟ କଡା ନିର୍ଦ୍ଦେଶ ଦେଇଛନ୍ତି । ଗ୍ୟାସ୍ ସିଲିଣ୍ଡର ଦୁର୍ଘଟଣାରେ ମୃତ ଓ ଆହତ ପୀଡ଼ିତଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ ପାଇଁ ବ୍ୟବସ୍ଥା ରହିଛି । ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ୍ ମନ୍ତ୍ରଣାଳୟ ଅନୁସାରେ ଏପରି ଦୁର୍ଘଟଣାରେ ମୃତକଙ୍କ ପରିବାରକୁ ୬ ଲକ୍ଷ ଟଙ୍କା ଓ ଆହତ ବ୍ୟକ୍ତିଙ୍କୁ ୨ ଲକ୍ଷ ଟଙ୍କା କ୍ଷତିପୂରଣ ପାଇପାରିବେ । ସେହିଭଳି ଭାବେ ସଂପତ୍ତି ନଷ୍ଟ ପାଇଁ ପ୍ରତି ଘଟଣାରେ ପଞ୍ଜୀକୃତ ଗ୍ୟାସ ସିଲିଣ୍ଡର ଗ୍ରାହକକୁ ୨ ଲକ୍ଷ ଟଙ୍କା କ୍ଷତିପୂରଣ ମିଳିବ । କିନ୍ତୁ ଗ୍ୟାସ ଲିକ ଦୁର୍ଘଟଣାର ପୀଡ଼ିତ, ଏଭଳି କ୍ଷତିପୂରଣ ବ୍ୟବସ୍ଥା ସଂକ୍ରାନ୍ତରେ ଅବଗତ ନୁହଁନ୍ତି । ଏପରି ଯୋଜନାରେ ଗ୍ୟାସ କମ୍ପାନୀ ପୀଡ଼ିତଙ୍କୁ କ୍ଷତିପୂରଣ ପ୍ରଦାନ କରିବ ବୋଲି ଅନେକ ଜାଣି ନାହାଁନ୍ତି । ଏଭଳି ବୀମା ଅନ୍ତର୍ଭୁକ୍ତ ପ୍ରସଂଗରେ ଅଜ୍ଞତା ବହୁ ସମୟରେ ଏପରି ଦୁର୍ଘଟଣାର ପୀଡ଼ିତ ଓ ସେମାନଙ୍କ ପରିବାରକୁ କ୍ଷତିପୂରଣ ପାଇବାର ସୁବିଧାରୁ ବଞ୍ଚିତ କରିଥାଏ । ଏଭଳି ସ୍ଥିତିରେ ବୀମା ଅନ୍ତର୍ଭୁକ୍ତ ସଂପର୍କିତ ସୂଚନା ଗଣମାଧ୍ୟମ ମାଧ୍ୟମରେ ଉପଯୁକ୍ତ ଭାବେ ପ୍ରଚାର ପ୍ରସାର ପ୍ରସଂଗ ମନ୍ତ୍ରଣାଳୟ ସୁନିଶ୍ଚିତ କରିବ," ବୋଲି ହାଇକୋର୍ଟ କହିଛନ୍ତି।
Gas Cylinder Blast (ETV Bharat Odisha)
ଏହା ବି ପଢନ୍ତୁ- High Court Bench: ପଶ୍ଚିମ ଓଡ଼ିଶାରେ ହାଇକୋର୍ଟ ବେଞ୍ଚ ନେଇ ମୁଖ୍ୟମନ୍ତ୍ରୀଙ୍କ ସ୍ପଷ୍ଟୀକରଣ 'ପ୍ରସ୍ତାବ ବିଚାରାଧୀନ' - CM On High Court Bench
ଏଥି ସହିତ ଗ୍ୟାସ ସିଲିଣ୍ଡର ଗ୍ରାହକଙ୍କୁ ପ୍ରଦାନ କରାଯାଉଥିବା ମନି ରିସିପ୍ଟ ପଛ ପାଖରେ ଏଭଳି ବୀମା କ୍ଷତିପୂରଣ ସଂପର୍କିତ ତଥ୍ୟ ଛପା ଯାଇ ପାରିବ ବୋଲି ହାଇକୋର୍ଟ କହିଛନ୍ତି । ଏଲପିଜି ସିଲିଣ୍ଡର ପରିଚାଳନା ଓ ସିଲିଣ୍ଡର ବିସ୍ଫୋରଣ ଘଟଣାରେ ବୀମା ଅନ୍ତର୍ଭୁକ୍ତ ପ୍ରସଂଗରେ ସଚେତନତା ସୃଷ୍ଟି ପାଇଁ ପଦକ୍ଷେପ ନେବାକୁ ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ସଚିବ ପଦକ୍ଷେପ ନେବେ ବୋଲି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ଏଥିପାଇଁ ତୈଳ ମାର୍କେଟିଂ କମ୍ପାନୀଗୁଡ଼ିକ ପାଇଁ ଦୃଢ ବିଜ୍ଞାପନ ନୀତି ପ୍ରଣୟନ କରିବାକୁ ହାଇକୋର୍ଟ କହିଛନ୍ତି । ଏଥି ସହିତ ଗ୍ୟାସ୍ ସିଲିଣ୍ଡର ବିସ୍ଫୋରଣ ଦୁର୍ଘଟଣାରେ ଆହତ ହୋଇଥିବା ଆବେଦନକାରୀଙ୍କୁ ୨ ମାସ ଭିତରେ ୨ ଲକ୍ଷ ଟଙ୍କା ଅନୁକମ୍ପାମୂଳକ ସହାୟତା ରାଶି ପ୍ରଦାନ ପାଇଁ ବୀମା କମ୍ପାନିକୁ ନିର୍ଦ୍ଦେଶ ଦିଆଯାଇଛି ।
High Court on Gas cylinder Blast (ETV Bharat Odisha)
ହାଇକୋର୍ଟ ନିଜର ରାୟରେ ସ୍ପଷ୍ଟ କରିଛନ୍ତି, "ଏଲପିଜି କମ୍ପାନି ଗୁଡ଼ିକ ସିଲିଣ୍ଡର ଓ ଏ ସଂପର୍କିତ ଉପକରଣ ଯୋଗାଣ ଉପରେ ଗୁରୁତ୍ବ ଦେଉଥିବା ବେଳେ ସୁରକ୍ଷା ସଂପର୍କିତ ତାଲିମ ଓ ବୀମା ଅନ୍ତର୍ଭୁକ୍ତ ପ୍ରସଂଗରେ ବହୁତ କମ୍ ଆଲୋଚନା କରୁଛନ୍ତି । ଏଲପିଜି ସିଲିଣ୍ଡର ବିସ୍ଫୋରଣ କ୍ଷେତ୍ରରେ ବୀମା ରାଶି ମିଳିବା ପ୍ରସଂଗରେ ଅନେକ ଗ୍ରାହକଙ୍କ ଜ୍ଞାନ ନାହିଁ । ଏଥି ସହିତ ସିଲିଣ୍ଡର ବିସ୍ଫୋରଣ କ୍ଷେତ୍ରରେ ତୁରନ୍ତ କଣ ଜବାବୀ ବ୍ୟବସ୍ଥା ଗ୍ରହଣ କରାଯିବ ସେ ନେଇ ମଧ୍ୟ ଏଲପିଜି ଯୋଗାଣ କରୁଥିବା କମ୍ପାନି ଗୁଡ଼ିକର ଚିନ୍ତା ନାହିଁ । ଗ୍ୟାସ ସିଲିଣ୍ଡର ଘରେ ନେଇ ଦେଉଥିବା କର୍ମଚାରୀଙ୍କ ମଧ୍ୟ କେମିତି ସିଲିଣ୍ଡର ସୁରକ୍ଷିତ ଭାବେ ହ୍ୟାଣ୍ଡେଲ କରାଯିବ, ଖରାପ ସିଲିଣ୍ଡର ଓ ଗ୍ୟାସ୍ ଲିକ କ୍ଷେତ୍ରରେ କଣ କରାଯିବ ସେ ନେଇ କମ୍ ଜ୍ଞାନ ରହିଛି । ସୁରକ୍ଷା ଓ ସ୍ବାସ୍ଥ୍ୟ ସୁନିଶ୍ଚିତ କରିବା ପାଇଁ ସିଲିଣ୍ଡର ଓ ଗ୍ୟାସ ବଟଲ ଭଳି ବିପଦଜନକ ଜିନିଷ ନେଇ ଯାଉଥିବା କର୍ମଚାରୀଙ୍କ ତାଲିମ ଆବଶ୍ୟକ ।"
ଏହା ବି ପଢନ୍ତୁ- ଗ୍ୟାସ ଚୁଲା ତଳେ ଶୋଇଛନ୍ତି ୩ଟି ନାଗ ସାପ - Rescue of Cobra with Baby Cobra
ସହରାଞ୍ଚଳ ଓ ଉପକଣ୍ଠ ଅଞ୍ଚଳରେ ସାଇକେଲ ବା ମୋଟରସାଇକେଲରେ ଚାରିରୁ ପାଞ୍ଚଟି ସିଲିଣ୍ଡର ନେଇ ଏଲିପିଜି ଡିଲରଙ୍କ କର୍ମଚାରୀ ଯାଉଥିବା ଦେଖିବାକୁ ମିଳୁଛି । ଏପରି ଗ୍ୟାସ ସିଲିଣ୍ଡର ପରିବହନରେ ବିପଦ ରହିଛି । ଗ୍ୟାସ ଲିକର ସମ୍ଭାବନା ରହିଛି । ସୁରକ୍ଷା ପ୍ରସଂଗରେ ଓ ପରିସ୍ଥିତିର ମୁକାବିଲା ପାଇଁ ଗ୍ୟାସ ସିଲିଣ୍ଡର ନେଇ ଯାଉଥିବା କର୍ମଚାରୀ ଓ ଗ୍ରାହକଙ୍କୁ ତାଲିମ ଦିଆଯିବା ଉପରେ ହାଇକୋର୍ଟ ଗୁରୁତ୍ବାରୋପ କରିଛନ୍ତି । ଏଲପିଜି ସିଲିଣ୍ଡର ବସ୍ଫୋରଣ ଘଟଣାରେ ମୃତାହତ ହେଉଥିବା ପୀଡ଼ିତଙ୍କ ପାଇଁ ବୀମା କ୍ଷତିପୂରଣ ବ୍ୟବସ୍ଥା ଓ ଗ୍ରାହକଙ୍କୁ ସିଲିଣ୍ଡର ପହଞ୍ଚାଉଥିବା କର୍ମଚାରୀଙ୍କ ସୁରକ୍ଷା ତାଲିମ ପ୍ରସଂଗରେ ଉପଯୁକ୍ତ ଜନସଚେତନତା ସୃଷ୍ଟି ଲାଗି ତେଲ କମ୍ପାନି ଗୁଡ଼ିକୁ ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ପରାମର୍ଶବଳୀ ଜାରି କରିବା ଆବଶ୍ୟକ ବୋଲି ହାଇକୋର୍ଟ କହିଛନ୍ତି।
କାହିଁକି ଏପରି ନିର୍ଦ୍ଦେଶ ଦେଲେ ଓଡିଶା ହାଇକୋର୍ଟ !
ନୟାଗଡ଼ ଜିଲ୍ଲା ଦଶପଲ୍ଲା ଥାନା ଅଞ୍ଚଳରେ ଜଣେ ବ୍ୟକ୍ତିଙ୍କ ଘରେ ୨୦୨୧, ସେପ୍ଟେମ୍ବର ୨୭ରେ ଗ୍ୟାସ ସିଲିଣ୍ଡର ଫାଟି ଯାଇଥିଲା । ଗୃହକର୍ତ୍ତାଙ୍କୁ ବଞ୍ଚାଇବାକୁ ଯାଇ ଆବେଦନକାରୀ ଗୁରୁତର ଆହତ ହୋଇଥିଲେ । ଗୃହକର୍ତ୍ତା କିଛି ଦିନ ଚିକିତ୍ସା ପରେ ପ୍ରାଣ ହରାଇଥିବା ବେଳେ ଆବେଦନକାରୀ ବଞ୍ଚି ଯାଇଥିଲେ । କିନ୍ତୁ ଏହାପରେ ସେ କୌଣସି ପ୍ରକାର କାର୍ଯ୍ୟ କରିବାରେ ସକ୍ଷମ ହୋଇ ନଥିଲେ । ଏହି ଘଟଣାରେ କ୍ଷତିପୂରଣ ପ୍ରଦାନ ପାଇଁ ଆବେଦନକାରୀ ବାରମ୍ବାର ଆଇସିଆଇସିଆଇ ଲୋମ୍ବାର୍ଡ ଜେନେରାଲ ଇନସ୍ୟୁରାନ୍ସ ଓ ଭାରତ ପେଟ୍ରୋଲିୟମକୁ ଅନୁରୋଧ କରି ଥିଲେ । କିନ୍ତୁ କୌଣସି ସୁଫଳ ନ ମିଳିବାରୁ ଆବେଦନକାରୀ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ । ତେବେ କୋର୍ଟ ଏହି ଘଟଣାକୁ ଅତି ଗୁରୁତ୍ୱର ସହ ନେଇ ଏପରି କଡା ତାଗିଦ କରିବା ସହ ଗ୍ୟାସ କମ୍ପାନୀମାନଙ୍କୁ ଏନେଇ ସଚେତନତା କରିବା ପାଇଁ ନିର୍ଦ୍ଦେଶ ଦେଇଛନ୍ତି । ହାଇକୋର୍ଟର ବିଚାରପତି ଜଷ୍ଟିସ ଡ଼ଃ ସଞ୍ଜୀବ କୁମାର ପାଣିଗ୍ରାହୀଙ୍କ ଖଣ୍ଡପୀଠ ଏହି ଆବେଦନର ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି।
ପୂର୍ବରୁ ଏପରି ଅଘଟଣରେ ଶିକାର ହୋଇଥିବା କ୍ଷତିଗ୍ରସ୍ତଙ୍କୁ ମିଳିବ କି ଏହି ସହାୟତା !
ଅନେକ ଲୋକ ଏହିପରି ଦୁର୍ଘଟଣା ରେ ପୂର୍ବରୁ ଶିକାର ହୋଇଛନ୍ତି।କେଉଁମାନେ ଆହତ ହୋଇଛନ୍ତି ତ ଆଉ କେଉଁମାନେ ମୃତାହତ କରିଛନ୍ତି।ତେବେ ଯେଉଁମାନଙ୍କ ପରିବାର ଏହି ସୁବିଧା ପାଇ ନାହାଁନ୍ତି, ସେମାନଙ୍କୁ ମିଳିବ କି ଏହି ସୁବିଧା ! ତେବେ ଏନେଇ ପ୍ରତିକ୍ରିୟା ରଖିଛନ୍ତି ଓଡିଶା ହାଇକୋର୍ଟର ଆଇନଜୀବୀ ଆଲୋକ ମହାପାତ୍ର । ତାଙ୍କ କହିବା ମୁତାବକ, "ଅନେକ ଲୋକ ଏହି ଗ୍ୟାସ ସିଲିଣ୍ଡର ଦୁର୍ଘଟଣାର ଶିକାର ହୋଇଛନ୍ତି । ମାତ୍ର ଏହି ସୁବିଧା ସମ୍ପର୍କରେ ସେମାନେ ଜାଣି ନାହାଁନ୍ତି।ଫକରେ ଏହି ସୁବିଧା ପାଇବାରୁ ଅନେକ ବଞ୍ଚିତ ହୋଇଛନ୍ତି । ମାତ୍ର ସେମାନଙ୍କ ପରିବାର ଲୋକେ ମଧ୍ୟ ଏହାର ସୁବିଧା ପାଇପାରିବେ । ଏନେଇ କ୍ଲେମ କରି ପାରିବେ । ଉପଯୁକ୍ତ ପ୍ଲାଟଫର୍ମରେ କ୍ଲେମ କରି ପ୍ରକୃତ ହିତାଧିକାରୀମାନେ ମଧ୍ୟ ଏହାର ସୁବିଧା ପାଇ ପାରିବେ ।"
ରାଜ୍ୟସଭାରେ ତତ୍କାଳୀନ ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ତଥ୍ୟ-
୨୪ ଜୁଲାଇ ୨୦୧୯ ରେ ତତ୍କାଳୀନ ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଲିଖିତ ତଥ୍ୟ ଅନୁଯାୟୀ ଉକ୍ତ ପଲିସି ଅନୁଯାୟୀ ଗ୍ୟାସ ସିଲିଣ୍ଡ ର ଦୁର୍ଘଟଣାର ଶିକାର ହୋଇଥିବା ଲୋକମାନେ ୬ ଲକ୍ଷ ଏବଂ ଆହତ ବ୍ୟକ୍ତିଙ୍କ ପାଇଁ ୨ ଲକ୍ଷ ଟଙ୍କା ପର୍ଯ୍ୟନ୍ତ ଏବଂ ସଂମ୍ପତ୍ତି ନଷ୍ଟ ହେଲେ ୨ ଲକ୍ଷ ପର୍ଯ୍ୟନ୍ତ ପ୍ରକୃତ ହିତାଧିକାରୀ ମନେ ପାଇପାରିବେ।୨୦୧୬/୧୭ ବର୍ଷରେ ୯୨୯ ଟି ଏହି ଭଳି ଦୁର୍ଘଟଣା ଘଟିଥିଲା । ଯେଉଁଥିରେ ୨୬୭ ଜଣ ପ୍ରାଣ ହରାଇଥିଲେ।ଏବଂ କମ୍ପାନୀ ୨୨ କୋଟି ୮୩ ଲକ୍ଷ ,୨୦୧୭ /୧୮ ରେ ହୋଇଥିବା ୧୧୮୫୧ ଟି ଦୁର୍ଘଟଣାରେ ୨୯୨ ଜଣ ମୃତୁ ଘଟିଥିଲା।୧୭ କୋଟି ୩୯ ଲକ୍ଷ ଟଙ୍କା ପ୍ରଦାନ କାରାଯାଇଥିଲା।୨୦୧୮ /୧୯ ଜୁଲାଇ ମାସ ମଧ୍ୟରେ ୯୮୩ ଟି ଦୁର୍ଘଟଣା ଘଟିଥିଲା ଯେଉଁଥିରେ ୨୫୪ ଜଣଙ୍କର ମୃତ ଘଟିଥିଲା । ଏବଂ ଉକ୍ତବର୍ଷ ୭ କୋଟି ୧୦ ଲକ୍ଷ ଟଙ୍କା ପ୍ରଦାନ କରାଯାଇଥିଲା ।
ଏହା ବି ପଢନ୍ତୁ- Commercial LPG cylinder: ମାସ ଆରମ୍ଭରୁ ମହଙ୍ଗା ମାଡ, 39 ଟଙ୍କା ବଢିଲା କମର୍ସିଆଲ ଗ୍ୟାସ ସିଲିଣ୍ଡର ଦର - LPG price hike
ଏହାଦ୍ୱାରା ଅନେକ ଲୋକ ଉପକୃତ ହେବେ ...
ଏହି ସମ୍ପର୍କିତ ରାୟ ଆସିବା ପରେ ‘ଇଟିଭି ଭାରତ’ କ୍ୟାମେରା ଘଟଣାର ବାସ୍ତବିକ ଯାଞ୍ଚ ପାଇଁ ଜଣେ ଗୃହିଣୀଙ୍କ ରୋଷେଇ ଘରେ ପହଁଞ୍ଚି ଥିଲା । ଏବଂ ଏନେଇ ଜଣେ ଗୃହିଣୀଙ୍କ ପ୍ରତିକ୍ରିୟା ଆସିଛି । ସେ କହିଛନ୍ତି, "ତେବେ ଏହି ଆଇନ ସମ୍ପର୍କିତ ତଥ୍ୟ ପୂର୍ବରୁ ଜଣା ନଥିଲା । ସେ ଦୀର୍ଘ ୧୬ ବର୍ଷ ହେବ ଗ୍ୟାସରେ ରୋଷେଇ କରୁଛନ୍ତି । ମାତ୍ର ଏହି ସୁବିଧା ସମ୍ପର୍କରେ ତାଙ୍କୁ ଜଣା ନଥିବା," ସେ ସିଧାସଳଖ କହିଛନ୍ତି । ତେବେ ହାଇକୋର୍ଟଙ୍କ ରାୟ ଆସିବା ପରେ ଏଣିକି ଏହି ସୁବିଧା ସମ୍ପର୍କିତ ତଥ୍ୟ ରସିଦର ପଛପଟେ ରହିବ । ଯାହା ଫଳରେ ଅନେକ ଲୋକ ଉପକୃତ ହେବେ ।
ଇଟିଭି ଭାରତ, କଟକ
