ବରଗଡ:ବରଗଡର ସହରର ବହୁ ଚର୍ଚ୍ଚିତ ଜବରଦଖଲ ଉଚ୍ଛେଦ ମାମଲା ଏବେ ଭିନ୍ନ ମୋଡ ନେଇଛି । ଜିଲ୍ଲା ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ ଚାଲିଥିବା ବେଳେ ଜବରଦଖଲକାରୀ ମାନେ ଉଚ୍ଚନ୍ୟାୟାଳୟଙ୍କ ଦ୍ଵାରସ୍ଥ ହୋଇ ଉଚ୍ଛେଦ ପ୍ରକ୍ରିୟା ବନ୍ଦ କରିବାରେ ସଫଳ ହୋଇଥିଲେ । ମାତ୍ର 6 ମାସ ପରେ ଉଚ୍ଚନ୍ୟାୟାଳୟ ତାଙ୍କର ରାୟ ଶୁଣାଇବା ପରେ ବର୍ତ୍ତମାନ ଏହି ଉଚ୍ଛେଦ ଘଟଣା ଏକ ଭିନ୍ନ ମୋଡ ନେଇଛି ।
ହାଇକୋର୍ଟ ବରଗଡ ପୌର ପରିଷଦକୁ ସମସ୍ତ ପାୱାର ଦେଇଥିବା ବେଳେ ବରଗଡ ପୌର ପରିଷଦ ନୂତନ ଭାବେ ପୁଣି 15 ଦିନର ନୋଟିସ ଜବରଦଖଲକାରୀଙ୍କୁ ଦେଇଛି । ତେବେ 15 ଦିନର ନୋଟିସ ପରେ ପୌର ପରିଷଦ ଜବରଦଖଲ ଉଚ୍ଛେଦ କାମ ଆରମ୍ଭ କରିବାର କ୍ଷମତା ରହିଛି । କିନ୍ତୁ ତଥାପି ମଧ୍ୟ ଜବରଦଖଲକାରୀ ପୁଣି ହାଇକୋର୍ଟର ଦ୍ଵାରସ୍ଥ ହୋଇଥିଲେ । କିନ୍ତୁ ହାଇକୋର୍ଟ ସେମାନଙ୍କ ପିଟିସନକୁ ରିଜେକ୍ଟ କରି ଦେଇଥିଲେ । ବର୍ତମାନ ପୌରପରିଷଦ ଜବରଦଖକାରୀଙ୍କୁ ନୋଟିସ ଦେବାର 15 ଦିନ ବିତିଯାଇଥିବା ବେଳେ ଆଗକୁ ସାଧାରଣ ନିର୍ବାଚନ ଆସୁଥିବାରୁ ଏହା ରାଜନୀତିକରଣ ହେବ ନାଁ ଉଚ୍ଛେଦ ପ୍ରକ୍ରିୟା ଆରମ୍ଭ ହେବ ତାହା ଏବେ ପ୍ରଶ୍ନ ଉଠିଛି ।
ସୂଚନା ଅନୁଯାୟୀ ବରଗଡ ସହରର ଲେଙ୍ଗୁ ମିଶ୍ର ଛକ ଠାରୁ ଲମ୍ବା ବିଲଡିଙ୍ଗ ପର୍ଯ୍ୟନ୍ତ ଦିନ ତମାମ ଲାଗି ରହୁଥିବା ଟ୍ରାଫିକ ସମସ୍ୟାକୁ ଦୀର୍ଘ ବର୍ଷରୁ ବରଗଡବାସୀ ସହ୍ୟ କରିଆସୁଥିଲେ । ମାତ୍ର ଜିରାନଦୀ ଉପରେ ନୂତନ ବ୍ରିଜ ନିର୍ମାଣ ପରେ ଆଗକୁ ହେବାକୁଥିବା ବ୍ୟାପକ ଟ୍ରାଫିକ ସମସ୍ୟାକୁ ଆଖିଆଗରେ ରଖି ମୁଣ୍ଡ ଟେକିଥିଲା ଜନଆନ୍ଦୋଳନ । ଜନସାଧାରଣଙ୍କ ଦାବି ଥିଲା ଯେ ଲେଙ୍ଗୁମିଶ୍ର ଛକ ଠାରୁ ଲମ୍ବା ବିଲଡିଙ୍ଗ ପର୍ଯ୍ୟନ୍ତ ରହିଥିବା ବେଆଇନ ଜବରଦଖଲକୁ ହଟାଯାଉ ।