ଭୁବନେଶ୍ବର:ପାଖେଇ ଆସୁଛି ୨୦୨୪ ସାଧାରଣ ନିର୍ବାଚନ । ତେବେ ରାଜ୍ୟରେ ନିର୍ବାଚନୀ ପ୍ରସ୍ତୁତିର ସମୀକ୍ଷା ପାଇଁ ଭୁବନେଶ୍ବର ବିମାନ ବନ୍ଦରରେ ପହଞ୍ଚିଲେ ମୁଖ୍ୟ ନିର୍ବାଚନ କମିଶନର ରାଜୀବ କୁମାର । ସେ ଆଜି (ଗୁରୁବାର)ଠୁ ତିନି ଦିନିଆ ଓଡିଶା ଗସ୍ତରେ ଥିବା ବେଳେ ତାଙ୍କ ସହ ଏକ ସ୍ବତନ୍ତ୍ର ଟିମ ମଧ୍ୟ ରହିଛନ୍ତି । ଆସନ୍ତା ୧୭ ତାରିଖ ଯାଏଁ ସେ ରାଜ୍ୟରେ ରହି ବିଭାଗ ସ୍ତରର ବୈଠକ ସହ ପ୍ରସ୍ତୁତିର ସମୀକ୍ଷା କରିବେ ବୋଲି ଜଣାପଡ଼ିଛି ।
ସାଧାରଣ ନିର୍ବାଚନ ଲାଗି ଓଡ଼ିଶାରେ ପ୍ରସ୍ତୁତିର ସମୀକ୍ଷା କରିବାକୁ ତିନି ଦିନିଆ ଓଡିଶା ଗସ୍ତରେ ଆସିଛନ୍ତି କେନ୍ଦ୍ରୀୟ ନିର୍ବାଚନ ଆୟୋଗ । ବିଳମ୍ବିତ ସନ୍ଧ୍ୟାରେ ମୁଖ୍ୟ ନିର୍ବାଚନ କମିଶନର ରାଜୀବ କୁମାର ଓ ତାଙ୍କ ଟିମ ଓଡ଼ିଶାରେ ପହଞ୍ଚିଛନ୍ତି । ଏହି ସ୍ବତନ୍ତ୍ର ଟିମରେ ରହିଛନ୍ତି ନିର୍ବାଚନ କମିଶନର ଅରୁଣ ଗୋଏଲ, ବରିଷ୍ଠ ଡେପୁଟି ନିର୍ବାଚନ କମିଶନର ଧର୍ମେନ୍ଦ୍ର ଶର୍ମା ଓ ନିତେଶ ବ୍ୟାସ, ଡେପୁଟି ନିର୍ବାଚନ କମିଶନର ମନୋଜ କୁମାର ସାହୁ, ଡିରେକ୍ଟର ଜେନେରାଲ ବି ନାରାୟଣନ, ଡିରେକ୍ଟର ପଙ୍କଜ ଶ୍ରୀବାସ୍ତବ, ସେକ୍ରେଟାରୀ ରାକେଶ କୁମାର । ଏହି ଟିମକୁ ସ୍ବାଗତ କରିଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳ । ଭୁବନେଶ୍ବରରେ ପହଞ୍ଚିବା ପରେ ସିଧାସଳଖ ଏକ ଘରୋଇ ହୋଟେଲ ଅଭିମୁଖେ ବାହାରିଛି ଟିମ । ଓଡିଶାରେ ଉଭୟ ଲୋକସଭା ଓ ବିଧାନସଭା ନିର୍ବାଚନ ଏକା ସାଙ୍ଗରେ ହେବ । ତେଣୁ ନିର୍ବାଚନ ଲାଗି ଓଡିଶା କେତେ ପ୍ରସ୍ତୁତି ଅଛି ତାହାର ସମୀକ୍ଷା କରିବେ ନିର୍ବାଚନ ଆୟୋଗ ଓ ଟିମ । ଇଭିଏମର ସ୍ଥିତି, ବୁଥ ସ୍ତରରେ ପ୍ରସ୍ତୁତି ଆଦିର ସମୀକ୍ଷା ହେବ ।