ଭୁବନେଶ୍ବର:ଭୀଷଣ ରୂପ ଧାରଣ କରିବ ବାତ୍ୟା 'ଦାନା' । ଉପୁଡ଼ିଯିବ ବଡ଼ବଡ଼ ଗଛ । ବାତ୍ୟା ଦୁର୍ବଳ ହେବାର କୌଣସି ସମ୍ଭାବନା ନାହିଁ । ଭୀଷଣ ରୂପ ଧାରଣ କରି ଉପକୂଳ ଅତିକ୍ରମ କରିବ ବାତ୍ୟା । ଉପକୂଳ ଅତିକ୍ରମ କରିବା ବେଳେ ପବନର ବେଗ ୧୦୦ରୁ ୧୧୦ ରହିବା ସହ ଏହା ବୃଦ୍ଧି ପାଇଁ ୧୨୦ କି.ମି ବେଗରେ ପବନ ବହିବ । ସେହିପରି ରାତିରୁ ଧିରେ ଧିରେ ବର୍ଷାର ପରମାଣ ବଢ଼ିବ । ସେପଟେ 'ଆଖି' ସୃଷ୍ଟି ହେବା ନେଇ ଏ ପର୍ଯ୍ୟନ୍ତ କିଛି ଆକଳନ କରିନାହିଁ ପାଣିପାଗ ବିଭାଗ ।
ଉତ୍ତର ଉତ୍ତର-ପଶ୍ଚିମ ଦିଗକୁ ଗତି କରୁଛି ବାତ୍ୟା:
ବର୍ତ୍ତମାନ ଭୀଷଣ ବାତ୍ୟା ରୂପ ନେଇ ଉତ୍ତର ଉତ୍ତର-ପଶ୍ଚିମ ଦିଗକୁ ଗତି କରୁଛି ବାତ୍ୟା 'ଦାନା' । ଗତ ୬ ଘଣ୍ଟାରେ ୧୨ କି.ମି ବେଗରେ ଗତି କରୁଛି । ପାରାଦ୍ବୀପର ଦକ୍ଷିଣ ପୂର୍ବ ଦିଗରେ ୧୮୦ ଓ ଧାମରାର ଦକ୍ଷିଣ-ପୂର୍ବ ଦିଗରେ ୨୧୦ କିମି ଦୂରରେ ଓ ସାଗର ଆଇଲାଣ୍ଡର ଦକ୍ଷିଣ ଦକ୍ଷିଣ ପୂର୍ବ ଦିଗରେ ୨୭୦ କିମି ଦୂରରେ ଏହା କେନ୍ଦ୍ରୀଭୂତ ହୋଇଛି । ଉତ୍ତର ଉତ୍ତର ପଶ୍ଚିମ ଦିଗକୁ ଗତି କରୁଛି ବାତ୍ୟା 'ଦାନା'।
ଏହି ସମୟ ଗୁରୁତ୍ୱପୂର୍ଣ୍ଣ :
ଆଞ୍ଚଳିକ ପାଣିପାଗ ବିଭାଗ ନିର୍ଦ୍ଦେଶିକା ମନୋରମା ମହାନ୍ତିଙ୍କ ସୂଚନା ଅନୁସାରେ, ଆଜି ମଧ୍ୟ ରାତ୍ରିରୁ ଆସନ୍ତାକାଲି ସକାଳ ଭିତରେ ଲ୍ୟାଣ୍ଡଫଲ୍ କରିବ ବାତ୍ୟା 'ଦାନା'। ଧାମରା ଓ ଭିତରକନିକା ମଧ୍ୟରେ ଏହା ଲ୍ୟାଣ୍ଡଫଲ କରିବ । ଉପକୂଳ ପାଖରେ ବା ନିକଟରେ ଜୁଆର ୨ ମିଟର ପର୍ଯ୍ୟନ୍ତ ଆସିବ । ଲ୍ୟାଣ୍ଡଫଲ ପ୍ରକ୍ରିୟାକୁ ନେଇ ଆଜି ମଧ୍ୟ ରାତିରୁ କାଲି ସକାଳ ୯ ପର୍ଯ୍ୟନ୍ତ ସମୟ ଗୁରୁତ୍ୱପୂର୍ଣ୍ଣ ରହିଛି । ଲ୍ୟାଣ୍ଡଫଲ୍ ପରେ ଗତି ଉତ୍ତର ଉତ୍ତର-ପଶ୍ଚିମ ଦିଗକୁ ରହିବ । ପ୍ରଭାବରେ ଆଜି ରାତି ଠାରୁ ବର୍ଷାର ପ୍ରଭାବ ଦେଖାଯିବ । ଲ୍ୟାଣ୍ଡଫଲ ପରେ ବାତ୍ୟାର ଗତି ପଶ୍ଚିମ ଉତ୍ତର-ପଶ୍ଚିମ ଦିଗକୁ ରହିବ । ପରେ ଏହା ଦୁର୍ବଳ ହୋଇ ଅବପାତରେ ପରିଣତ ହେବ ବାତ୍ୟା । ଉତ୍ତର ଓଡ଼ିଶାରେ ଏହାର ବିଶେଷ ପ୍ରଭାବ ରହିବ ।