ରାଉରକେଲା: ଉଦଯାପିତ ହେଲା ଡଙ୍ଗର ମହୋତ୍ସବ । ସୁନ୍ଦରଗଡ଼ ଜିଲ୍ଲା ବଣାଇ ବ୍ଲକ ସଦର ମହକୁମା ସ୍ଥିତ ରାଜା ଧରଣୀଧର ବହୁମୁଖି ଖେଳ ପଡିଆ ପରିସରରେ ଏହି ଡଙ୍ଗର ମହୋତ୍ସବ-2024 ଆୟୋଜିତ ହୋଇଯାଇଥିଲା । ଗତ ସୋମବାର ଦିନ ଆରମ୍ଭ ହୋଇଥିବା ଏହି ଡଙ୍ଗର ମହୋତ୍ସବ ଗତକାଲି (ମଙ୍ଗଳବାର)ରେ ଶେଷ ହୋଇଛି । ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ଓଡିଶା ସଙ୍ଗୀତ ନାଟକ ଏକାଡେମୀ, ଭୁବନେଶ୍ୱର ଓ ଜିଲ୍ଲା ପ୍ରଶାସନ, ସୁନ୍ଦରଗଡର ମିଳିତ ସହଯୋଗରେ ଏହି ଉତ୍ସବ ଆୟୋଜିତ ହୋଇଥିଲା ।
ଗତ ମଙ୍ଗଳବାର ସଂଧ୍ୟା ୬ ଘଟିକା ସମୟରେ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବଣାଇ ବିଧାୟକ ଲକ୍ଷ୍ମଣ ମୁଣ୍ଡା, ବରେଣ୍ୟ ଅତିଥି ଭାବେ ଦିଲୀପ ରାଉତରାୟ, ନିର୍ଦ୍ଦେଶକ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ଓଡିଶା, ସମ୍ମାନୀତ ଅତିଥି ଭାବେ ବଣାଇ ଉପଜିଲ୍ଲାପାଳ ସୁରଞ୍ଜନ କୁମାର ସାହୁ, ଓଡିଶା ସଙ୍ଗୀତ ନାଟକ ଏକାଡେମୀ ସମ୍ପାଦକ ପ୍ରବୋଧ କୁମାର ରଥ ଯୋଗ ଦେଇଥିଲେ । ଠାକୁରଙ୍କ ଫଟୋଚିତ୍ରରେ ମାଲ୍ୟାର୍ପଣ କରିବା ସହିତ ଦୀପ ପ୍ରଜ୍ବଳନ କରି ଏବଂ ଫିତା କାଟି ଆନୁଷ୍ଠାନିକ ଭାବେ କାର୍ଯ୍ୟକ୍ରମକୁ ଉଦଘାଟନ କରିଥିଲେ । ଆଦିବାସୀ ମାନଙ୍କ ବିଭିନ୍ନ ପ୍ରକାର ଲୋକକଳାକୁ ପ୍ରୋତ୍ସାହନ ଯୋଗାଇବା ସହିତ ସେମାନଙ୍କ ନୃତ୍ୟକୁ ସାରା ଦେଶ ଏବଂ ଦେଶ ବାହାରେ ପ୍ରଚାର ଓ ପ୍ରସାର ପାଇଁ ସରକାର ସମସ୍ତ ପ୍ରକାର ସହଯୋଗ ଯୋଗାଇ ଦେଉଛନ୍ତି ବୋଲି ନିର୍ଦ୍ଦେଶକ ଏବଂ ସମସ୍ତ ଅତିଥି ମାନେ ଜଣାଇଥିଲେ । ଦୁଇ ଦିନ ଧରି ହେଇଥିବା ରାଜ୍ୟ ସ୍ତରୀୟ ଡଙ୍ଗର ମହୋତ୍ସବ-୨୦୨୪ରେ ଆଖପାଖ ଅଞ୍ଚଳରୁ ହଜାର ହଜାର ସଂଖ୍ୟାରେ ଦର୍ଶକ ଉପସ୍ଥିତ ରହି କାର୍ଯ୍ୟକ୍ରମକୁ ଉପଭୋଗ କରିଥିଲେ।