ଅନୁଗୋଳ: ଗତ ତିନିଦିନ ଧରି ଅନୁଗୋଳ ଜିଲ୍ଲା ସାତକୋଶିଆ ଅଭୟାରଣ୍ୟରେ ଚଳିଥିବା ପକ୍ଷୀ ସର୍ବେକ୍ଷଣ ଶେଷ ହୋଇଛି । ଦେଶର ବିଭିନ୍ନ ରାଜ୍ୟରୁ 32 ଜଣ ପକ୍ଷୀ ବିଶେଷଜ୍ଞ ଏହି ସର୍ବେକ୍ଷଣରେ ଭାଗ ନେଇ ଅଭୟାରଣ୍ୟରେ ପକ୍ଷୀ ସମ୍ପର୍କରେ ଅନୁଧ୍ୟାନ କରିଥିଲେ । ସାତକୋଶିଆରେ ଦ୍ୱିତୀୟ ଥର ପାଇଁ ଏହି ସର୍ବେକ୍ଷଣ କରାଯାଇଛି ।
ଗତ ୩ତାରିଖ ଠାରୁ ସାତକୋଶିଆରେ ଆରମ୍ଭ ହୋଇଥିବା ସ୍ଥଳ ପକ୍ଷୀ ସର୍ବେକ୍ଷଣ ଗତକାଲି ଶେଷ ହୋଇଛି । ୩ଦିନ ଧରି ରାଜ୍ୟର କେବଳ ସାତକୋଶିଆରେ ଏହି କାର୍ଯ୍ୟକ୍ରମ ଚାଲିଥିଲା । ଗତ ବର୍ଷ ପ୍ରଥମ ଥର ପାଇଁ ସ୍ଥଳ ପକ୍ଷୀ ସର୍ବେକ୍ଷଣ ଆରମ୍ଭ କରାଯାଇଥିଲା । ଏହି କାର୍ଯ୍ୟକ୍ରମରେ ମଧ୍ୟପ୍ରଦେଶ, ଛତିଶଗଡ଼, ଗୁଜୁରାଟ, ରାଜସ୍ଥାନ, ଗୋଆ, ଆସାମ, ପଶ୍ଚିମବଙ୍ଗ ଆଦି ରାଜ୍ୟରୁ ୩୨ଜଣ ପକ୍ଷୀ ବିଶେଷଜ୍ଞ ଅଂଶ ଗ୍ରହଣ କରିଥିଲେ । ବିଭିନ୍ନ ସ୍ଥାନରେ ଦୁଇ ଜଣ ଲେଖାଏଁ ବିଶେଷଜ୍ଞ ରହି ପକ୍ଷୀ ସର୍ବେକ୍ଷଣ କରିଥିଲେ । ପକ୍ଷୀ ମାନଙ୍କ ରାବ ଶୁଣି ଏବଂ ସେମାନଙ୍କ ଫୋଟ ଉଠାଇ ଚିହ୍ନଟ କରି ସର୍ବେକ୍ଷଣ କରାଯାଇଥିଲା । ଗତ ବର୍ଷ ସର୍ବେକ୍ଷଣରୁ ଏଠାରେ ୨୪୮ପ୍ରଜାତିର ସ୍ଥଳ ପକ୍ଷୀ ଥିବା ଜଣା ପଡିଥିଲା ।
ତେବେ ଚଳିତ ବର୍ଷ ଏହି ପ୍ରଜାତି ବଢିଥିବା ଅନୁମାନ କରାଯାଉଛି । ପ୍ରାୟ ୩୧୦ପ୍ରଜାତିର ପକ୍ଷୀ ଥିବା ଚଳିତ ସର୍ବେକ୍ଷଣରୁ ଜଣା ପଡ଼ିଛି । କିଛି ନୂଆ ପ୍ରଜାତିର ସ୍ଥଳ ପକ୍ଷୀ ସତକୋଶିଆକୁ ଆସିଥିବା ବିଶେଷଜ୍ଞ ମାନେ କହିଛନ୍ତି । ଯାହାକି ସାତକୋଶିଆ ପାଇଁ ଏକ ଶୁଭ ଖବର । ଗତକାଲି ଟିକରପଡା ଠାରେ ଏକ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ସାତକୋଶିଆ ଡ଼ିଏଫଓଙ୍କ ସମେତ ସର୍ବେକ୍ଷଣରେ ଅଂଶ ଗ୍ରହଣ କରିଥିବା ସମସ୍ତ ବିଶେଷଜ୍ଞ ଯୋଗ ଦେଇ ନିଜ ନିଜର ଅଭିଜ୍ଞତା କହିଥିଲା । ସାତକୋଶିଆର ଜୈବ ବିବିଧତା ସାରା ଦେଶରେ ବିରଳ ବୋଲି କହିଥିଲେ ପକ୍ଷୀ ବିଶେଷଜ୍ଞ ।