ସମ୍ବଲପୁର: ବିଏଡ କୋର୍ସ କରି ସାର୍ଟିଫିକେଟ ପାଇଲେ, ହେଲେ ସାର୍ଟିଫିକେଟ୍ ଦେଖାଇଲେ ମିଳୁନି ଚାକିରି । କେନ୍ଦ୍ରୀୟ ବିଦ୍ୟାଳୟ, ଜବାହାର ନବୋଦୟ ବିଦ୍ୟାଳୟ ଓ ଏକଲବ୍ୟ ସ୍କୁଲର ଶିକ୍ଷକ ନିଯୁକ୍ତି ବେଳେ ପାସ୍ ସାର୍ଟିଫିକେଟକୁ ଜାଲି ବୋଲି କହି ଆବେଦନକୁ କରାଯାଉଛି ଖାରଜ । ଏହି ପରିପ୍ରେକ୍ଷୀରେ ସମ୍ବଲପୁର ଜିଏମ ବିଶ୍ବବିଦ୍ୟାଳୟର ଇଣ୍ଟିଗ୍ରେଟେଡ଼ B. Ed ଛାତ୍ରଛାତ୍ରୀଙ୍କ ମଧ୍ୟରେ ପ୍ରକାଶ ପାଇଛି ଅସନ୍ତୋଷ । ଶିକ୍ଷକ ନିଯୁକ୍ତିରେ NCET ମାନ୍ୟତା ପ୍ରାପ୍ତ ଏହି ଇଣ୍ଟିଗ୍ରେଟେଡ଼ B.Ed ଛାତ୍ରଛାତ୍ରୀଙ୍କୁ ଶିକ୍ଷାଗତ ପ୍ରମାଣପତ୍ରକୁ ସ୍ବୀକୃତି ଦିଆଯାଉନଥିବା ଅଭିଯୋଗ କରିଛନ୍ତି ଛାତ୍ରଛାତ୍ରୀ ।
ଆଜି ଛାତ୍ରଛାତ୍ରୀ ସମ୍ବଲପୁର ଜିଏମ ବିଶ୍ବବିଦ୍ୟାଳୟରୁ ପୋଷ୍ଟର ଓ ବ୍ୟାନର ଧରି କେନ୍ଦ୍ର ଶିକ୍ଷାମନ୍ତ୍ରୀଙ୍କ ବିରୁଦ୍ଧରେ ନାରାବାଜି କରି ଏକ ଶୋଭାଯାତ୍ରାରେ ସହର ଦେଇ ବିଜେପି କାର୍ଯ୍ୟାଳୟ ପର୍ଯ୍ୟନ୍ତ ଯାଇ ବିକ୍ଷୋଭ ପ୍ରଦର୍ଶନ କରିଥିଲେ । ଏହା ସହ ଜିଲ୍ଲାପାଳଙ୍କ ଜରିଆରେ କେନ୍ଦ୍ର ଶିକ୍ଷା ବିଭାଗ ଓ ରାଜ୍ୟ ଶିକ୍ଷା ବିଭାଗର ସଚିବଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି । ଆସନ୍ତାକାଲି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସମ୍ବଲପୁର ଗସ୍ତରେ ଆସୁଥିବା ବେଳେ ତାଙ୍କ ଗସ୍ତ ପୂର୍ବରୁ ସମ୍ବଲପୁରରେ ଛାତ୍ରଛାତ୍ରୀମାନେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିରୁଦ୍ଧରେ ନାରାବାଜି କରିଛନ୍ତି ।
ଏହା ସହ ସମ୍ବଲପୁର ଜିଲ୍ଲା ବିଜେପି କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ । ଛାତ୍ରଛାତ୍ରୀମାନେ ଅଭିଯୋଗ କରିଛନ୍ତି ଯେ ସେମାନେ 2016 ମସିହାରୁ ଏହି କୋର୍ସ କରୁଛନ୍ତି । ଏହା ଏକ ସେଲ୍ଫ ଫାଇନାନସିଂ କୋର୍ସ ହୋଇଥିବା ବେଳେ ଏହାର ଅବଧି 4 ବର୍ଷ ରହିଛି । ସମ୍ବଲପୁର ଜିଏମ ବିଶ୍ବବିଦ୍ୟାଳୟରେ 100ଟି ସିଟ ରହିଛି । NCTE ଦ୍ବାରା ଏହି କୋର୍ସକୁ ସ୍ବୀକୃତି ରହିଛି । ତେବେ ଶିକ୍ଷକ ନିଯୁକ୍ତି ପ୍ରକ୍ରିୟା ବେଳେ ଏହି ଛାତ୍ରଛାତ୍ରୀଙ୍କ ସାର୍ଟିଫିକେଟକୁ ଅମାନ୍ୟ କହି ଆବେଦନକୁ ଖାରଜ କରି ଦିଆଯାଉଥିବା ଅଭିଯୋଗ କରିଛନ୍ତି ଛାତ୍ରଛାତ୍ରୀ ।