ଭୁବନେଶ୍ବର: ରବୀନ୍ଦ୍ର ମଣ୍ଡପ ଠାରେ ନାଟ୍ୟସଂସ୍ଥା ‘ଉତ୍ତର ପୁରୁଷ’ ପକ୍ଷରୁ ତିନି ଦିନିଆ ନାଟକ ପରିକ୍ରମା ଅନୁଷ୍ଠିତ ହେବାକୁ ଯାଉଛି । ଏହି ଉତ୍ସବ ଆସନ୍ତା ୨୦ ମାର୍ଚ୍ଚ(ବୁଧବାର) ଆରମ୍ଭ ହୋଇ ୨୨ ତାରିଖରେ ଉଦଯାପିତ ହେବ । ୩ ଦିନରେ ୩ଟି ନାଟକ ପରିବେଷଣ ହେବାକୁ ଯାଉଛି । ଯାହାର ମୁଖ୍ୟ ଉଦ୍ଦେଶ୍ୟ ଦର୍ଶକ, ନାଟ୍ୟକାର ଓ କଳାକାରଙ୍କ ମଧ୍ୟରେ ଭାବର ଆଦାନ ପ୍ରଦାନ କରିବା । ଏନେଇ ସଂସ୍ଥା ପକ୍ଷରୁ ଅୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି ।
ପ୍ରଥମ ଦିନ ଅର୍ଥାତ୍ ମାର୍ଚ୍ଚ ୨୦ ତାରିଖ ଦିନ ନାଟ୍ୟକାର ବିଶ୍ବଜିତ୍ ଦାସଙ୍କ ରଚିତ ନାଟକ ‘ମୃଗୟା’ ପ୍ରଦର୍ଶିତ ହେବ । ଯାହାର ନିର୍ଦ୍ଦେଶନାରେ ନିଶିକାନ୍ତ ନାୟକ ଏବଂ ରାଶେଷ କୁମାର ପତଙ୍ଗ ଥିବା ବେଳେ ସଂଗୀତରେ କୈଳାସ ସେନାପତି ରହିଛନ୍ତି । ସେହିପରି ମାର୍ଚ୍ଚ ୨୧ ତାରିଖରେ ଅଧ୍ୟାପକ ନାରାୟଣ ସାହୁଙ୍କ ରଚିତ ନାଟକ ‘ଯାହା କହି ହୁଏନା’ ପରିବେଷଣ ହେବ । ନାଟକଟି ଦାଦନ ଶ୍ରମିକ ଉପରେ ପର୍ଯ୍ୟବେସିତ ହୋଇଥିବା ବେଳେ ନିର୍ଦ୍ଦେଶନାରେ ଡ଼ଃ ପ୍ରସନ୍ନ କୁମାର ମିଶ୍ର ଓ ସଂଗୀତରେ ପ୍ରତାପ ରାଉତ ରହିଛନ୍ତି । ୨୨ ତାରିଖରେ ଅର୍ଥାତ ଶେଷ ରାତିରେ ପରିବେଷିତ ହେବ ନାଟକ ‘ସରଳାର ଚିଠି ’। ଗଳ୍ପରୁ ନାଟକଟି ହେଉଥିବା ବେଳେ ମୂଳଗଳ୍ପ ଅମ୍ରିତା ପ୍ରିତମ ଲେଖିଛନ୍ତି । ନାଟ୍ୟରୂପ ଓ ନିର୍ଦ୍ଦେଶନାରେ ରହିଛନ୍ତି ଦେବଦତ୍ତ ପତି, ସଂଗୀତ ନିର୍ଦ୍ଦେଶନା ଦେଇଛନ୍ତି କୈଳାସ ସେନାପତି ।