ହାଇଦ୍ରାବାଦ : ଗୋଟିଏ ଫିଲ୍ମରେ ଦୁଇ ତାରକା ନଜର ଆସିଲେ ସେହି ଫିଲ୍ମ ସୁପର ହିଟ୍ ହୋଇଯାଏ । ନିଜ ପ୍ରିୟ ସୁପରଷ୍ଟାରଙ୍କୁ ଦେଖିବାକୁ ସିନେମା ହଲ ଆଗରେ ଲୋକଙ୍କ ଧାଡ଼ି ଲମ୍ବିଯାଏ । ଏବେ ନୂଆକରି ରିଲିଜ ହୋଇଥିବା ସାଉଥ ଫିଲ୍ମ GOATରେ ମଧ୍ୟ ସମାନ ଘଟଣା ଦେଖିବାକୁ ମିଳିଛି । ଏଥିରେ ସୁପରଷ୍ଟାର ଥାଲାପତି ବିଜୟ ଲିଡ ରୋଲରେ ନଜର ଆସିଛନ୍ତି ସତ, ହେଲେ ଏଥିରେ ନଜର ଆସିଥିବା ଆଉ ଜଣେ ଷ୍ଟାରଙ୍କୁ ଦେଖିବାକୁ ବର୍ତ୍ତମାନ ବିଭିନ୍ନ ହଲରେ ଦର୍ଶକଙ୍କ ଭିଡ଼ ଜମୁଛି । ଏହି ଷ୍ଟାର କୌଣସି ଫିଲ୍ମ ଜଗତ ନୁହେଁ, ବରଂ କ୍ରିକେଟ ଜଗତର କ୍ୟାପ୍ଟେନ କୁଲ ଏମଏସ୍ ଧୋନି ।
GOAT ଫିଲ୍ମରେ ଧୋନି :-
ଭାରତକୁ ଦୁଇଥର ବିଶ୍ବ ବିଜୟୀ କରାଇଥିବା ଭାରତୀୟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କୁ ଆଇପିଏଲ୍ରେ ମଧ୍ୟ ସଫଳତମ ଅଧିନାୟକ ବୋଲି କୁହାଯାଏ । କାରଣ ସେ ଆଇପିଏଲ୍ରେ ନିଜ ଦଳ ଚେନ୍ନାଇ ସୁପର କିଙ୍ଗସ୍ (CSK)କୁ 5 ଥର ଟାଇଟଲ ଜିତାଇଛନ୍ତି । ତେଣୁ ଚେନ୍ନାଇକୁ ଧୋନି ତାଙ୍କ ଦ୍ବିତୀୟ ଘର ଭାବେ ଅନେକ ସାକ୍ଷାତକାରରେ ସ୍ବୀକାର କରିଛନ୍ତି । ତାମିଲରେ ତାଙ୍କୁ 'ଥାଲା' ଅର୍ଥାତ ବଡ଼ ଭାଇ ଭାବେ ନୂଆ ପରିଚୟ ମଧ୍ୟ ମିଳିଛି । ଏବେ କ୍ରିକେଟ ଦୁନିଆରୁ ଫିଲ୍ମ ଦୁନିଆରେ ପାଦ ରଖିଥିବା ଧୋନିଙ୍କୁ ବଡ଼ ପରଦାରେ ଦେଖିବାକୁ ଦର୍ଶକ ମଧ୍ୟ ବିଭିନ୍ନ ହଲରେ ନାହିଁ ନଥିବା ଭିଡ଼ ଜମାଉଛନ୍ତି । ଦକ୍ଷିଣୀ ମୁଭି GOATରେ ଧୋନିଙ୍କର ଏଖ ଛୋଟ କ୍ୟାମୋ ଦେଖାଯାଇଛି । ଯେଉଁଥିରେ ସେ ଚେନ୍ନାଇ ସୁପର କିଙ୍ଗସ୍ ପାଇଁ ଆଇପିଏଲ୍ ମ୍ୟାଚ୍ ଖେଳୁଛନ୍ତି । ଯଦିଓ ଧୋନିଙ୍କ ଏହି ସ୍କ୍ରିନ ସମୟ ବହୁତ କମ, ହେଲେ ତାଙ୍କର ଏହି ସାମାନ୍ୟ ଉପସ୍ଥିତି ବହୁତ ହାଇଲାଇଟ ହୋଇଛି । ଏହି ଛୋଟ କ୍ୟାମୋ କାରଣରୁ ଫିଲ୍ମ ସୁପର ହିଟ ବୋଲି ପ୍ରଶଂସକମାନେ ପ୍ରତିକ୍ରିୟା ରଖୁଛନ୍ତି ।