କଟକ : କ୍ରୀଡ଼ା ଦିଗରେ ଆଉ ପାଦେ ଆଗେଇବ ଓଡିଶା । ଭୁବନେଶ୍ବରରେ ନିର୍ମାଣ ହେବ 'Sports Valley' ସ୍ପୋର୍ଟ୍ସ ଭ୍ୟାଲି । ଯେଉଁଠାରେ ସମସ୍ତ ଅଣ-ପାରମ୍ପାରିକ କ୍ରୀଡାକୁ କରାଯିବ ସ୍ଥାନିତ । ଏନେଇ ରାଜ୍ୟ ସରକାରଙ୍କ ସହ ବିଚାରବିମର୍ଶ ଜାରି ରହିଥିବା କହିଛନ୍ତି ରାଜ୍ୟ କ୍ରୀଡାମନ୍ତ୍ରୀ ସୂର୍ଯ୍ୟବଂଶୀ ସୁରଜ । ରବିବାର କଟକ ଇନଡୋର ଷ୍ଟାଡିୟମରେ ଜାରି ରହିଥିବା ରାଜ୍ୟସ୍ତରୀୟ ଟାଇକୋଣ୍ଡୋ ପ୍ରତିଯୋଗିତାର ଉଦ୍ଯାପନୀ ଉତ୍ସବରେ ଯୋଗଦେଇ ଏଭଳି ଢଙ୍ଗରେ କ୍ରୀଡାର ବିକାଶ ହେବ ବୋଲି କହିଛନ୍ତି କ୍ରୀଡାମନ୍ତ୍ରୀ ସୂର୍ଯ୍ୟବଂଶୀ ସୁରଜ ।
ଜବାହରଲାଲ ନେହେରୁ ଇନଡୋର ଷ୍ଟାଡିୟମରେ 3 ଦିନବ୍ୟାପୀ ଚାଲିଥିଲା ଏହି ରାଜ୍ୟସ୍ତରୀୟ ଟାଇକୋଣ୍ଡୋ ପ୍ରତିଯୋଗିତା । ଉଦ୍ଯାପନୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇ ରାଜ୍ୟ କ୍ରୀଡ଼ାମନ୍ତ୍ରୀ କହିଛନ୍ତି, "ଏଠାରେ ଯେଉଁ କୌଶଳ ବିଶେଷ କରି ବାଳିକାମାନେ ଶିଖୁଛନ୍ତି, ତାହା ସେମାନଙ୍କ ପାଇଁ ଏକ ବଡ଼ ଉପଲବ୍ଧି । କାରଣ ଏହା ଆତ୍ମରକ୍ଷା ଦିଗରେ ବେଶ ସହାୟକ ହୋଇଥାଏ ।" ତେବେ ଆଗମୀ ଦିନରେ ଟାଇକୋଣ୍ଡୋର ବିକାଶ ପାଇଁ ଯାହା ଆବଶ୍ୟକ ତାହା ଉପରେ ଗୁରୁତ୍ୱ ଦିଆଯିବ ବୋଲି କହିଛନ୍ତି କ୍ରୀଡାମନ୍ତ୍ରୀ । ଏହା ବ୍ୟତୀତ ଭୁବନେଶ୍ବରରେ ସ୍ଥାପିତ ହେବାକୁ ଯାଉଥିବା 'Sports Valley' ବିଷୟରେ ମନ୍ତ୍ରୀ କହିଛନ୍ତି, "ଏହାକୁ ଏକ କ୍ରୀଡା ଉପତ୍ୟକା ବୋଲି କହିଲେ ଅତ୍ୟୁକ୍ତି ହେବ ନାହିଁ । ଯେତେ ପ୍ରକାର ଅଣ-ପାରମ୍ପାରିକ ଖେଳ ରହିଛି, ସେଗୁଡ଼ିକୁ ସେଠାରେ ସ୍ଥାନିତ କରିବା ପାଇଁ ସରକାରୀସ୍ତରରେ ବିଚାର ବିମର୍ଶ ଚାଲିଛି ।"