କଟକ: ବିଜେଡି ଛାଡିଲେ ପ୍ରକାଶ ବେହେରା। ସାଲେପୁର ପୂର୍ବତନ ବିଧାୟକ ହେଉଛନ୍ତି ପ୍ରକାଶ। ଗତ ନିର୍ବାଚନରେ କଟକ-ବାରବାଟୀ ଆସନରୁ ବିଜେଡି ପ୍ରାର୍ଥୀ ହୋଇଥିଲେ ପ୍ରକାଶ। ଆଜି ସେ ନିଜ ଇସ୍ତଫା ପତ୍ର ବିଜେଡି ସଭାପତି ନବୀନ ପଟ୍ଟନାୟକଙ୍କୁ ପଠାଇଛନ୍ତି। ଇସ୍ତଫା ପତ୍ରରେ ସେ କଟକ-ବାରବାଟୀର ସମସ୍ତ ଜନତାଙ୍କୁ ସମର୍ଥନ ପାଇଁ ଧନ୍ୟବାଦ ଜଣାଇବା ସହ ବହୁ ଚିନ୍ତା କରିବା ପରେ ଦଳ ଛାଡିବା ନିଷ୍ପତ୍ତି ନେବା କଥା ଉଲ୍ଲେଖ କରିଛନ୍ତି।
ପ୍ରକାଶଙ୍କ ରାଜନୈତିକ କ୍ୟାରିୟର:
2014 ନିର୍ବାଚନରେ ପ୍ରକାଶ ବେହେରା ସାଲେପୁରରୁ କଂଗ୍ରେସ ଟିକେଚରେ ଲଢ଼ି ବିଜୟୀ ହୋଇଥିଲେ । 2019 ନିର୍ବାଚନ ପୂର୍ବରୁ କଂଗ୍ରେସ ଛାଡ଼ି ବିଜେପିରେ ସାମିଲ ହେବା ସହ, ବିଜେପି ପକ୍ଷରୁ ସାଲେପୁର ବିଧାନସଭା ପାଇଁ ଲଢି ପରାଜିତ ହୋଇଥିଲେ । 2019ରେ ସେ ବିଜେଡି ପ୍ରାର୍ଥୀ ପ୍ରଶାନ୍ତ ବେହେରାଙ୍କଠାରୁ ହାରିଥିଲେ ପ୍ରକାଶ । ପରବର୍ତ୍ତୀ ସମୟରେ ସେ ବିଜେଡିରେ ମିଶି ଗତ ନିର୍ବାଚନରେ ବାରବାଟୀ-କଟକ ଆସନରୁ ଟିକେଟ୍ ପାଇ ଲଢିଥିଲେ। ହେଲେ ନିର୍ବାଚନ ଜିତିପାରି ନାହାନ୍ତି ପ୍ରକାଶ।
ଇସ୍ତଫା ପତ୍ରରେ ଏମିତି ଲେଖିଛନ୍ତି ପ୍ରକାଶ:
ବିଜେଡି ସଭାପତି ନବୀନ ପଟ୍ଟନାୟକଙ୍କ ନିକଟକୁ ପଠାଇଥିବା ଇସ୍ତଫା ପତ୍ରରେ ଦଳର ପ୍ରାଥମିକ ସଦସ୍ୟ ପଦ ଛାଡିଥିବା ସେ ଉଲ୍ଲେଖ କରିଛନ୍ତି। ପ୍ରକାଶ ଲେଖିଛନ୍ତି, ବହୁ ଚିନ୍ତନ ପରେ ମୁଁ ବିଜେଡି ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଉଛି। ବାରବାଟୀ-କଟକ ଭଳି ସମ୍ମାନଜନକ ଆସନରୁ ପ୍ରାର୍ଥୀ କରାଇଥିବାରୁ କୃତଜ୍ଞତା ଜଣାଉଛି। ଯେହେତୁ ମୁଁ ଜଣେ ରାଷ୍ଟ୍ରୀୟ ଚିନ୍ତାଧାରରେ ବିଶ୍ବାସ ରଖୁଥିବା ଓ ଜନସାଧାରଣଙ୍କ ସମସ୍ୟା, ବିକାଶ ଓ ସଂଗଠନ ସହ ୟୋଡିହୋଇ ରହୁଥିବା ବ୍ୟକ୍ତିତ୍ବ ତେଣୁ ଏଭଳି ନିଷ୍ପତ୍ତି ନେଲି।"