କେନ୍ଦ୍ରାପଡା: ଜିଲ୍ଲାରେ ପୁଣି ଜଣେ ଚାଷୀ ଉଜୁଡା କ୍ଷେତକୁ ଦେଖି ପ୍ରାଣ ହାରିଥିବା ଅଭିଯୋଗ ହୋଇଛି । ଗତମାସ (ଡିସେମ୍ବର) ୨୨ ଓ ୨୫ ତାରିଖରେ ଜିଲ୍ଲାର ଡେରାବିଶ୍ ବ୍ଲକ ଅନ୍ତର୍ଗତ ସନ୍ଥପୁରା ଓ କୋଶିଦା ଗାଁର ଦୁଇ ଚାଷୀଙ୍କ ମୃତ୍ୟୁର ଅଭିଯୋଗ ଆସିଥିବା ବେଳେ ଏବେ ଆଳି ଅଞ୍ଚଳରୁ ଆସିଛି ସମାନ ଅଭିଯୋଗ । କୋଳଡିହ ପଞ୍ଚାୟତର ଚାଷୀ କୈଳାସ ଚନ୍ଦ୍ର ଧଳ ଅଦିନିଆ ବର୍ଷା କ୍ଷୟକ୍ଷତି କାରଣରୁ ଜୀବନ ହାରିଥିବା ପରିବାର ସଦସ୍ୟ ଅଭିଯୋଗ କରିଛନ୍ତି ।
- ଜୀବନ ହାରିଲେ ଚାଷୀ
ପରିବାର ସଦସ୍ୟଙ୍କ ଅଭିଯୋଗ ଅନୁସାରେ, କରଜ ଟଙ୍କା ସୁଝିବା ଚିନ୍ତାରେ ଥିଲେ । ଆଜି ସକାଳୁ ପରିବାର ଲୋକ କୈଳାସଙ୍କୁ ଡାକିବାରୁ କୈଳାସ ଶୁଣିନଥିଲେ । କବାଟ ଭାଙ୍ଗିବାରୁ କୈଳାସ ନିସ୍ତେଜ ଅବସ୍ଥାରେ ଶୋଇଥିବା ଅବସ୍ଥାରେ ଉଦ୍ଧାର କରିଥିଲେ । ନିକଟରେ ବିଷ ବୋତଲ ଥିବା ଦେଖିବାକୁ ପାଇଥିଲେ । ପରିବାର ଲୋକ ଆଳି ମେଡିକାଲକୁ ନେଇଥିବା ବେଳେ ଡାକ୍ତର ସେଠାରେ କୈଳାସଙ୍କୁ ମୃତ ଘୋଷଣା କରିଥିଲେ । ମୃତ ଚାଷୀଙ୍କ ପୁତୁରା କୁମାର ସେନ ଧଳ ଆଳି ଥାନାରେ ଏନେଇ ଅଭିଯୋଗ କରିଛନ୍ତି ।
- 6 ଲକ୍ଷ ଟଙ୍କା ଋଣ କରି ଚାଷ କରିଥିଲେ: ମୃତକଙ୍କ ଭାଇ
ପରିବାର ଓ ସ୍ଥାନୀୟ ଗ୍ରାମବାସୀଙ୍କ ଅଭିଯୋଗ ଅନୁସାରେ କୈଳାସ ବିଭିନ୍ନ ସ୍ଥାନରୁ ଧାର,କରଜ ଓ ସ୍ଥାନୀୟ ସମବାୟ ସମିତିରୁ ଋଣ କରି ପ୍ରାୟ 8 ଏକର ଜମିରେ ଚାଷ କରିଥିଲେ । ନିଜର 5 ଏକର ଜମି ସହିତ ଭାଗରେ 3 ଏକର ଜମିରେ ଚାଷ କରିଥିଲେ । ଅଦିନିଆ ବର୍ଷାରେ ଧାନ ଫସଲ ଗଜା ହୋଇ ଯାଇଥିଲା । ଉଜୁଡା କ୍ଷେତକୁ ଦେଖି 20 ତାରିଖରୁ କୈଳାସ ଚିନ୍ତାରେ ରହୁଥିଲେ ବୋଲି ପରିବାର ଲୋକ କହିଛନ୍ତି ।
- କଣ କହିଲେ ମୃତ ଚାଷୀଙ୍କ ଭାଇ
କୈଳାସଙ୍କ ଭାଇ ବୀରେନ୍ଦ୍ର ଧଳ କହିଛନ୍ତି," 25 ତାରିଖରେ ଯେଉଁ ବର୍ଷା ହୋଇଥିଲା ସେଥିରେ ସବୁ ଧାନ କ୍ଷତି ହୋଇଥିଲା । ସେ ବିଲକୁ ପ୍ରତିଦିନ ଯିବା ଆସିବା କରୁଥିଲେ । ଘର ଲୋକେ ବହୁତ ବୁଝାବୁଝି କରିଥିଲେ ମଧ୍ୟ ତାଙ୍କର ବହୁତ ବିବ୍ରତ ରହୁଥିଲା । ସେ ଉପର ଘରେ ରୁହନ୍ତି ଆମେ ତଳେ ରହୁ, କାଲି ସନ୍ଧ୍ୟା ବେଳେ ଖାଇପିଇ ଉପରେ ଶୋଇଥିଲେ । ଆଜି ସକାଳେ ତାଙ୍କର ମୃତଦେହ ମିଳିଛି । ଯେହେତୁ ସେ ମୋ ଭାଇ ସେ ସୋସାଇଟିରୁ 3 ଲକ୍ଷ ଟଙ୍କା ଓ ହାତ ଉଧାର କରି 3 ଲକ୍ଷ ଟଙ୍କା ଆଣିଥିବା କହୁଥିଲେ । 25 ତାରିଖ ପରେ ଯେଉଁ ବର୍ଷା ହେଲା ତାପରେ ସେ ବହୁତ ବିବ୍ରତ ହୋଇପଡିଥିଲେ ।’’
ସେହିପରି ସ୍ଥାନୀୟ ସରପଞ୍ଚ ହେମନ୍ତ ଧଳ କହିଛନ୍ତି,‘‘ଧାନ ଚାଷ ପାଇଁ କରିଥିବା କରଜ ଟଙ୍କା ଓ ଧାନ ଅମଳ କରି ବିକ୍ରି କରିବା ପାଇଁ ବେପାରୀଙ୍କ ନିକଟରୁ ଆଣିଥିବା ଟଙ୍କା କେମିତି ସୁଝିବେ ଚିନ୍ତାରେ ଥିଲେ । କରଜ ଆଣିଥିବା ଧାନ ବେପାରୀ ଆସି ଟଙ୍କା ମାଗୁଥିଲେ । ଯାହାକୁ ନେଇ କୈଳାସ ଚିନ୍ତାରେ ଥିଲେ ।"
- ତଦନ୍ତ ପରେ କାର୍ଯ୍ୟାନୁଷ୍ଠାନ: ତହସିଲଦାର
ଏହି ଚାଷୀ ମୃତ୍ୟୁ ଅଭିଯୋଗ ସମ୍ପର୍କରେ ପ୍ରତିକ୍ରିୟା ରଖି ଆଳି ତହସିଲଦାର ଶାନ୍ତି ସ୍ୱରୂପ ମିଶ୍ର କହିଛନ୍ତି," ମୁଁ ଆଜି କୋଳିଡିହ ପଞ୍ଚାୟତରେ ଅଭିଯୋଗ ପାଇଛି । ସକାଳେ ତାଙ୍କ ପରିବାର ଲୋକ ମୋ ପାଖରେ ଆସି ଲିଖିତ ଅଭିଯୋଗ କରିଛନ୍ତି । ମୁଁ, ଆଇଆଇସି ଓ ମେଡିକାଲ ଅଫିସର ସାଙ୍ଗରେ ସକାଳେ ମିଟିିଂ କରିଥିଲି । ଏବେ ମୃତଦେହ ବ୍ୟବଚ୍ଛେଦ ସହ ତଦନ୍ତ ଜାରି ରହିଛି । ରିପୋର୍ଟ ଆସିଲା ପରେ ଆମେ ପରବର୍ତ୍ତୀ ପଦକ୍ଷେପ ନେବୁ ।’’
ଇଟିଭି ଭାରତ, କେନ୍ଦ୍ରାପଡା
