ଭୁବନେଶ୍ୱର:"5ଟି ଯୋଗୁଁ ମଲୁ" ବରିଷ୍ଠ ବିଧାୟକ ଅରୁଣ କୁମାର ସାହୁଙ୍କ ଏହି ମନ୍ତବ୍ୟ ବିଜେଡି ରାଜନୀତିକୁ ସରଗରମ କରିଛି । ପ୍ରତ୍ୟକ୍ଷରେ ନହେଲେ ପରୋକ୍ଷରେ ଅରୁଣଙ୍କ ମନ୍ତବ୍ୟକୁ ମିଳୁଛି ଦଳୀୟ ନେତାଙ୍କ ସମର୍ଥନ । ବହୁ ଚର୍ଚ୍ଚିତ 5ଟିକୁ ଅରୁଣଙ୍କ ମନ୍ତବ୍ୟ ବିଜେଡିରେ ବିଦ୍ରୋହର ପ୍ରତିଧ୍ବନି ସଦୃଶ ହୋଇଛି । ଅବଦମିତ ଭାବେ ଥିବା ବିଜେଡି ନେତାଙ୍କ ସ୍ୱର ଆଗାମୀ ଦିନରେ ଆହୁରି ଅଧିକ ପ୍ରଖର ହେବ ବୋଲି ଆକଳନ କରିଛନ୍ତି ରାଜନୈତିକ ସମୀକ୍ଷକ ।
ବିଜେଡିର ବରିଷ୍ଠ ନେତା ତଥା ବିଧାୟକ ଅରୁଣ ସାହୁଙ୍କ ସ୍ବୀକାରୋକ୍ତି "5ଟି ପାଇଁ ଆମେ ମଲୁ"କୁ ନେଇ ରାଜ୍ୟ ରାଜନୀତି ସରଗରମ । ଏହି ମନ୍ତବ୍ୟ ବିଜେଡିର ଅନ୍ଦର ମହଲରେ ହଇଚଇ ସୃଷ୍ଟି କରିଛି । ବିଜେଡିର ନିର୍ବାଚନୀ ବିପର୍ଯ୍ୟୟର ବଡ଼ କାରଣ 5ଟି ବୋଲି ଅରୁଣ ସ୍ୱୀକାର କରିଛନ୍ତି । ପରାଜୟର କାରଣ କାହାକୁ ଅଛପା ନଥିଲେ ମଧ୍ୟ ନିର୍ବାଚନର 8 ମାସ ପରେ ଅରୁଣ ସର୍ବସାଧାରଣରେ ଏହା ପ୍ରଥମ ଥର ଖୋଲିକି କହିଛନ୍ତି । ବିଜେଡିର କୌଣସି ଆଗଧାଡ଼ିର ନେତା ଏହି କଥା କହିବାକୁ ବା ସ୍ୱୀକାର କରିବାକୁ ଡରୁଥିବା ବେଳେ ଅରୁଣ ଏକଥା ଖୋଲାଖୋଲି କହି ଦେଇଛନ୍ତି । ଏହା ପରେ ବିଜେଡିର ଆଭ୍ୟନ୍ତରୀଣ ରାଜନୀତି ଜୋର ଧରିଛି ।
କେବଳ ଏ କଥା ନୁହେଁ, ନେତାଙ୍କ ମଧ୍ୟରେ ତାଳମେଳ ଅଭାବ ଓ ଗର୍ବ ପାଇଁ ଦଳର ପରାଜୟର କାରଣ ବୋଲି ପୂର୍ବରୁ ଦଳୀୟ ନେତାଙ୍କ ଗହଣରେ ଅରୁଣ କହିଛନ୍ତି । ପରାଜୟ ନେଇ ବାରମ୍ବାର ଅରୁଣଙ୍କ ଏଭଳି ମନ୍ତବ୍ୟର ପ୍ରତିବାଦ ଦଳର କୌଣସି ନେତା ଏଯାଏଁ କରିନାହାନ୍ତି । ପ୍ରତ୍ୟକ୍ଷରେ ନହେଲେ ମଧ୍ୟ ପରୋକ୍ଷରେ ଅରୁଣଙ୍କ ମନ୍ତବ୍ୟ ଠିକ ବୋଲି ବିଜେଡ଼ି ନେତା ବାର୍ତ୍ତା ଦେଇଛନ୍ତି ।
2019 ସାଧାରଣ ନିର୍ବାଚନ ପୂର୍ବରୁ ଏକ ନିର୍ଦ୍ଦିଷ୍ଟ ବୈଦ୍ୟୁତିକ ଗଣମାଧ୍ୟମକୁ ବୟକଟ କରିଥିଲା ବିଜୁ ଜନତା ଦଳ । ସାମ୍ବାଦିକ ସମ୍ମିଳନୀ କରି ଉକ୍ତ ଗଣମାଧ୍ୟମର କୌଣସି କାର୍ଯ୍ୟକ୍ରମରେ ସାମିଲ ନହେବା ଲାଗି ବିଜେଡି ଘୋଷଣା କରିଥିଲା । ସେବେଠାରୁ ବିଜେଡିର କୌଣସି ନେତା ଉକ୍ତ ଗଣମାଧ୍ୟମର କୌଣସି କାର୍ଯ୍ୟକ୍ରମରେ ସାମିଲ ହେଉନଥିଲେ । ଉକ୍ତ ଗଣମାଧ୍ୟମରେ ସାମିଲ ହେବା ନେଇ ଦଳ ପକ୍ଷରୁ ଲାଗିଥିବା ପ୍ରତିବନ୍ଧକ ଉଠି ନାହିଁ । କିନ୍ତୁ ଦୀର୍ଘ 6 ବର୍ଷ ପରେ ଉକ୍ତ ଗଣମାଧ୍ୟମର ଏକ କାର୍ଯ୍ୟକ୍ରମରେ ସାମିଲ ହୋଇଥିଲେ ଅରୁଣ । ଦଳରୁ ନେଇ କିମ୍ବା ନିଜ ଇଚ୍ଛାରେ ଅରୁଣ କାର୍ଯ୍ୟକ୍ରମରେ ସାମିଲ ହୋଇଥିଲେ, ତାହା ଜଣାପଡିନାହିଁ । କିନ୍ତୁ ଜଣେ ବରିଷ୍ଠ ସାମ୍ବାଦିକଙ୍କ ପ୍ରଶ୍ନରେ ଅରୁଣ କହିଥିଲେ, "5ଟି ଖରାପ ଚିନ୍ତାଧାରା ନୁହେଁ । କିନ୍ତୁ ତାହାର କାର୍ଯ୍ୟକାରିତାରେ ଭୁଲ ରହିଗଲା । ଯିଏ କାର୍ଯ୍ୟକାରୀ କଲା, ତାହା ଠିକ ଭାବେ କଲାନାହିଁ । ଆମେ ସରକାରରୁ ଚାଲିଗଲୁ । ବିଜେପି ଉଦ୍ଦେଶ୍ୟରେ ଅରୁଣ କହିଥିଲେ, "ଆମେ ଯେମିତି 5ଟି ପାଇଁ ମଲୁ, ବିଜେପି ସେମିତି ଓଡ଼ିଆ ଅସ୍ମିତା ପାଇଁ ମରିବ ।"
ସାଧାରଣ ନିର୍ବାଚନରେ ପରାଜୟର କାରଣ ଏ ଯାଏ ଦଳ ଖୋଜି ନାହିଁ । ପରାଜୟ କାରଣ ଖୋଜିବା ପାଇଁ କମିଟି ଗଠନ ହେବ ବୋଲି ଦଳର ସମସ୍ତ ବରିଷ୍ଠ ନେତା କହୁଥିଲେ । କିନ୍ତୁ କମିଟି ଗଠନ ହୋଇନାହିଁ କିମ୍ବା ପରାଜୟର ବିଧିବଦ୍ଧ ସମୀକ୍ଷା ହୋଇନାହିଁ । ସଭାପତି ନବୀନ ପଟ୍ଟନାୟକଙ୍କ ପରେ ବିଜେଡିର ମୁଖ୍ୟ ଚେହେରା ହୋଇଥିଲେ ଭି କେ ପାଣ୍ଡିଆନ । ପାଣ୍ଡିଆନଙ୍କୁ ଟାର୍ଗେଟ କରି ବିଜେପି ‘ଓଡ଼ିଆ ଅସ୍ମିତା’ କାର୍ଡ ଖେଳିଥିଲା । ବିଜେପି ଜାତୀୟ ଓ ରାଜ୍ୟ ନେତାଙ୍କ ଶାଣିତ ଆକ୍ରମଣରେ ବିଜେଡି କ୍ଷମତାରୁ ଅପସରି ଗଲା । ଏ କଥାକୁ ବିଜେଡିର କୌଣସି ନେତା ବର୍ତ୍ତମାନ ପର୍ଯ୍ୟନ୍ତ ଅସ୍ବୀକାର କରିନାହାନ୍ତି । ବିଜେଡି ସଭାପତି ନବୀନ ପଟ୍ଟନାୟକଙ୍କୁ ଛାଡି ଦେଲେ ବିଜେଡିର କୌଣସି ନେତା ପାଣ୍ଡିଆନଙ୍କ ସମର୍ଥନ କିମ୍ବା ବିରୋଧ କରିବାକୁ ସାହସ ଜୁଟାଇପାରୁ ନାହାନ୍ତି । କିନ୍ତୁ ବିଜେଡ଼ି ପରାଜୟର ଅନେକ କାରଣ ମଧ୍ୟରୁ ଓଡ଼ିଆ ଅସ୍ମିତା ପ୍ରସଙ୍ଗ ବଡ଼ କାରଣ ବୋଲି ଅନେକ ନେତା ସ୍ବୀକାର କରୁଛନ୍ତି ।