ଷଷ୍ଠ ଦିନରେ ବରଗଡ଼ରେ ନାମାଙ୍କନ ଭରିଲେ ୧୪ ପ୍ରାର୍ଥୀ, ଶୋଭାଯାତ୍ରା କରି ଦେଖାଇଲେ ଶକ୍ତି ପ୍ରଦର୍ଶନ ବରଗଡ଼: ଆସନ୍ତା ମେ ମାସ 20 ତାରିଖରେ ବରଗଡ ଜିଲ୍ଲାରେ ହେବାକୁ ଯାଉଛି ମତଦାନ ପ୍ରକ୍ରିୟା । ଏଥିପାଇଁ ଗତ ୨୬ ଏପ୍ରିଲରୁ ଆରମ୍ଭ ହୋଇଯାଇଛି ନାମାଙ୍କନ ପତ୍ର ଦାଖଲ ପ୍ରକ୍ରିୟା । ଆଜି ନାମାଙ୍କନ ପତ୍ର ଦାଖଲର ଷଷ୍ଠ ଦିନରେ ବିଜେପୁର ବିଧାନସଭା ଆସନ ପାଇଁ ବିଜେଡି ଦଳର ବିଧାୟକ ପ୍ରାର୍ଥିନୀ ରୀତା ସାହୁ ତାଙ୍କର ନାମାଙ୍କନ ପତ୍ର ସ୍ଥାନୀୟ DRDA ହଲ ସ୍ଥିତ CDA ଙ୍କ ଠାରେ ଦାଖଲ କରିଛନ୍ତି | ସେହିପରି ଭଟଲି ବିଧାନସଭା ଆସନ ପାଇଁ ବିଜେପି ଦଳର ପ୍ରାର୍ଥୀ ଇରାଶିଷ ଆଚାର୍ଯ୍ୟ ଅତିରିକ୍ତ ଜିଲ୍ଲାପାଳଙ୍କ ଠାରେ ତାଙ୍କର ନାମାଙ୍କନ ପତ୍ର ଦାଖଲ କରିଛନ୍ତି ।
ଏହା ମଧ୍ୟ ପଢନ୍ତୁ ...ନାମାଙ୍କନ ପତ୍ର ଦାଖଲର 5ମ ଦିନ, ବରଗଡ଼ରେ ପ୍ରାର୍ଥୀପତ୍ର ଦାଖଲ କଲେ 4 ବିଧାୟକ ପ୍ରାର୍ଥୀ - MLA Candidates File Nomination
ଅତାବିରା ବିଧାନସଭା ଆସନ ପାଇଁ କଂଗ୍ରେସ ଦଳର ପ୍ରାର୍ଥୀ ଅଭିଶେଖ ସେଠ ଓ ସ୍ବାଧୀନ ପ୍ରାର୍ଥୀ ଭାବେ ବଲ୍ଲଭ ପାତ୍ର ଏବଂ ଆମ ଆଦମୀ ପାର୍ଟିର ପ୍ରାର୍ଥୀ ଏମ ଡି ଶାହାରୁଖ ଲୋଧିଆ ଭଟଲି ବିଧାନସଭା ଆସନ ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି | ବହୁଜନ ସମାଜ ପାର୍ଟିର ପ୍ରାର୍ଥୀ ଭୁବନ ଭୋସାଗର ଓ ଆମ ଆଦମୀ ପାର୍ଟିର ପ୍ରାର୍ଥୀ ଜୟକ୍ରିଷ୍ଣା ଛୁରିଆ ଅତାବିରା ଆସନ ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି l ବରଗଡ଼ ବିଧାନସଭା ଆସନ ପାଇଁ ନିର୍ବାଚନ ମଇଦାନକୁ ଓହ୍ଲାଇଥିବା ଆମ ଆଦ୍ମୀ ପାର୍ଟିର ପ୍ରାର୍ଥୀ ଡା. ଆଶିଷ ଶତପଥୀ ଆଜି ନାମାଙ୍କନ ପତ୍ର ଦାଖଲ କରିଥିବା ବେଳେ ସ୍ବାଧୀନ ପ୍ରାର୍ଥୀ ଭାବେ ଭକ୍ତ ବିନୋଦ ବାବା ଓ ରାଷ୍ଟ୍ରୀୟ ମାନବ ପାର୍ଟିର ପ୍ରାର୍ଥୀ ମୁକ୍ତା ନାଗ ବରଗଡ଼ ବିଧାନସଭା ଆସନ ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି l ସେହିପରି ବରଗଡ ଲୋକସଭା ଆସନ ପାଇଁ ଆଜି 4 ଜଣ ନାମାଙ୍କନ ପତ୍ର ଦାଖଲ କରିଛନ୍ତି l ବିଜେପି ଦଳର ପ୍ରାର୍ଥୀ ପ୍ରଦୀପ ପୁରୋହିତ ଆଜି ତାଙ୍କର ନାମାଙ୍କନ ପତ୍ର ଜିଲ୍ଲାପାଳଙ୍କ ଠାରେ ଦାଖଲ କରିଥିବାବେଳେ ବିଏସପି ଦଳର ପ୍ରାର୍ଥୀ ଜୟରାମ ବାଘ, ସ୍ବାଧୀନ ପ୍ରାର୍ଥୀ ଭାବେ ପ୍ରଭାତ କୁମାର ଧରୁଆ ଓ ବିଏଚପି ଦଳରୁ କୌଶିକ ସୁନା ବରଗଡ ଲୋକସଭା ଆସନ ପାଇଁ ନାମାଙ୍କନ ପତ୍ର ଦାଖଲ କରିଥିଲେ |
ବିଜେପି, ବିଜେଡି ଓ କଂଗ୍ରେସ ସମସ୍ତ ଦଳର ପ୍ରାର୍ଥୀ ମାନେ ନିଜ ନିଜର ଶକ୍ତି ପ୍ରଦର୍ଶନ କରିଥିଲେ ଯାହାଫଳରେ ବରଗଡ ସହରରେ ବ୍ୟାପକ ଟ୍ରାଫିକ ସମସ୍ୟା ମଧ୍ୟ ଦେଖାଯାଇଥିଲା । ବିଜେଡି ଦଳର ପ୍ରାର୍ଥିନୀ ରୀତା ସାହୁଙ୍କ ବିରାଟ ରାଲିରେ 5000 ରୁ ଅଧିକ ଲୋକ ସାମିଲ ହୋଇଥିବାବେଳେ ବିଜେପି ଦଳର ଉଭୟ ଭଟଲି ବିଧାନସଭା ପ୍ରାର୍ଥୀ ଓ ଲୋକସଭା ପ୍ରାର୍ଥୀଙ୍କ ରାଲିରେ ସମୁଦାୟ 8000 ରୁ ଅଧିକ ଲୋକଙ୍କ ଭିଡ ରହିଥିଲା । ସେହିପରି ଅତାବିରା କଂଗ୍ରେସ ଦଳର ପ୍ରାର୍ଥୀ ମଧ୍ୟ ନିଜର ଶକ୍ତି ପ୍ରଦର୍ଶନ କରିଥିଲେ, ଯେଉଁଥିରେ ପାଖାପାଖି 2000 ଲୋକଙ୍କ ଭିଡ ରହିଥିଲା । ଆମ ଆଦମୀ ପାର୍ଟିର ନିଆରା ରାଲି ରହିଥିଲା ଶତାଧିକ ମହିଳା ଝାଡୁ ଧରି ଜିଲ୍ଲାପାଳଙ୍କ ଅଫିସ ପର୍ଯ୍ୟନ୍ତ ରାସ୍ତାରେ ଝାଡୁ କରି ନିଜ ପ୍ରାର୍ଥୀ ଓ ଦଳର ପ୍ରଚାର କରିବା ସହିତ ପ୍ରାର୍ଥୀପତ୍ର ଦାଖଲ କରିଥିଲେ । ତେବେ ଆଜି ନାମାଙ୍କନ ପତ୍ର ଦାଖଲର ଷଷ୍ଠ ଦିନରେ ସମୁଦାୟ 14 ଜଣ ନାମାଙ୍କନ ପତ୍ର ଦାଖଲ କରିଥିଲେ । ମେ ୩ ତାରିଖ ନାମାଙ୍କନ ଦାଖଲ ପ୍ରକ୍ରିୟାର ଶେଷ ଦିନ ହୋଇଥିବା ବେଳେ ମେ ୬ ସୁଦ୍ଧା ପ୍ରାର୍ଥୀପତ୍ର ପ୍ରତ୍ୟାହାର କରିବାର ତାରିଖ ରହିଛି ।
ଇଟିଭି ଭାରତ, ବରଗଡ଼
