ଖୁବଶୀଘ୍ର ଆସିବ କଂଗ୍ରେସର ପ୍ରଥମ ପ୍ରାର୍ଥୀ ତାଲିକା, ୬୦ ଜଣଙ୍କ ମଧ୍ୟରେ ରାହୁଲ ଓ ପ୍ରିୟଙ୍କା !

Congress to Announce First List for 2024 Election Very Soon : ଖୁବଶୀଘ୍ର ୬୦ ଲୋକସଭା ଆସନରେ ପ୍ରାର୍ଥୀ ଘୋଷଣା କରିବ କଂଗ୍ରେସ । ପ୍ରଥମ ପର୍ଯ୍ୟାୟରେ ଆସିପାରେ ରାହୁଲ ଓ ପ୍ରିୟଙ୍କାଙ୍କ ନାମ । ଦିଲ୍ଲୀରେ ବସିଥିବା ବୈଠକରେ ୫ଟି ରାଜ୍ୟ ଏବଂ ଗୋଟିଏ କେନ୍ଦ୍ର ଶାସିତ ଅଞ୍ଚଳ ପାଇଁ ଆପାତତଃ ପ୍ରାର୍ଥୀ ତାଲିକା ଚୂଡ଼ାନ୍ତ ହୋଇଛି । କେବଳ ଘୋଷଣାକୁ ଅପେକ୍ଷା । ଅଧିକ ପଢନ୍ତୁ

ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ କେନ୍ଦ୍ରରେ ଶାସନରେ ଥିବା ଭାରତୀୟ ଜନତା ପାର୍ଟି ପ୍ରଥମ ତାଲିକାରେ ୧୮ ରାଜ୍ୟରୁ ୧୯୫ ଆସନରେ ପ୍ରାର୍ଥୀ ଘୋଷଣା କରିସାରିଛି । ଏହିକ୍ରମରେ ଗତକାଲି(ଗୁରବାର) ଦିଲ୍ଲୀରେ ମୁଖ୍ୟ ବିରୋଧୀ ଦଳ କଂଗ୍ରେସର କେନ୍ଦ୍ରୀୟ ନିର୍ବାଚନ କମିଟି ବୈଠକ ବସିଥିଲା । ଏଥିରେ ପାର୍ଟି ମୁଖ୍ୟ ମଲ୍ଲିକାର୍ଜୁନ ଖଡଗେ, ଦଳର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ, ରାହୁଲ ଗାନ୍ଧୀ, ମହାସଚିବ ପ୍ରିୟଙ୍କା ଗାନ୍ଧୀ, କେ.ସି ବେଣୁଗୋପାଲଙ୍କ ସମେତ ବହୁ ବରିଷ୍ଠ ନେତା ଉପସ୍ଥିତ ରହିଛନ୍ତି । ଏହି ବୈଠକ ପରେ ଦଳ ୧୦ ରାଜ୍ୟର ୬୦ ଆସନରେ ପ୍ରାର୍ଥୀ ଘୋଷଣା କରିବା ନେଇ ସୂତ୍ରରୁ ସୂଚନା ମିଳିଛି । ପ୍ରଥମ ପର୍ଯ୍ୟାୟ ତାଲିକାରେ ରାହୁଲ-ପ୍ରିୟଙ୍କାଙ୍କ ସମେତ ଅନ୍ୟ କିଛି ବଡ ଚେହେରାଙ୍କୁ ମଧ୍ୟ ଦେଖିବାକୁ ମିଳିବା ନେଇ ଅନୁମାନ କରାଯାଉଛି ।

ଗତକାଲି(ଗୁରବାର) ବୈଠକରେ ଦିଲ୍ଲୀ, ଛତିଶଗଡ, ତେଲେଙ୍ଗାନା, କର୍ଣ୍ଣାଟକ, କେରଳ, ମଣିପୁର, ମେଘାଳୟ, ତ୍ରିପୁରା, ସିକ୍କିମ ଏବଂ ଲକ୍ଷାଦ୍ବୀପର ଲୋକସଭା ଆସନ ସମ୍ପର୍କରେ ଆଲୋଚନା ହୋଇଥିଲା । ପୂର୍ବରୁ ସ୍କ୍ରିନିଂ କମିଟି ଏହି ସବୁ ରାଜ୍ୟର ସମ୍ଭାବିତ ପ୍ରାର୍ଥୀ ତାଲିକା କେନ୍ଦ୍ରୀୟ ନିର୍ବାଚନ କମିଟି ନିକଟରେ ଦାଖଲ କରିସାରିଛି । ସେହି ଆଧାରରେ ଆଜି ବୈଠକରେ ଟିକେଟ ନେଇ ଚୂଡାନ୍ତ ମୋହର ବାଜିପାରେ । ତେବେ ପୂର୍ବରୁ ‘ଇଣ୍ଡିଆ’ ମେଣ୍ଟର କିଛି ସହଯୋଗୀ ପ୍ରାର୍ଥୀ ଘୋଷଣା କରିସାରିଛନ୍ତି । ହେଲେ ମେଣ୍ଟର ନେତୃତ୍ବ ନେଉଥିବା ମୁଖ୍ୟ ବିରୋଧୀ ଦଳ କଂଗ୍ରେସ ଏପର୍ଯ୍ୟନ୍ତ ପ୍ରାର୍ଥୀ ଖାତା ଖୋଲିନି । ଉତ୍ତର ପ୍ରଦେଶରେ ସମାଜବାଦୀ ପାର୍ଟି କଂଗ୍ରେସକୁ ମାତ୍ର ୧୭ ଆସନ ଛାଡିଛି । ସେହିପରି ଦିଲ୍ଲୀରେ ମଧ୍ୟ ଆମ ଆଦମୀ ପାର୍ଟି ମଧ୍ୟ ୪ଟି ଆସନରେ ନିଜେ ଲଢି ଅବଶିଷ୍ଟ ୩ ଆସନ କଂଗ୍ରେସ ଖାତକୁ ଛାଡିଛି । ପଶ୍ଚିମବଙ୍ଗରେ ମମତାଙ୍କ ଦଳ ‘ଟିଏମସି’ ଏକାକୀ ସମସ୍ତ ଆସନରେ ନିର୍ବାଚନ ଲଢିବାକୁ ଯାଉଥିବା ସ୍ପଷ୍ଟ କରିସାରିଛି ।

ଅନ୍ୟ ଏକ ଘଟଣାକ୍ରମ ଅନୁସାରେ, ଗତଥର ପାରମ୍ପରିକ ଆମେଠି ଆସନରେ ରାହୁଲଙ୍କୁ ପରାସ୍ତ କରିଥିବା କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କୁ ଦଳ ପୁଣି ଥରେ ସେହିଠାରୁ ହିଁ ଟିକେଟ ଦେଇଛି । ରାହୁଲ ନିର୍ବାଚନ ଜିତିଥିବା କେରଳର ଓ୍ବାଇନାଡରୁ ମଧ୍ୟ ଇଣ୍ଡିଆ ମେଣ୍ଟର ଅନ୍ୟତମ ବାମ ସହଯୋଗୀ ‘ସିପିଆଇ’ ଜଣେ ବରିଷ୍ଠ ମହିଳା ନେତ୍ରୀଙ୍କୁ ପ୍ରାର୍ଥୀ ଘୋଷଣା କରିସାରିଛି । ରାହୁଲ ୨୦୧୪ ପରି ଏଥର ମଧ୍ୟ ଦୁଇଟି ଆସନ ଭାବେ ଆମେଠି ଓ ଦକ୍ଷିଣ ଭାରତର ଅନ୍ୟ କୌଣସି ସୁରକ୍ଷିତ ଆସନରୁ ଲଢିପାରନ୍ତି ବୋଲି ଚର୍ଚ୍ଚା ହେଉଛି । ଏହି କ୍ରମବିକାଶ ମଧ୍ୟରେ ପ୍ରଥମ ପର୍ଯ୍ୟାୟ ପ୍ରାର୍ଥୀ ଘୋଷଣା ଉପରେ ସମସ୍ତଙ୍କ ନଜର ରହିଛି ।

ବ୍ୟୁରୋ ରିପୋର୍ଟ, ଇଟିଭି ଭାରତ