ପୁରୀ: ବହୁ ଚର୍ଚ୍ଚା ଆଲୋଚନା ଭିତରେ ଶନିବାର ପୁରୀ ଲୋକସଭା ଆସନ ପାଇଁ ନୂଆ ପ୍ରାର୍ଥୀ ଘୋଷଣା କରିଛି କଂଗ୍ରେସ । ସୁଚରିତା ମହାନ୍ତି ଟିକଟ ଫେରାଇବା ପରେ ଏହି ଲୋକସଭା ଆସନ ପାଇଁ କଂଗ୍ରେସ ପ୍ରାର୍ଥୀ ବଦଳାଇଛି । ପୁରୀ ଜିଲ୍ଲା କଂଗ୍ରେସ ସଭାପତି ଜୟ ନାରାୟଣ ପଟ୍ଟନାୟକଙ୍କୁ କଂଗ୍ରେସ ପ୍ରାର୍ଥୀ କରିଛି । ନିର୍ବାଚନ ଲଢ଼ିବାକୁ କଂଗ୍ରେସ ଦଳ ଆର୍ଥିକ ସହାୟତା ନଦେବା ଅଭିଯୋଗରେ ଗତକାଲି ଟିକଟ ଫେରାଇଥିଲେ ସୁଚରିତା । ଏବେ ପ୍ରାର୍ଥୀ ପରିବର୍ତ୍ତନ ପରେ ପାର୍ଟିର ଶୀର୍ଷ ନେତାଙ୍କୁ କୃତଜ୍ଞତା ଜଣାଇଛନ୍ତି ଟିକଟ ପାଇଥିବା ଜୟ ନାରାୟଣ । ଲୋକଙ୍କ ମୌଳିକ ସମସ୍ୟା, ବିଜେଡି ଓ ବିଜେପିର ଭ୍ରଷ୍ଟାଚାର ଓ ଦୁର୍ନୀତି ବିରୋଧରେ ସେ ଲଢେଇ କରିବେ ବୋଲି କହିଛନ୍ତି ।
ଜୟ ନାରାୟଣଙ୍କ ପୂର୍ବରୁ ପୁରୀ ଲୋକସଭା ଆସନରୁ କଂଗ୍ରେସ ସୁଚରିତା ମହାନ୍ତିଙ୍କୁ ପ୍ରାର୍ଥୀ କରିଥିଲା । ହେଲେ ନିର୍ବାଚନ ଲଢ଼ିବାକୁ କଂଗ୍ରେସ ଦଳ ଆର୍ଥିକ ସହାୟତା ନଦେବା, ପୁରୀ ସଂସଦୀୟ କ୍ଷେତ୍ରରେ ଥିବା ବିଧାନସଭା ନିର୍ବାଚନ ମଣ୍ଡଳୀରେ ଦୁର୍ବଳ ପ୍ରାର୍ଥୀ ଦିଆଯିବା ଭଳି ଅଭିଯୋଗ ଆଣି ସୁଚରିତା ମହାନ୍ତି ଗତକାଲି (ଶନିବାର) ଦଳକୁ ଟିକଟ ଫେରାଇ ଦେଇଥିଲେ । ଯାହା ରାଜ୍ୟରେ ବେଶ ଚର୍ଚ୍ଚାର ବିଷୟ ପାଲଟିଥିଲା । ଏହାରି ଭିତରେ ପୁରୀ ଲୋକସଭା ଆସନ ପାଇଁ କଂଗ୍ରେସ ନୂଆ ପ୍ରାର୍ଥୀ ଭାବେ ଜୟ ନାରାୟଣ ପଟ୍ଟନାୟକଙ୍କ ନାଁ ଘୋଷଣା କରିଛି । ଏହାପରେ ଜୟ ନାରାୟଣ ଦଳର ଶୀର୍ଷ ନେତାଙ୍କୁ କୃତଜ୍ଞତା ଜଣାଇଛନ୍ତି । କଂଗ୍ରେସ ଗ୍ୟାରେଣ୍ଟି, ପୁରୀ ଲୋକସଭା ଅଧୀନରେ ଥିବା ବିଧାନସଭା ନିର୍ବାଚନ ମଣ୍ଡଳୀର ମୌଳିକ ସମସ୍ୟା, ବିଜେଡି ଓ ବିଜେପିର ଭ୍ରଷ୍ଟାଚାର ଓ ଦୁର୍ନୀତି ବିରୋଧ ସେ ଲଢେଇ କରିବେ ବୋଲି କହିଛନ୍ତି ।