ନୂଆଦିଲ୍ଲୀ: ସାଧାରଣ ନିର୍ବାଚନ ପୂର୍ବରୁ ବିଜେପିରେ ସାମିଲ ହେବାରେ ଲାଗିଛନ୍ତି ବିଭିନ୍ନ ଦଳର ନେତା । ଆଜି ଏହିକ୍ରମରେ ବହୁଜନ ସମାଜବାଦୀ ପାର୍ଟି (ବିଏସପି) ସାଂସଦ ସଙ୍ଗୀତା ଆଜାଦ ଓ ଦଳର ପୂର୍ବତନ ବିଧାୟକ ଆଜାଦ ଅରି ମର୍ଦ୍ଦନଙ୍କ ସହ ସୁପ୍ରିମକୋର୍ଟର ଚର୍ଚ୍ଚିତ ଆଇନଜୀବୀ ସୀମା ସମୃଦ୍ଧି ମଧ୍ୟ ଭାରତୀୟ ଜନତା ପାର୍ଟିରେ ସାମିଲ ହୋଇଛନ୍ତି । ଦିଲ୍ଲୀ ମୁଖ୍ୟାଳୟରେ ଏମାନେ ବିଧିବଦ୍ଧ ଭାବେ ପଦ୍ମ ଧରିଛନ୍ତି । ଚର୍ଚ୍ଚିତ ଆଇନଜୀବୀ ସୀମା ସମୃଦ୍ଧି ବହୁଚର୍ଚ୍ଚିତ ଦିଲ୍ଲୀ ନିର୍ଭୟା କାଣ୍ଡ ମାମଲାରେ ଲଢି ସମଗ୍ର ଦେଶର ଗଣମାଧ୍ୟମରେ ହେଡଲାଇନରେ ରହିଥିଲେ । ସେ ଆଜି ଶାସକ ଦଳ ସହ ସକ୍ରିୟ ରାଜନୀତିରେ ଏଣ୍ଟ୍ରି ମାରିଛନ୍ତି ।
ଆଜି ମିଶ୍ରଣ ପର୍ବରେ ବିଜେପିର ବରିଷ୍ଠ ନେତା ତଥା ଜାତୀୟ ସାଧାରଣ ସମ୍ପାଦକ ବିନୋଦ ତାଓ୍ବଡେ, ଉତ୍ତର ପ୍ରଦେଶ ଉପମୁଖ୍ୟମନ୍ତ୍ରୀ ବ୍ରିଜେଶ ପାଠକ, ଦଳର ରାଜ୍ୟ ସଭାପତି ଭୁପେନ୍ଦ୍ର ସିଂ ପ୍ରମୁଖ ଉପସ୍ଥିତ ଥିଲେ । ନୂତନ ସଦସ୍ୟଙ୍କୁ ଦଳୀୟ ଉତ୍ତରୀୟ ଓ ପୁଷ୍ପଗୁଚ୍ଛ ସହ ସ୍ବାଗତ କରାଯାଇଥିଲା । ଏମାନଙ୍କ ଅବଦାନକୁ ବିଜେପି ଉଚିତ୍ ସୁଯୋଗ ଦେବ ବୋଲି ଦଳ କହିଛି । ମାୟାବତୀଙ୍କ ନେତୃତ୍ବାଧୀନ ବିଏସପିର ନେତା ବିଜେପିରେ ସାମିଲ ହେବା ଏହା ପ୍ରଥମ ଘଟଣା ନୁହେଁ । ଏହା ପୂର୍ବରୁ ଆମ୍ବେଦକର ନଗରରୁ ଦଳର ସାଂସଦ ଥିବା ରିତେଶ ପାଣ୍ଡେ ମଧ୍ୟ ବିଜେପିରେ ସାମିଲ ହୋଇସାରିଛନ୍ତି । ଦଳର ପ୍ରାଥମିକ ପଦରୁ ଇସ୍ତଫା ଦେବାର କିଛି ଘଣ୍ଟା ମଧ୍ୟରେ ସେ ବିଜେପି ମୁଖ୍ୟାଳୟରେ ପଦ୍ମ ଧରିଥିଲେ ।