ସ୍ୱାସ୍ଥ୍ୟ ଯୋଜନାକୁ ନେଇ ଦ୍ୱନ୍ଦ୍ୱ: ସ୍ପଷ୍ଟ ହେଉନି ଚିତ୍ର, ଅନିଶ୍ଚିତତାରେ ହିତାଧିକାରୀ

‘ଆୟୁଷ୍ମାନ ଭାରତ’ ସହ କେମିତି ମିଶିବ ଗୋପବନ୍ଧୁ ଜନ ଆରୋଗ୍ୟ ଯୋଜନା । ସର୍ତ୍ତାବଳୀରେ ଭିନ୍ନତା ଦୃଷ୍ଟିରୁ ବଢୁଛି ଦ୍ବନ୍ଦ୍ବ । ସରକାରଙ୍କୁ ବିରୋଧୀଙ୍କ ସମାଲୋଚନା ।

ଭୁବନେଶ୍ବର: ନିର୍ବାଚନୀ ପ୍ରତିଶ୍ରୁତି ଅନୁସାରେ ଓଡ଼ିଶାରେ କାର୍ଯ୍ୟକାରୀ ହେବାକୁ ଯାଉଛି କେନ୍ଦ୍ରୀୟ ସ୍ବାସ୍ଥ୍ୟ ବୀମା ଯୋଜନା ‘ଆୟୁଷ୍ମାନ ଭାରତ’ । ଏନେଇ କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ବୁଝାମଣାପତ୍ର ସ୍ୱାକ୍ଷର ହୋଇସାରିଲାଣି । କିନ୍ତୁ ବିଜେଡି ସରକାରଙ୍କ ‘ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା’(BSKY) ଛାୟାରୁ ମୁକ୍ତ ହୋଇ ‘ଆୟୁଷ୍ମାନ ଭାରତ’କୁ ଲାଗୁ କରିବା ବିଜେପି ସରକାରଙ୍କ ପାଇଁ କାଠିକର ପାଠ ହୋଇଛି । ‘ବିଏସକେୱାଇ’ର ନାଁ ପରିବର୍ତ୍ତନ କରି ସେହି ଢାଞ୍ଚାରେ ‘ଗୋପବନ୍ଧୁ ଜନ ଆରୋଗ୍ୟ ଯୋଜନା’ ବା (GJAY) କାର୍ଯ୍ୟକାରୀ କରିବାକୁ ମୋହନ ସରକାର ନିଷ୍ପତ୍ତି ନେଇଛନ୍ତି । ଏବେ ‘GJAY’କୁ ‘ଆୟୁଷ୍ମାନ’ ସହ ମିଶ୍ରଣ କରିବା ନୂଆ ସରକାରଙ୍କ ପାଇଁ ଆହ୍ୱାନ ପାଲଟିଛି । ସ୍ପଷ୍ଟ ଚିତ୍ର ମିଳୁନଥିବାରୁ ହିତାଧିକାରୀ ଅନିଶ୍ଚିତତାରେ ଥିବା ବେଳେ ସରକାରଙ୍କୁ ଘେରିଛନ୍ତି ବିରୋଧୀ ।

• ଉଭୟ ଯୋଜନାର କାର୍ଯ୍ୟକାରିତାକୁ ନେଇ ଦ୍ବନ୍ଦ୍ବ

ସ୍ୱାସ୍ଥ୍ୟ କଲ୍ୟାଣ ଯୋଜନା ନେଇ କେନ୍ଦ୍ର ଓ ଓଡିଶା ସରକାରଙ୍କ ମଧ୍ୟରେ ବୁଝାମଣାପତ୍ର ସ୍ୱାକ୍ଷରିତ ହୋଇଛି । ଆସନ୍ତା ମାର୍ଚ୍ଚ ମାସ ସୁଦ୍ଧା ଓଡିଶାରେ ବିଧିବଦ୍ଧ ଭାବେ ‘ଆୟୁଷ୍ମାନ’ କାର୍ଯ୍ୟକ୍ଷମ ହେବ ବୋଲି ମୁଖ୍ୟମନ୍ତ୍ରୀ ଓ ରାଜ୍ୟ ସ୍ୱାସ୍ଥ୍ୟମନ୍ତ୍ରୀ କହିଛନ୍ତି । ଓଡିଶାରେ ଆୟୁଷ୍ମାନ ଭାରତ ଓ ‘ଗୋପବନ୍ଧୁ ଜନ ଆରୋଗ୍ୟ ଯୋଜନା’କୁ ସମ୍ମିଶ୍ରଣ କରି ଏକ ସମୟରେ କାର୍ଯ୍ୟକାରୀ କରାଯିବ ବୋଲି ସରକାର କହୁଛନ୍ତି । ଉଭୟ ଯୋଜନାର କାର୍ଯ୍ୟକାରିତା ଭିନ୍ନ ହୋଇଥିବାରୁ ଦୁଇଟି ଯୋଜନାରୁ ହିତାଧିକାରୀ କିଭଳି ଉପକୃତ ହେବେ, ତାକୁ ନେଇ ଦ୍ୱନ୍ଦ୍ୱରେ ପଡିଛନ୍ତି । ଆୟୁଷ୍ମାନ ଭାରତର ସର୍ତ୍ତାବଳୀ ସମଗ୍ର ଦେଶ ପାଇଁ ଗୋଟିଏ । ଆୟୁଷ୍ମାନ ଜରିଆରେ ଓଡିଶାର ହିତାଧିକାରୀ କିଭଳି ଅଧିକ ଲାଭ ପାଇବେ, ତାହାକୁ ନେଇ ସନ୍ଦେହ ରହିଛି ।

ରାଜ୍ୟର 1.03 କୋଟି ହିତାଧିକାର ପରିବାର ମଧ୍ୟରୁ 68.8 ଲକ୍ଷ ପରିବାର ଆୟୁଷ୍ମାନ ଭାରତ ଯୋଜନାରେ ଉପକୃତ ହେବେ ବୋଲି କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଛି । ତାହା ହିଁ ଅଧିକ ଦ୍ୱନ୍ଦ୍ୱ ସୃଷ୍ଟି କରିଛି । ଯଦି ଏହି ପରିବାରଗୁଡ଼ିକ ଆୟୁଷ୍ମାନ ଭାରତରେ ଉପକୃତ ହେବେ, ତେବେ ‘ବିଏସକେୱାଇ’ରେ ପୂର୍ବରୁ ଲାଭାନ୍ୱିତ ହେଉଥିବା 99.09 ଲକ୍ଷ ପରିବାର ମଧ୍ୟରୁ ରାଜ୍ୟ ସରକାରଙ୍କ ପରିବର୍ତ୍ତିତ ‘ଜିଜେଏୱାଇ’ରେ କ’ଣ ମାତ୍ର 35 ଲକ୍ଷ ହିତାଧିକାରୀ ପରିବାର ଉପକୃତ ହେବେ କି ବୋଲି ପ୍ରଶ୍ନ ଉଠିଛି । ନିର୍ବାଚନ ପ୍ରଚାରରେ ଆୟୁଷ୍ମାନକୁ ବିଜେଡି ସରକାରଙ୍କ ‘ବିଏସକେୱାଇ’ଠୁ ଉତ୍ତମ ସ୍ୱାସ୍ଥ୍ୟ ସେବା ଯୋଜନା ବୋଲି ବିଜେପି କହିଥିଲା । କ୍ଷମତାକୁ ଆସିଲେ ଓଡ଼ିଶାରେ ଆୟୁଷ୍ମାନ ଭାରତ କାର୍ଯ୍ୟକାରୀ କରିବାକୁ ବିଜେପି ଘୋଷଣା କରିଥିଲା ।

• କଣ ରହିଛି ଉଭୟ ଯୋଜନା ମଧ୍ୟରେ ସର୍ତ୍ତାବଳୀରେ ଭିନ୍ନତା

‘ବିଏସକେୱାଇ’ରେ ଲୋକେ ଯେପରି ସହଜ ଓ ସୁବିଧାରେ ମାଗଣା ସ୍ୱାସ୍ଥ୍ୟ ସେବା ପାଉଥିଲେ, ଆୟୁଷ୍ମାନରେ ସେପରି ବ୍ୟବସ୍ଥା ନଥିବା ଉପଲବ୍ଧି କରି ନୂଆ ସରକାର ଯୋଜନାର ନାଁ ପରିବର୍ତ୍ତନ କରି ‘ଜିଜେଏୱାଇ’ ନାଁ'ରେ ପ୍ରଚଳନ କରିବାକୁ ନିଷ୍ପତ୍ତି ନେଇଛନ୍ତି ବୋଲି ଚର୍ଚ୍ଚା ହୋଇଥିଲା । ସାରା ଦେଶରେ ‘ଆୟୁଷ୍ମାନ ଭାରତ’ ଲାଗୁ ହୋଇଥିବା ବେଳେ ଓଡିଶାରେ ଦୁଇଟି ଯୋଜନାର ମିଶ୍ରଣ କରିବା ନୂଆ ସରକାରଙ୍କ ପାଇଁ ଅଡ଼ୁଆ ପରିସ୍ଥିତି ସୃଷ୍ଟି କରିଛି । ‘ବିଏସକେୱାଇ’ରେ ପୁରୁଷଙ୍କ ପାଇଁ ବାର୍ଷିକ 5 ଲକ୍ଷ ଚିକିତ୍ସା ଖର୍ଚ୍ଚ ଥିଲା । ମହିଳାଙ୍କୁ 10 ଲକ୍ଷ ପର୍ଯ୍ୟନ୍ତ ଚିକିତ୍ସା ସୁବିଧା ମିଳୁଥିଲା । ଆୟୁଷ୍ମାନରେ ସର୍ବାଧିକ ଚିକିତ୍ସା ରାଶି 5 ଲକ୍ଷ ଅଛି । କିନ୍ତୁ ମହିଳାଙ୍କ ପାଇଁ ଅଧିକ ଚିକିତ୍ସା ବ୍ୟବସ୍ଥା ନାହିଁ । ଯୋଜନା ଦ୍ୱୟ ମିଶ୍ରଣ ପାଇଁ ସରକାର ନିଷ୍ପତ୍ତି ନେଇଛନ୍ତି । ମାର୍ଚ୍ଚ ମାସ ପର୍ଯ୍ୟନ୍ତ ଗୋପବନ୍ଧୁ ଜନ ଆରୋଗ୍ୟ ଯୋଜନା ବଳବତ୍ତର ରହିବ । ଆୟୁଷ୍ମାନ ଭାରତ ଲାଗୁ ହେବା ପରେ ଯୁଗ୍ମ ସ୍ୱାସ୍ଥ୍ୟ ଯୋଜନା ପରିଚାଳିତ ହେବ ।

ଏହା ମଧ୍ୟ ପଢନ୍ତୁ:-

ଆୟୁଷ୍ମାନ ଭାରତ କାର୍ଯ୍ୟକାରୀ ହେଲେ ମହିଳା ହିତାଧିକାରୀଙ୍କ ଚିକିତ୍ସା ବାବଦରେ 5 ଲକ୍ଷରୁ ଅଧିକ ଖର୍ଚ୍ଚ ହେଲେ ସମ୍ପୃକ୍ତ ଘରୋଇ ହସ୍ପିଟାଲକୁ ଅର୍ଥ ଭରଣା କିପରି ମିଳିବ ସେନେଇ ସ୍ପଷ୍ଟ ସୂଚନା ମିଳିନାହିଁ । ଗୋପବନ୍ଧୁ ଜନ ଆରୋଗ୍ୟ ଯୋଜନାରେ ସାଢେ଼ 3 କୋଟି ହିତାଧିକାରୀ ଥିବା ବେଳେ ଆୟୁଷ୍ମାନ ଭାରତରେ ମଧ୍ୟ ସାଢେ଼ 3 କୋଟି ହିତାଧିକାରୀ ସାମିଲ ହେବେ ବୋଲି ସ୍ପଷ୍ଟ କରିଛନ୍ତି । ତେଣୁ ଗୋପବନ୍ଧୁ ଜନ ଆରୋଗ୍ୟ ଯୋଜନାରୁ ବାହାରେ ଥିବା ଲୋକ ଆୟୁଷ୍ମାନ ଭାରତରେ ସାମିଲ ହୋଇ ନ ପାରିବା ସ୍ପଷ୍ଟ ହୋଇଛି । ଆୟୁଷ୍ମାନ ଭାରତରେ ରାଜ୍ୟର 23 ଲକ୍ଷରୁ ଅଧିକ ବରିଷ୍ଠ ନାଗରିକ ସାମିଲ କରାଯିବାକୁ ସରକାର ଘୋଷଣା କରିଛନ୍ତି । ତେଣୁ ହିତାଧିକାରୀଙ୍କ ସଂଖ୍ୟା ଅନ୍ୟୂନ 3.73 କୋଟିରେ ପହଞ୍ଚିବ । ମାତ୍ର ବିଭାଗୀୟ ମନ୍ତ୍ରୀ 3 କୋଟି ଲୋକଙ୍କୁ ସ୍ୱାସ୍ଥ୍ୟ କାର୍ଡ ଦିଆଯିବ ବୋଲି କହିବା ହିତାଧିକାରୀଙ୍କୁ ଦ୍ବନ୍ଦ୍ୱରେ ପକାଇଛି ।

• କେନ୍ଦ୍ର ସହ ଚୁକ୍ତିନାମା ପରେ କଣ କହିଥିଲେ ମୁଖ୍ୟମନ୍ତ୍ରୀ

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି, "ଆୟୁଷ୍ମାନ ଭାରତ ଯୋଜନା ରାଜ୍ୟର ଲାଗୁ କରିବା ଲାଗି କେନ୍ଦ୍ର ସରକାରଙ୍କ ସହ ଓଡିଶା ସରକାର ଚୁକ୍ତି କରିଛନ୍ତି । 2018 ମସିହାରୁ ଓଡିଶା ବାସୀ ଏ ସୁବିଧାରୁ ବଞ୍ଚିତ ହେଉଥିଲେ । ପୂର୍ବ ସରକାର ହୀନମନ୍ୟତା କାରଣରୁ ଏହି ଯୋଜନାକୁ ଲାଗୁ କରୁନଥିଲେ । ଆମ ସରକାର ଏହାକୁ ଲାଗୁ କରିଛନ୍ତି । 1 କୋଟି 3 ଲକ୍ଷ ଲୋକ ସାହାଯ୍ୟ ପାଇବେ । ଦେଶର ବିଭିନ୍ନ ଜାଗାରେ 30 ହଜାର ହସ୍ପିଟାଲରେ ଚିକିତ୍ସା ପାଇପାରିବେ । ରାଜ୍ୟ ବାହାରେ ରହୁଥିବା ଓଡିଆ ଲୋକ ଏହାର ସୁବିଧା ପାଇପାରିବେ । 70 ବର୍ଷରୁ ଅଧିକ ପ୍ରାୟ 23 ଲକ୍ଷ ବୟସ୍କ ଲୋକଙ୍କୁ ମଧ୍ୟ ଏହାର ସୁବିଧା ମିଳିବ । ପ୍ରତି ପଂଚାୟତରେ ଆୟୁଷ୍ମାନ ଆରୋଗ୍ୟ ମନ୍ଦିର କାର୍ଯ୍ୟକାରୀ କରିବାକୁ ଯାଉଛୁ । ପ୍ରତି ପଂଚାୟତରେ ଏଏନଏମ୍, ଯୋଗ ଶିକ୍ଷକ, ସ୍ବାସ୍ଥ୍ୟ କର୍ମୀ ରହିବେ ।"

• ସରକାରଙ୍କୁ ବିରୋଧୀଙ୍କ ଟାର୍ଗେଟ:-

ବିଜେଡି ନେତା ପ୍ରଶାନ୍ତ ମୁଦୁଲି କହିଛନ୍ତି, "ସାରା ଦେଶର ସ୍ୱାସ୍ଥ୍ୟ କଲ୍ୟାଣ ଯୋଜନା ଭିତରେ ବିଜୁ ସ୍ଵାସ୍ଥ୍ୟ କଲ୍ୟାଣ ଯୋଜନା ଲାଟେଷ୍ଟ । ସାଧାରଣ ଜନସାଧାରଣ ଏହି ଯୋଜନାରେ ଉପକୃତ ହେଉଥିଲେ । ଯେଉଁମାନଙ୍କ ପାଖରେ ଏହି କାର୍ଡ ଥିଲା, ସେ ଏହାର ଉପକାରିତା ଜାଣିଥିଲା । ପ୍ରଚାର ପ୍ରସାର ଲାଗି ବିଜେପି ସରକାର ଆୟୁସ୍ମନ ଭାରତ ଯୋଜନା ଲାଗୁ କରୁଛନ୍ତି । ଏଥିରେ ଓଡ଼ିଶାର ଯୋଜନାକୁ ମିଶେଇ ଗୋଟିଏ କାର୍ଡ ବ୍ୟବସ୍ଥା କରୁଛନ୍ତି ବୋଲି କହୁଛନ୍ତି । ଏହାର କାର୍ଯ୍ୟକାରିତା କଣ ରହିବ ଆଗାମୀ ସମୟ କହିବ । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ଓଡିଶାର ଲୋକ ଯେଉଁ ସୁବିଧା ପାଇଥିଲେ, ସେଥିରେ ଯେମିତି ତୃଟି ବିଚ୍ୟୁତି ନହେଉ । ସାଧାରଣ ଲୋକ ହନ୍ତସନ୍ତ ନହୁଅନ୍ତୁ ।"

ଇଟିଭି ଭାରତ, ଭୁବନେଶ୍ବର