ଭୁବନେଶ୍ବର:ରାଜ୍ୟରେ ନୂଆ ସରକାର ଆସିଛି, ହେଲେ ଦରଦାମ୍ ନିୟନ୍ତ୍ରଣରେ ବିଫଳ ହୋଇଛନ୍ତି ! ଅତ୍ୟାବଶ୍ୟକୀୟ ସାମଗ୍ରୀ ଦିନକୁ ବୃଦ୍ଧି ପାଇବାରେ ଲାଗିଛି । ପନିପରିବା ଠାରୁ ଆରମ୍ଭ କରି ଡାଲି ଚାଉଳ ପର୍ଯ୍ୟନ୍ତ ସବୁ ଦର ଆକାଶଛୁଆଁ । କେବେ ସରକାର ଏଥିପ୍ରତି ଧ୍ୟାନ ଦେବେ ବୋଲି ବିଧାନସଭାରେ ବିରୋଧୀ ପ୍ରଶ୍ନ କରିଛନ୍ତି । ସେପଟେ ରାଜ୍ୟ ସରକାର ଜନସାଧାରଣଙ୍କ ମୌଳିକ ଆବଶ୍ୟକତାକୁ ଅଗ୍ରାଧିକାର ଭିର୍ତ୍ତିରେ ଗୁରୁତ୍ବ ଦେଇ ନିଷ୍ପତ୍ତି ନେଉଥିବା କହିଛନ୍ତି ବିଜେପି ବିଧାୟକ ଅମର କୁମାର ନାୟକ ।
ବଜାରରେ ଆଳୁ ଚଡ଼କ:
ବଜାରକୁ ଆବଶ୍ୟକ ମାତ୍ରାରେ ଆଳୁ ନ ଆସିବା ଯୋଗୁଁ ଓଡିଶା ବଜାରରେ ଏହାର ପ୍ରଭାବ ବହୁଳ ଭାବରେ ଦେଖିବାକୁ ମିଳିଛି । ସାରା ରାଜ୍ୟରେ ଆଳୁର ଦର କିଲୋ ପିଛା ୪୦ରୁ ୫୦ ଟଙ୍କାକୁ ବଢି ଯାଇଛି । ଯଦିଓ ସରକାର କହୁଛନ୍ତି ୭ ଦିନ ପାଇଁ ଆଳୁ ଗଚ୍ଛିତ ଅଛି, ହେଲେ ସବୁଠି ସ୍ଥିତି ସଙ୍ଗୀନ । କାହିଁକି ନା ଯେଉଁଠି ଦିନକୁ ୬ରୁ ୭ ଆଳୁ ବୋଝେଇ ଗାଡି ଲାଗୁଥିଲା ଆଜି ସେଠି ଜମାଗାଡି ନାହିଁ । ତେଣୁ ବ୍ୟବସାୟୀ ବି କହୁଛନ୍ତି ସେମାନେ ୪୦ରେ କିଣୁଛନ୍ତି । ଯେଉଁଥିପାଇଁ ୪୫ରୁ ଅଧିକ ଦାମରେ ବିକିବାକୁ ସେମାନେ ବାଧ୍ୟ ହେଉଛନ୍ତି ।
ଆକ୍ସନ ମୋଡରେ ରାଜ୍ୟ ସରକାର:
ଅନ୍ୟପଟେ ଆଳୁ ମୂଲ୍ୟ ବୃଦ୍ଧି ପରେ ଆକ୍ସନ ମୋଡରେ ଆସିଥିବା ରାଜ୍ୟ ସରକାର ଗୋଦାମରେ ଚଢଉ କରିବା ସହ କାର୍ଯ୍ୟାନୁଷ୍ଠାନର ଚେତାବନୀ ଦେଇଛନ୍ତି । ଏହାସହ ଉତ୍ତରପ୍ରଦେଶରୁ ଆଳୁ ଆଣିବାକୁ ଯୋଜନା ଥିବା କହିଛନ୍ତି ଖାଦ୍ୟ ଯୋଗାଣ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର । ଖୁଚୁରା ବ୍ୟବସାୟୀ ସର୍ବାଧିକ ୩୨ ଟଙ୍କାରେ ବିକ୍ରି କରିବେ । ଏହାଠାରୁ ଅଧିକ ଦରରେ ବିକ୍ରି କଲେ ସିଧାସଳଖ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ ଖାଉଟି ମନ୍ତ୍ରୀ । ସେପଟେ ପଶ୍ଚିମବଙ୍ଗ ସରକାରଙ୍କ ସହିତ ଓଡିଶା ମୁଖ୍ୟମନ୍ତ୍ରୀଙ୍କ ଆଲୋଚନା ପରେ କିଛି ଆଳୁ ଗାଡି ଓଡିଶାକୁ ଆସିଥିବା ଜଣାପଡ଼ିଛି ।