ସମ୍ବଲପୁର: ଧାନ ସଂଗ୍ରହ ପ୍ରକ୍ରିୟାକୁ ନେଇ ଜୋର ଧରିଲା ରାଜନୀତି । ସମ୍ବଲପୁର ଜିଲ୍ଲା ସ୍ତରୀୟ କୃଷି ଯନ୍ତ୍ରପାତି ମେଳାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଧାନ ସଂଗ୍ରହ ଠିକଠାକ ଚାଲିଛି କହିବା ସହ ପୂର୍ବ ସରକାରଙ୍କ ଯୋଗୁଁ ମଣ୍ଡି ଗୁଡିକରେ ଅବ୍ୟବସ୍ଥା ଥିବା କଥା କହିଥିଲେ । କେନ୍ଦ୍ରମନ୍ତ୍ରୀଙ୍କ ବୟାନକୁ ନେଇ ବିଜେପିକୁ ଟାର୍ଗେଟ କରିଛନ୍ତି ରେଢ଼ାଖୋଲର ପୂର୍ବତନ ବିଧାୟକ ତଥା ସମ୍ବଲପୁର ଜିଲ୍ଲା ବିଜେଡି ସଭାପତି ରୋହିତ ପୂଜାରୀ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ଦେଇଥିବା ଧାନ କିଣା ସମ୍ପର୍କିତ ସୂଚନାକୁ ସମ୍ପୂର୍ଣ୍ଣ ମିଥ୍ୟା ବୋଲି କହିବା ସହ ଏବେ ବି ଜିଲ୍ଲାର ବିଭିନ୍ନ ସ୍ଥାନରେ ଧାନ ସଂଗ୍ରହରେ ଅବ୍ୟବସ୍ଥା ରହିଛି ଓ କ୍ୱିଣ୍ଟାଲ ପ୍ରତି 5 କିଲୋ ଧାନ କଟନୀ ଛଟନୀ କରାଯାଉଛି ବୋଲି କହିଛନ୍ତି ରୋହିତ । ଏହା ସହ ବିଜେପି ପୂର୍ବରୁ ଦେଇଥିବା ସବୁ ପ୍ରତିଶୃତି ଯେମିତି ମିଛ ଥିଲା ବ୍ୟବସ୍ଥିତ ଧାନ କ୍ରୟ ମଧ୍ୟ ମିଥ୍ୟା ବୋଲି କହିଛନ୍ତି ରୋହିତ ପୂଜାରୀ ।
ମଣ୍ଡି ଅବ୍ୟସ୍ଥାକୁ ଧର୍ମେନ୍ଦ୍ରଙ୍କ ସ୍ବିକାର:
ସମ୍ବଲପୁର ପିଏଚଡ଼ି ପଡିଆରେ ଅନୁଷ୍ଠିତ କୃଷି ଯନ୍ତ୍ରପାତି ମେଳାରେ ଯୋଗଦେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ, "ଏଥର ଚାଷୀଙ୍କ ଠାରୁ କ୍ୱିଣ୍ଟାଲ ପ୍ରତି 3100 ଟଙ୍କାରେ ଧାନ କିଣାଯିବାର ବ୍ୟବସ୍ଥା ହୋଇଛି । ଖରିଫ ଋତୁରେ ସମ୍ବଲପୁର ଜିଲ୍ଲାରେ 30 ଲକ୍ଷ କ୍ୱିଣ୍ଟାଲ ଧାନ କିଣାଯିବାକୁ ଧାର୍ଯ୍ୟ ହୋଇଛି । ବର୍ତ୍ତମାନ ସୁଦ୍ଧା 16 ଲକ୍ଷ ମେଟ୍ରିକ ଟନ କିଣା ସରିଛି l ଆଗାମୀ ମାସେ ଭିତରେ ବାକି ସବୁ ଧାନ କିଣା ଯିବାର ଲକ୍ଷ୍ୟ ପୁରା ହୋଇଯିବ । ଧାନ କ୍ରୟ କିପରି ସୁରୁଖୁରୁରେ ହେବ ଜିଲ୍ଲା ପ୍ରଶାସନ, ମନ୍ତ୍ରୀ, ରାଜ୍ୟ ନେତୃତ୍ୱ ଏହା ଉପରେ ନଜର ରଖିଛନ୍ତି । କିଛି ସମସ୍ୟା ଆମ କାନକୁ ଆସୁଛି l ସ୍ଥାନୀୟ ବିଧାୟକ ଜୟ ନାରାୟଣ ମିଶ୍ର, କୁଚିଣ୍ଡା ବିଧାୟକ ତଥା ମନ୍ତ୍ରୀ ରବି ନାୟକ ଏହା ଉପରେ ହସ୍ତକ୍ଷେପ କରୁଛନ୍ତି l ଆଗାମୀ ଦିନରେ ମଣ୍ଡିର ବ୍ୟବସ୍ଥାକୁ ଆହୁରି ବ୍ୟବସ୍ଥିତ କରାଯିବ l"
ଏହା ମଧ୍ୟ ପଢ଼ନ୍ତୁ...‘BJP ମିଛ କହି କ୍ଷମତାକୁ ଆସିଛି’: ନବୀନଙ୍କ ମନ୍ତବ୍ୟକୁ ଧର୍ମେନ୍ଦ୍ରଙ୍କ କାଉଣ୍ଟର ଏହା ମଧ୍ୟ ପଢ଼ନ୍ତୁ...ବାଜପେୟୀଙ୍କ ପ୍ରତିମୂର୍ତ୍ତି ଉନ୍ମୋଚନ କଲେ ମୁଖ୍ୟମନ୍ତ୍ରୀ ଏହା ମଧ୍ୟ ପଢ଼ନ୍ତୁ...ପାରାଦ୍ୱୀପ ପୂର୍ବ ଭାରତର ବିକାଶର ଦ୍ୱାର ପାଲଟିବ : ଧର୍ମେନ୍ଦ୍ର ପ୍ରଧାନ |
ତେବେ ମଣ୍ଡିରେ ଥିବା ଅବ୍ୟବସ୍ଥାକୁ ଧର୍ମେନ୍ଦ୍ର ସ୍ୱୀକାର କରି କହିଥିଲେ, "ମଣ୍ଡିକୁ ଧାନ ଯାଉନାହିଁ, ମଣ୍ଡିରେ କେବଳ ଛୁଆଁ ହୋଇକି ଧାନ ମିଲକୁ ଯାଉଛି ଏଟା ସତ କଥା, ତାକୁ ମୁଁ ସ୍ୱୀକାର କରୁଛି l ବାହାଘର ବେଳେ ତ ଆମେ ବାଇଗଣ ରୋଇ ପାରି ନଥାନ୍ତୁ l ଆମ ଦାୟିତ୍ୱ ତ ଏବେ ଏବେ ଆସିଛି l ଆମେ ଆସିଲୁ ଜୁନ ମାସରେ ଧାନ କିଣିବାକୁ ପଡିଲା ନଭେମ୍ବର ମାସରେ l ତେଣୁ ଆମେ ପଲିସି ବନେଇଲୁ, ବ୍ୟାଙ୍କ ଖାତା ଖୋଲେଇଲୁ l ବ୍ୟାଙ୍କରେ ଯୋଡିବାର ବ୍ୟବସ୍ଥା କରେଇବାରେ ଜୋର ଦେଲୁ l ଯେତିକି ପଇସା ଆମେ ଦେବୁ ବ୍ୟାଙ୍କ ଖାତାରେ ଯିବ, ମଧ୍ୟସ୍ଥିମାନଙ୍କ ପାଖକୁ ନଯାଉ, ଏକଥା ଆମେ ଯୋଜନା କଲୁ l"
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଏହି ପ୍ରତିକ୍ରିୟାକୁ ନେଇ ସମ୍ବଲପୁର ଜିଲ୍ଲା ବିଜେଡି ସଭାପତି ରୋହିତ ପୂଜାରୀ, ଧର୍ମେନ୍ଦ୍ର ଓ ବିଜେପିକୁ ଟାର୍ଗେଟ କରି କହିଛନ୍ତି, "ବିଜେପି ଦଳ ଯେଉଁ ବି ପ୍ରତିଶୃତି ଦେଇଛନ୍ତି ସବୁଥିରେ ଠକିଛନ୍ତି l ସୁଭଦ୍ରା ଯୋଜନାରେ କହିଥିଲେ 50 ହଜାର ଟଙ୍କା ପ୍ରତି ବର୍ଷ ଦେବୁ, ହେଲେ ଦେଲେ ନାହିଁ । ସ୍ୱାମୀନାଥନ ରିପୋର୍ଟକୁ ଲାଗୁ କରିବୁ ବୋଲି କହିଥିଲେ, କଟନୀ ଛଟନୀ ହେବନି ବୋଲି କହିଥିଲେ, କିନ୍ତୁ ସବୁଆଡେ 5 କେଜି ଲେଖାଏଁ କଟନୀଛଟନୀ ହେଉଛି l 300 ୟୁନିଟ ବିଜୁଳୀ ଫ୍ରି କରିବୁ ବୋଲି କହିଥିଲେ, ତାକୁ ବି କଲେନାହିଁ l ହାଇକୋର୍ଟ ବେଞ୍ଚ ସ୍ଥାପନା କରିବୁ ବୋଲି କହିଥିଲେ । ମହାନଦୀ ଉପର ମୁଣ୍ଡରେ ଯେଉଁ ସବୁ ବ୍ୟାରେଜ ହୋଇଛି ସେଗୁଡ଼କୁ କାହିଁକି ଭାଙ୍ଗୁ ନାହାଁନ୍ତି l ସମ୍ବଲପୁର ବିଶ୍ଵବିଦ୍ୟାଳୟକୁ ସେଣ୍ଟ୍ରାଲ ୟୁନିଭର୍ସିଟି ଷ୍ଟାଟସ, VSSUT ବୁର୍ଲାକୁ IIT ଷ୍ଟାଟସ ଦିଆଯାଉ l କିଛି କାମ ହେଉନି କେଵଳ ଗପ ଚାଲିଛି l ବର୍ତ୍ତମାନ ତାଙ୍କ ସରକାରଙ୍କୁ 6 ମାସ ହୋଇଗଲା କିନ୍ତୁ କୌଣସି ଭୁଲ ହୋଇଗଲେ ନବୀନ ସରକାରଙ୍କୁ ଦାୟୀ କରୁଛନ୍ତି l ଏଭଳି ମିଛ କଥା କହି ଲୋକଙ୍କୁ ଭୁଆଁ ବୁଲଉଛନ୍ତି l ଏହିଭଳି ସବୁ ସମସ୍ୟାକୁ ନେଇ ଆସନ୍ତା ଜାନୁଆରୀ 16 ତାରିଖରେ ପ୍ରମୁଖ ବିରୋଧୀ ଦଳ ଭାବେ ସମ୍ବଲପୁର ଜିଲ୍ଲପାଳଙ୍କ କାର୍ଯ୍ୟାଳୟକୁ ଘେରାଉ କରାଯିବ ।"
ଇଟିଭି ଭାରତ, ସମ୍ବଲପୁର
