ପୁରୀ:ମହାପ୍ରଭୁଙ୍କୁ ଦର୍ଶନ କରିଛନ୍ତି ବିଜେପି ନେତା ପ୍ରଶାନ୍ତ ଜଗଦେଗ । ତେବେ ଜଗନ୍ନାଥ ଦର୍ଶନ ପରେ ସେ ବିସ୍ଫୋରକ ବୟାନ ଦେଇଛନ୍ତି । ପ୍ରଶାନ୍ତ କହିଛନ୍ତି ଯେ ବିଜେପିକୁ ଲୋକସଭା ଆସନରେ ଜିତାଇବା ପାଇଁ ବିଜେଡି ଡିଲ୍ କରିଛି । ଅନେକ ସ୍ଥାନରେ ବିଜେଡି ବିଜେପି ବିପକ୍ଷରେ ଦୁର୍ବଳ ପ୍ରାର୍ଥୀ ଦେଇଛି । ଯାହାର ଉଦାହରଣ ସମ୍ବଲପୁର ଲୋକସଭା ଆସନ। ବିଜେଡି ପ୍ରଣବ ପ୍ରକାଶ ଦାସଙ୍କୁ ପ୍ରାର୍ଥୀ କରିଥିବା ବେଳେ ବିଜେଡି ତାଙ୍କୁ ପ୍ରାର୍ଥୀ କରି ବଳି ପକାଇଛି ବୋଲି କହିଛନ୍ତି ଜଗଦେବ ।
ପ୍ରଶାନ୍ତ ଜଗଦେବ କହିଛନ୍ତି, "ସମ୍ବଲପୁରରେ ଉପକୂଳ ଜିଲ୍ଲାବାସୀଙ୍କ ପ୍ରତି ନକାରାତ୍ମକ ଭାବନା ଥିବା ବେଳେ ଏହାର ଶିକାର ହେବେ ପ୍ରଣବ ପ୍ରକାଶ ଦାସ । ସେଠାରେ ସେ ଶୋଚନୀୟ ପରାଜୟ ବରଣ କରିବେ ।" ସେହିପରି ଅନ୍ୟ ଏକ ଉଦାହରଣ ଦେଇ ପ୍ରଶାନ୍ତ କହିଛନ୍ତି ଯେ ପୁରୀ ଲୋକସଭାର ବିଜେପି ପ୍ରାର୍ଥୀ ଏବେଠୁ ଜିତି ସାରିଲେଣି । କାରଣ ଅରୁପ ପଟ୍ଟନାୟକଙ୍କୁ ବିଜେଡି ପ୍ରାର୍ଥୀ କରିବା ପରେ ଏହା ସ୍ପଷ୍ଟ ହୋଇଯାଇଛି । ସେ କହିଛନ୍ତି ତାଙ୍କୁ ଦଳ ହିଞ୍ଜିଳିରେ ମୁଖ୍ୟମନ୍ତ୍ରୀଙ୍କ ବିରୋଧରେ ପ୍ରାର୍ଥୀ କଲେ ମଧ୍ୟ ସେ ଲଢେଇ କରିବେ । ସେ ପୂର୍ବରୁ ଜାନକୀ ବଲ୍ଲଭ ପଟ୍ଟନାୟକଙ୍କ ସହ ଲଢେଇ କରିଛନ୍ତି । ଆଉ ଏବେ ନବୀନ ପଟ୍ଟନାୟକ ଦୁର୍ବଳ ହୋଇ ଗଲେଣି ।