କେନ୍ଦୁଝର: ରାଜ୍ୟର 3ୟ ପର୍ଯ୍ୟାୟ ଅର୍ଥାତ ମେ' 25 ତାରିଖରେ କେନ୍ଦୁଝରରେ ହେବ ମତଦାନ । ହାତରେ ମାତ୍ର ଦିନ କେଇଟା ବାକିଥିବା ବେଳେ ନିର୍ବାଚନ ପ୍ରଚାରକୁ ଜୋରଦାର କରୁଛନ୍ତି ନେତା । କିଏ ସାଧାରଣ ସଭା ଆୟୋଜନ କରୁଛି ତ କିଏ ବାଇକ୍ ରାଲି ଓ ପଦଯାତ୍ରା କରୁଛି । ଏହି ପରିପ୍ରେକ୍ଷୀରେ ପାଟଣା ନିର୍ବାଚନ ମଣ୍ଡଳୀକୁ ସରଗରମ କରିଛି ଉଭୟ ବିଜେଡି ଓ ବିଜେପି ଦଳର ବାଇକ୍ ରାଲି ଓ ପଦଯାତ୍ରା ।
ପାଟଣା ନିର୍ବାଚନ ମଣ୍ଡଳୀର ବିଜେଡି ବିଧାୟକ ପ୍ରାର୍ଥୀ ଜଗନ୍ନାଥ ନାଏକ ଓ ସାଂସଦ ପ୍ରାର୍ଥୀ ଧନୁର୍ଜୟ ସିଦ୍ଧୁ ମେଗା ରୋଡ ସୋ’ ବାଇକ ରାଲି କରି ପ୍ରାଚାରକୁ ଜୋରଦାର କରିଛନ୍ତି । ରୋଡ ସୋ’ ଚମ୍ପୁଆ ବ୍ଲକ ଜଜପଶି ଠାରୁ ବାହାରି ଝୁମ୍ପୁରା ବ୍ଲକ ଉଖୁଣ୍ଡା ବାଉଁଶୁଳି, ତୁରୁମୁଙ୍ଗା, କେନ୍ଦେଇପଶି, ସାହାରପଡା ବ୍ଲକର ଉଦୟପୁର, ସିଲିପଦା, ଖଜୁରଡିହା ଦେଇ ପାଟଣା ବଜାର ପରିକ୍ରମା କରି ଡୁମୁରିଆ ପଞ୍ଚାୟତ ଭୀମକୁଣ୍ଡ ଠାରେ ଶେଷ ହୋଇଥିଲା । ବିଧାୟକ ପ୍ରାର୍ଥୀ ଜଗନ୍ନାଥ ନାଏକ ଏବଂ ସାଂସଦ ପ୍ରାର୍ଥୀଙ୍କ ସହ ଶହଶହ କର୍ମୀ ସାମିଲ ହୋଇଥିଲେ । ଅନେକ ସ୍ଥାନରେ ଶହ ଶହ ଏସଏଚଜି ମହିଳା ମଧ୍ୟ ସାଂସଦ ଓ ବିଧାୟକ ପ୍ରାର୍ଥୀଙ୍କୁ ଶୁଭେଚ୍ଛା ଜଣାଇଥିଲେ । ହାତରେ ବିଜେଡି ପତାକା ଧରି ମେଗା ସୋ’ରେ ସାମିଲ ହୋଇଥିଲେ ଚମ୍ପୁଆ, ଝୁମ୍ପୁରା ସାହାରପଡା ଏବଂ ପାଟଣା ଅଞ୍ଚଳବାସୀ । ରୋଡ ସୋ’ରେ ପାଟଣା ନିର୍ବାଚନ ମଣ୍ଡଳୀର ସଂଯୋଜକ କାନନ ବିହାରୀ ପୋହୀ, ନିର୍ବାଚନ ମଣ୍ଡଳୀ ପର୍ଯ୍ୟବେକ୍ଷକ ଡ.ହରିଶ ଚୌଧୁରୀ, ପାଟଣା ବ୍ଲକ ଅଧ୍ୟକ୍ଷା ସୁକାନ୍ତି ନାଏକଙ୍କ ସହ ବିଜେଡିର ବରିଷ୍ଠ ନେତା ସାମିଲ ହୋଇଥିଲେ ।
ସେହିପରି ବିଜେପିର ବିଧାୟକ ପ୍ରାର୍ଥୀ ଅଖିଳ ନାଏକଙ୍କ ପାଇଁ ମଧ୍ୟ ସମର୍ଥକମାନେ ପ୍ରଚାରକୁ ଜୋରଦାର କରିଛନ୍ତି । କିଛି ଦିନ ତଳେ ପାଟଣାରେ ବିରାଟ ବାଇକ୍ ରାଲି କରି ବିଜେପି ପକ୍ଷରୁ ମହାମିଶ୍ରଣ ଅନୁଷ୍ଠିତ ହୋଇଥିବା ବେଳେ ଆଜି ମଧ୍ୟ ତୁରୁମୁଙ୍ଗା ଠାରେ ମଧ୍ୟ ବିରାଟ ବାଇକ୍ ରାଲି କରି ଶକ୍ତି ପଦର୍ଶନ କରିଛି ବିଜେପି । ବାଇକ୍ ରାଲି ପରେ ଅଖିଳ ନାଏକଙ୍କ ପଦଯାତ୍ରା ମଧ୍ୟ ଅନୁଷ୍ଠିତ ହୋଇଛି । ଏଥିରେ ଅଖିଳ ନାଏକଙ୍କ କେନ୍ଦୁଝର ଜିଲ୍ଲାର ମହାରାଣୀ ସୁନନ୍ଦିନି ଭଞ୍ଜ ଦେଓ ମଧ୍ୟ ଯୋଗ ଦେଇ କେନ୍ଦ୍ର ସରକାରଙ୍କ ବିକାଶ ବାର୍ତ୍ତା ଭୋଟରଙ୍କ ମଧ୍ୟ ବାଣ୍ଟିଥିଲେ । ଏହି ପଦଯାତ୍ରାରେ ବିଜେପି କୃଷକ ମୋର୍ଚ୍ଚା ରାଜ୍ୟ ଉପସଭାପତି ରାଧାକାନ୍ତ ମହାନ୍ତ, ରାଜ୍ୟ ଆଦିବାସୀ ମୋର୍ଚ୍ଚା ସଦସ୍ୟା ତଥା ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷା ମମିତା ନାଏକଙ୍କ ସହ ବହୁ ତୁଙ୍ଗନେତା ଉପସ୍ଥିତ ରହିଥିଲେ ।