ରାସନ କାର୍ଡ ରାଜନୀତି: ଭୂତ ହିତାଧୀକାରୀଙ୍କ ତଥ୍ୟ ମାଗିଲା ବିଜେଡି, ପ୍ରତିକ୍ରିୟା ରଖିଲା ବିଜେପି - Ration Card Politics

Ration Card Politics: ରାସନ କାର୍ଡରେ ଭୂତ ହିତାଧିକାରୀ ନେଇ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀଙ୍କ ବୟାନ ନେଇ ତେଜିଲା ରାଜନୀତି । ପ୍ରତିକ୍ରିୟା ରଖିଲା ବିଜେଡି । ଅଧିକ ପଢ଼ନ୍ତୁ

ଭୁବନେଶ୍ବର: ଶୁକ୍ରବାର ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କହିଥିଲେ ରାଜ୍ୟରେ ରାସନ କାର୍ଡରେ ବହୁ ଭୂତ ହିତାଧିକାରୀ ଅଛନ୍ତି । ପୂର୍ବ ସରକାରରେ ଏହା ସମ୍ଭବ ଥିଲା, ହେଲେ ବିଜେପି ସରକାରରେ ହୋଇପାରିବ ନାହିଁ । ରାସନ କାର୍ଡରେ ଭୂତ ହିତାଧିକାରୀ ରହିଥିବା ନେଇ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀଙ୍କ ପ୍ରତିକ୍ରିୟାରେ ତେଜିଛି ରାଜ୍ୟ ରାଜନୀତି । ମନ୍ତ୍ରୀଙ୍କ ପ୍ରତିକ୍ରିୟାର ଜବାବ ରଖିଛି ବିଜେଡି । ସେପଟେ ବିଜେଡିକୁ ମଧ୍ୟ ବିଜେପି ପକ୍ଷରୁ ତୁରନ୍ତ କାଉଣ୍ଟର ମିଳିଛି ।

ଭୂତ ରାସନ କାର୍ଡ ହିତାଧିକାରୀ ନେଇ ଖାଦ୍ୟ ଯୋଗାଣ ଖାଉଟି କଲ୍ୟାଣ ମନ୍ତ୍ରୀଙ୍କ ପ୍ରତିକ୍ରିୟାର ଜବାବ ରଖି ବରିଷ୍ଠ ବିଜେଡି ନେତା ଦେବୀ ପ୍ରସାଦ ମିଶ୍ର କହିଛନ୍ତି, "ଯଦି ରାଜ୍ୟର ମନ୍ତ୍ରୀ ଏହା କହୁଛନ୍ତି, ତାଙ୍କ ପାଖରେ ତଥ୍ୟ ଥିବ । ସେଥିପାଇଁ ସେ କାର୍ଯ୍ୟାନୁଷ୍ଠାନ ନେବାକୁ ମଧ୍ୟ କହିଛନ୍ତି । ମନ୍ତ୍ରୀ ନିର୍ଦ୍ଦିଷ୍ଟ ତଥ୍ୟ ସହ ଯଦି ଘୋଷଣା କରିଛନ୍ତି, ତେବେ ତାହାକୁ ପ୍ରକାଶିତ ବି କରନ୍ତୁ । ଯିଏ ଦୋଷୀ ତା ଉପରେ କାର୍ଯ୍ୟାନୁଷ୍ଠାନ ନିଅନ୍ତୁ । ଅସୁବିଧା କ'ଣ ଅଛି । ସରକାରଙ୍କର ଅନେକ ଇସ୍ତାହାର ମଧ୍ୟ ପୂରଣ କରିବାକୁ ବାକି ଅଛି । ସରକାରକୁ ଆସିବାର ମାତ୍ର ମାସେ ହୋଇଛି । ବହୁ ଦିନ ବାକି ଅଛି । ଅନେକ କାମ ହେବ ବୋଲି ଆଶା ଅଛି ।"

ସେପଟେ ବିଜେଡି ପ୍ରତିକ୍ରିୟାଶୀଳ ହେବାକୁ ନେଇ କାଉଣ୍ଟର କରିଛନ୍ତି ବିଜେପି ମୁଖପାତ୍ର ଦିଲ୍ଲୀପ ମଲ୍ଲିକ । ସେ କହିଛନ୍ତି, "ବିଭାଗୀୟ ମନ୍ତ୍ରୀ ପ୍ରାଥମିକ ତଦନ୍ତରୁ ଆକଳନ କରିଛନ୍ତି ଯେ ଭୂତ ହିତାଧିକାରୀ ଅଛନ୍ତି । ଏହା ଉପରେ ଆହୁରି ତଦନ୍ତ ହେବ । ଯେଉଁମାନେ ପୂର୍ବ ସରକାରରେ ଲୁଟ ଚଳାଇଥିଲେ, ରାସନ କାର୍ଡ ନାଁରେ ହେଉ ବା ମନରେଗାରେ ହେଉ, ସବୁଥିରେ ଲୁଟପାଟ ଚାଲିଥିଲା । ଏ ସବୁ ବନ୍ଦ କରାଯିବ । ପ୍ରକୃତ ହିତାଧିକାରୀମାନଙ୍କୁ ରାସନ କାର୍ଡରେ ଯୋଡ଼ାଯିବ ଏବଂ ଭୂତ ହିତାଧିକାରୀ ମାନଙ୍କ ନାଁ କଟାଯିବ । ବିଜେଡି ଭୁଲ କରିଥିବାରୁ ପ୍ରତିକ୍ରିୟାଶୀଳ ହେଉଛି । ସେମାନେ ଯେଉଁ ଲୁଟ କରିଥିଲେ, ଆଜି ସେ ଲୁଟ ଧରା ପଡ଼ୁଛି । ନିଜର ଅପରାଧ ଓ ଦୁର୍ନୀତିକୁ ଲୁଚାଇବା ପାଇଁ ବିଜେଡି ବିରୋଧ କରୁଛି ।"

ଇଟିଭି ଭାରତ, ଭୁବନେଶ୍ବର