ଭୁବନେଶ୍ବର: ଗଠନ ହେଲା ଷଷ୍ଠ ରାଜ୍ୟ ଅର୍ଥ କମିଶନ । ପୂର୍ବତନ ବରିଷ୍ଠ ପ୍ରଶାସକ ତଥା ଅବସରପ୍ରାପ୍ତ ଆଇଏଏସ ଅଧିକାରୀ ଅରୁଣ କୁମାର ପଣ୍ଡାଙ୍କ ଅଧ୍ୟକ୍ଷତାରେ ଗଠନ ହୋଇଛି 5 ଜଣିଆ କମିଟି । କମିଟିରେ ଜଣେ ଅଧ୍ୟକ୍ଷ, 3 ଜଣ ସଦସ୍ୟ ଓ ଜଣେ ସଦସ୍ୟ-ସଚିବ ଅଛନ୍ତି । ରାଜ୍ୟପାଳଙ୍କ ଅନୁମୋଦନ ପରେ ଅର୍ଥ ବିଭାଗର ପ୍ରମୁଖ ଶାସନ ସଚିବ ଶାଶ୍ୱତ କୁମାର ମିଶ୍ରଙ୍କ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।
- ସଦସ୍ୟଙ୍କ ସମ୍ପର୍କରେ...
ଅର୍ଥ ବିଭାଗର ପ୍ରମୁଖ ଶାସନ ସଚିବ ଶାଶ୍ୱତ କୁମାର ମିଶ୍ରଙ୍କ ପକ୍ଷରୁ ପ୍ରକାଶ ପାଇଥିବା ବିଜ୍ଞପ୍ତି ଅନୁସାରେ, ରାଜ୍ୟ ସରକାର ଷଷ୍ଠ ରାଜ୍ୟ ଅର୍ଥ କମିଶନ ଆଜି ଗଠନ କରିଛନ୍ତି । ପୂର୍ବତନ ପ୍ରଶାସକ ଅରୁଣ କୁମାର ପଣ୍ଡା କମିଟିର ଅଧ୍ୟକ୍ଷ ରହିଛନ୍ତି । କମିଟି ଆଉ 3 ଜଣ ସଦସ୍ୟ ହେଉଛନ୍ତି ଜାଭିୟର ଇଷ୍ଟିଚ୍ୟୁଟ୍ ଅଫ ମ୍ୟାନେଜମେଣ୍ଟ (XIMB)ର ପ୍ରଫେସର ଅସିତ ରଞ୍ଜନ ମହାନ୍ତି, ପଣ୍ଡିଚେରୀ ବିଶ୍ୱବିଦ୍ୟାଳୟର ଅର୍ଥନୈତିକ ବିଭାଗର ପ୍ରଫେସର ଅମରେଶ ସାମନ୍ତରାୟ, TISSର ପ୍ରଫେସର ଡାକ୍ତର ବିଭୁ ପ୍ରସାଦ ନାୟକ । ସେହିପରି ଅର୍ଥ ବିଭାଗର ଅତିରିକ୍ତ ସଚିବ ଡ.ସତ୍ୟପ୍ରିୟ ରଥ ସଦସ୍ୟ-ସଚିବ ଭାବେ କମିଶନରେ ସ୍ଥାନ ପାଇଛନ୍ତି ।
- ବର୍ଷେ ପୂର୍ବରୁ କେନ୍ଦ୍ର ଗଠନ କରିଥିଲା ଷୋଡ଼ଶ ଅର୍ଥ ଆୟୋଗ
କେନ୍ଦ୍ର ଷୋଡ଼ଶ ଅର୍ଥ କମିଶନ ଗଠନ ହେବାର ପ୍ରାୟ ଏକ ବର୍ଷ ପରେ ରାଜ୍ୟ ଷଷ୍ଠ ଅର୍ଥ ଆୟୋଗ ଗଠନ ହୋଇଛି । ଏହି ଆୟୋଗ ପଞ୍ଚାୟତିରାଜ ପ୍ରତିଷ୍ଠାନ (PRI) ଏବଂ ସହରାଞ୍ଚଳ ସ୍ଥାନୀୟ ସଂସ୍ଥା (ULB) କୁ ପାଣ୍ଠି ପ୍ରଦାନ ଏବଂ ହସ୍ତାନ୍ତର ପାଇଁ ନୀତିଗତ ସୁପାରିଶ କରିବେ । ଆୟୋଗ ଦ୍ବାରା ସୁପାରିଶ ପ୍ରସ୍ତାବ ପାଞ୍ଚ ବର୍ଷ ପାଇଁ ବୈଧ ହେବ । ୨୦୧୮ ମସିହାରେ, ଓଡ଼ିଶା ସରକାର ଅବସରପ୍ରାପ୍ତ ଆଇଏଏସ ଅଧିକାରୀ ରବିନାରାୟଣ ସେନାପତିଙ୍କ ଅଧ୍ୟକ୍ଷତାରେ ‘ପଞ୍ଚମ ରାଜ୍ୟ ଅର୍ଥ କମିଶନ’ ଗଠନ କରିଥିଲେ । ଏହି ଆୟୋଗ ୨୦୧୯ ଅଗଷ୍ଟ ୨ ତାରିଖରେ ଏହାର ରିପୋର୍ଟ ଦାଖଲ କରିଥିଲା । ଯେତେବେଳେ ୨୦୨୦ ଫେବୃଆରୀ ୧୭ ତାରିଖରେ ଏହାକୁ ଆଧାର କରି ଆକ୍ସନ ଟେକେନ ରିପୋର୍ଟ ପ୍ରସ୍ତୁତ କରାଯାଇଥିଲା ।
- କେଉଁମାନେ ପୂର୍ବରୁ ଆୟୋଗର ଅଧ୍ୟକ୍ଷ ପଦ ସମ୍ଭାଳିଛନ୍ତି
ଏଠାରେ ଉଲ୍ଲେଖ କରାଯାଇପାରେ ଯେ, ପ୍ରଥମ ରାଜ୍ୟ ଅର୍ଥ କମିଶନର ଅଧ୍ୟକ୍ଷ ଜଷ୍ଟିସ ଏସ.କେ ମହାନ୍ତି ଥିଲେ । ସେହିପରି ତ୍ରିଲୋଚନ କାନୁନଗୋ ଦ୍ୱିତୀୟ ଅର୍ଥ କମିଶନର ଅଧ୍ୟକ୍ଷ ଥିଲେ । ପ୍ରଖ୍ୟାତ ଅର୍ଥନୀତିଜ୍ଞ ସୁଧାକର ପଣ୍ଡା ଏବଂ ଅବସରପ୍ରାପ୍ତ ଆଇଏଏସ ଅଧିକାରୀ ଚିନ୍ମୟ ବସୁ ଯଥାକ୍ରମେ ତୃତୀୟ ଏବଂ ଚତୁର୍ଥ ଅର୍ଥ କମିଶନର ଅଧ୍ୟକ୍ଷ ଭାବେ କାର୍ଯ୍ୟଭାର ସମ୍ଭାଳିଥିଲେ ।
ଇଟିଭି ଭାରତ, ବ୍ରହ୍ମପୁର
