ଭୁବନେଶ୍ବର: ରାଜଭବନ ବିଜୁ ଜନତା ଦଳ-ବିଜେଡିର ନିଶାନା । ବିଜେଡିର ଦୁଇ ଜଣ ରାଜ୍ୟସଭା ସାଂସଦ ଏନେଇ ଗଣମାଧ୍ୟମରେ ପ୍ରଶ୍ନ ଉଠାଇଛନ୍ତି । ରାଜଭବନକୁ ରାଜନୀତିର ଆଡ୍ଡାସ୍ଥଳୀରେ ପରିଣତ କରାନଯାଉ ବୋଲି ସଙ୍ଗୀନ ଅଭିଯୋଗ ଆଣିଛନ୍ତି ବିଜେଡି ସାଂସଦ ।
ASOଙ୍କୁ ନ୍ୟାୟ ପ୍ରସଙ୍ଗ:
ଓଡି଼ଶା ରାଜ୍ୟପାଳଙ୍କ ସରକାରୀ ବାସଭବନ ରାଜଭବନ ଓ ରାଜ୍ୟପାଳଙ୍କୁ ନେଇ ଅଭିଯୋଗ ଆଣିଛନ୍ତି ବିଜେଡିର ଦୁଇ ଜଣ ରାଜ୍ୟସଭା ସାଂସଦ । ବିଜେଡି ସାଂସଦ ସସ୍ମିତ ପାତ୍ରଙ୍କ କହିବା କଥା, "ଓଡ଼ିଶା ରାଜଭବନରେ ଦେଖିବାକୁ ମିଳିଛି ରାଜନୈତିକ ଗତିବିଧି । ଝାଡ଼ଖଣ୍ଡ ନିର୍ବାଚନ ପାଇଁ ଓଡି଼ଶା ରାଜଭବନ ପାଲଟିଛି କି ବିଜେପିର ୱାର୍ ରୁମ ? ଓଡି଼ଶା ରାଜଭବନ ଓ ରାଜ୍ୟପାଳ ପଦ ଗାରିମା କ୍ଷୁର୍ଣ୍ଣ ହେଉନାହିଁ କି ? ରାଜନୈତିକ ସ୍ୱାର୍ଥ ହାସଲ ଲାଗି ରାଜଭବନର ଗାରିମାକୁ କଳୁଷିତ କରାଯାଉଛି ।" ରାଜ୍ୟସଭା ସାଂସଦ ସୁଲତା ଦେଓ କହିଛନ୍ତି, "ରାଜଭବନ ହେଉଛି ଗାରିମାମୟ ସ୍ଥାନ । ରାଜନୀତିରୁ ଊର୍ଦ୍ଧ୍ଵରେ ଏହା ରହେ । କିନ୍ତୁ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ଵଶର୍ମା ଓ ପୂର୍ବତନ ଉପରାଷ୍ଟ୍ରପତି ଭେଙ୍କୟା ନାଇଡୁଙ୍କ ରାଜଭବନକୁ ଆଗମନ ନିଶ୍ଚିତ ଭାବେ ପ୍ରଶ୍ନ ସୃଷ୍ଟି କରିଛି ।"
ସୁଲତା ଦେଓ ଆହୁରି ମଧ୍ୟ କହିଛନ୍ତି, "ଆସାମ ମୁଖ୍ୟମନ୍ତ୍ରୀ ବ୍ୟକ୍ତିଗତ କାରଣରୁ ଓଡ଼ିଶାର ରାଜ୍ୟପାଳଙ୍କୁ ଭେଟିବାକୁ ଆସିଥିଲେ ବୋଲି କହିଥିଲେ । ଏହାପରେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ମାଝୀ ଝାଡଖଣ୍ଡ ଯାଇ ନିର୍ବାଚନୀ ସଭାରେ ଭାଷଣ ଦେଇଥିଲେ । ସେତେବେଳେ ହିମନ୍ତ ଓ ଭେଙ୍କୟା ନାଇଡୁଙ୍କ ଗସ୍ତ ରାଜନୈତିକ କାରଣରୁ ଥିଲା ବୋଲି ସ୍ପଷ୍ଟ ହୋଇଥିଲା । ରାଜ୍ୟପାଳ ରଘୁବର ଦାସ ଝାଡଖଣ୍ଡରେ ହେବାକୁ ଥିବା ବିଧାନସଭା ନିର୍ବାଚନରେ ପ୍ରାର୍ଥୀ ହେବେ କି ବୋଲି ଗଣମାଧ୍ୟମରେ ଚର୍ଚ୍ଚା ହେଉଛି । ସେ ନିର୍ବାଚନ ଲଢିବେ କି ନାହିଁ, ସେଥିରେ ବିଜେଡିର କିଛି ଯାଏ ଆସେ ନାହିଁ । କିନ୍ତୁ ଓଡ଼ିଶାର ରାଜଭବନକୁ ରାଜନୀତିର ଆଡ୍ଡାସ୍ଥଳୀରେ ପରିଣତ କରାନଯାଉ । ଏହାର ଗାରିମା ନଷ୍ଟ ନହେଉ ।"