ଭୁବନେଶ୍ବର: ଆଜି ଭାରତ ପାଳନ କରୁଛି ୭୫ତମ ସାଧାରଣତନ୍ତ୍ର ଦିବସ । ସାରା ଦେଶରେ ଉଡୁଛି ତ୍ରିରଙ୍ଗା । ସବୁଠୁ ଗଣତନ୍ତ୍ରର ଏହି ମହାନ ପର୍ବକୁ ପାଳନ କରାଯାଉଛି । ଏହି କ୍ରମରେ ଭୁବନେଶ୍ବର ସ୍ଥିତ କଂଗ୍ରେସ ଭବନରେ ମଧ୍ୟ ସାଧାରଣତନ୍ତ୍ର ଦିବସ ପାଳନ ହୋଇଯାଇଛି । ଆଜି ସକାଳ ସାଢେ ୮ଟା ସମୟରେ ପିସିସି ସଭାପତି ଶରତ ପଟ୍ଟନାୟକ କଂଗ୍ରେସ ଭବନରେ ଜାତୀୟ ପତାକା ଉତ୍ତୋଳନ କରିଥିଲେ । ଏହ କାର୍ଯ୍ୟକ୍ରମରେ ସମସ୍ତ କଂଗ୍ରେସ ନେତା ଓ କର୍ମୀ ଉପସ୍ଥିତ ରହି ଜାତୀୟ ସଙ୍ଗୀତ ଗାନ କରିଥିଲେ ।
ଏହି ଅବସରରେ ସମ୍ବିଧାନ ହେଉଛି ଭାରତବର୍ଷର ଆତ୍ମା ବୋଲି କହିଥିଲେ ଶରତ ପଟ୍ଟନାୟକ । ଏଥିସହିତ ବିଭିନ୍ନ ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କୁ ସମାଲୋଚନା କରିବାକୁ ସେ ଭୁଲି ନଥିଲେ । ପିସିସି ସଭାପତି ଅଭିଯୋଗ କରିଛନ୍ତି, ''ବିଜେଡ଼ି ସରକାର ଓଡ଼ିଶାକୁ ଗରୀବ ରାଜ୍ୟ ଭାବରେ ପରିଣତ କରିଛି । ଦୀର୍ଘ ୨୫ ବର୍ଷର ଶାସନ ପରେ ମଧ୍ୟ ଆଜି କଳାହାଣ୍ଡି, ସୁବର୍ଣ୍ଣପୁର, ମୟୂରଭଞ୍ଜ, ମାଲକାନଗିରି, ନବରଙ୍ଗପୁର, ରାୟଗଡା, କେନ୍ଦୁଝର ଭଳି ଜିଲ୍ଲା ଗରୀବ ସୀମାରେଖା ତଳେ ରହିଛି । ଓଡ଼ିଶାର ଗୌରବ, ପରମ୍ପରା ଓ ଐତିହ୍ୟକୁ ତଳିତଳାନ୍ତ କରିବାକୁ ଚକ୍ରାନ୍ତ କରାଯାଉଛି । ଏହାକୁ କଂଗ୍ରେସ କେବେ ବି ବରଦାସ୍ତ କରିବ ନାହିଁ ।''
ଏହା ମଧ୍ୟ ପଢନ୍ତୁ: ଆଜି ୭୫ତମ ସାଧାରଣତନ୍ତ୍ର ଦିବସ: ଶୁଭେଚ୍ଛା ଜଣାଇଲେ ରାଷ୍ଟ୍ରପତି-ପ୍ରଧାନମନ୍ତ୍ରୀ-ମୁଖ୍ୟମନ୍ତ୍ରୀ