ଓଡ଼ିଶାରେ ମୋଦିଙ୍କ ତିନି ଦିନ ରହଣୀ, ରାଜ୍ୟ ବିଜେପିକୁ ଦେବ କି ବୁଷ୍ଟ ?

ପ୍ରଥମ ପ୍ରଧାନମନ୍ତ୍ରୀ ଭାବେ 3 ଦିନ ଓଡ଼ିଶାରେ ରହିବେ ମୋଦି । ବିଜେପି ପାଇଁ ସାଜିବ କି ବୁଷ୍ଟର ଡୋଜ । ସରଗରମ ରାଜନୀତି ।

ଭୁବନେଶ୍ବର: ଆଜିଠୁ ରାଜଧାନୀ ଭୁବନେଶ୍ବରରେ ଆରମ୍ଭ ହେଲା DG-IG ସମ୍ମିଳନୀ । ପ୍ରଥମ ଥର ପାଇଁ ଓଡ଼ିଶାରେ ହୋଇଛି ଡିଜିପି ସମ୍ମିଳନୀ । ଏଥିରେ ଯୋଗ ଦେବାକୁ ଆସିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗୃହମନ୍ତ୍ରୀ ଅମିତ ଶାହ । ଭୁବନେଶ୍ୱରରେ ମୋଦିଙ୍କ 3 ଦିନ ରହଣୀ ମୋହନ ମାଝୀ ସରକାରକୁ ଅଧିକ କ୍ରିୟାଶୀଳ କରିବ ବୋଲି ଚର୍ଚ୍ଚା ହେଉଛି । କାରଣ କେବଳ ଡିଜିପି ସମ୍ମିଳନୀ ନୁହେଁ ଗସ୍ତର ପ୍ରଥମ ଦିନରେ ଜନାସଭା କରି ଓଡ଼ିଶାର ବିକାଶର ନକ୍ସା କଥା କହିଛନ୍ତି ମୋଦି । ଗୋଟେ ପଟେ ଜାତୀୟ ସୁରକ୍ଷାକୁ ନେଇ ମାନସ ମନ୍ଥଥ ହେଉଥିବା ବେଳେ ରାଜ୍ୟ ବିଜେପି କାର୍ଯ୍ୟାଳୟରେ ନେତା ସାଂସଦଙ୍କ ରିପୋର୍ଟ କାର୍ଡ ଦେଖିଛନ୍ତି ପ୍ରଧାନମନ୍ତ୍ରୀ । ପ୍ରଥମ ଥର ପାଇଁ ଜଣେ ପ୍ରଧାନମନ୍ତ୍ରୀ 3 ଦିନିଆ ଓଡ଼ିଶା ଗସ୍ତରେ ଆସିଛନ୍ତି । ଯାହା ରାଜ୍ୟ ବିଜେପି ପାଇଁ ବୁଷ୍ଟ ହୋଇପାରେ । ଅନ୍ୟପଟେ ପ୍ରଧାନମନ୍ତ୍ରୀଙ୍କ ଏହି 3 ଦିନିଆ ଗସ୍ତ କାର୍ଯ୍ୟକ୍ରମକୁ ନେଇ ରାଜନୀତି ବି ସରଗରମ ।

ଉତ୍ସାହିତ ବିଜେପି ଶିବିର:

3 ଦିନିଆ ଗସ୍ତରେ ଆସିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ପ୍ରଥମ ଥର କେହି ପ୍ରଧାନମନ୍ତ୍ରୀ 3 ଦିନିଆ ଓଡ଼ିଶା ଗସ୍ତରେ ଆସିଛନ୍ତି । ଯାହାକୁ ନେଇ ଉତ୍ସାହିତ ବିଜେପି ଶିବିର,କର୍ମୀ ଓ ନେତା । ପ୍ରିୟ ନେତାଙ୍କୁ ପାଇ ରାଜ୍ୟ ବିଜେପି କାର୍ଯ୍ୟାଳୟ ଆଜି ଆଜି ଚଳଚଞ୍ଚଳ । ଆଗକୁ ପୌର ନିର୍ବାଚନ ଏଥିପାଇଁ ପ୍ରଧାନମନ୍ତ୍ରୀ ନେତା କର୍ମୀଙ୍କୁ ଦେଇପାରନ୍ତି ଗୁରୁମନ୍ତ୍ର । ଏଥିପାଇଁ ରାଜ୍ୟ ବିଜେପି କାର୍ଯ୍ୟାଳୟରେ ଚାଲିଥିଲା ରୁଦ୍ଧଦ୍ବାର ବୈଠକ ।

ଓଡ଼ିଶା ପାଇଁ ବିକାଶ ପଥ ଖୋଲିବ: ବିଜେପି

ପ୍ରଧାନମନ୍ତ୍ରୀଙ୍କ ଗସ୍ତକୁ ନେଇ ଏକାମ୍ର ବିଧାୟକ ବାବୁ ସିଂହ କହିଛନ୍ତି, ‘ପୂର୍ବ ଭାରତରେ ଓଡିଶା ବିକାଶର ଶ୍ରେଷ୍ଠ ରାଜ୍ୟ ହେବ । ବିକାଶର ନୂଆ ଫର୍ଦ ଜୋଡା ହେବ । ଓଡିଶା ବିକାଶରେ ନିଜକୁ ସାମିଲ କରିବେ ପ୍ରଧାନମନ୍ତ୍ରୀ । ନୂଆ ଦିଶା ଦେବେ, ନୂଆ ଦିଗନ୍ତ ଦେବେ,ଓଡିଶା ବିକାଶ ପଥରେ ଆଗେଇବ । ଆଗାମୀ ଦିନରେ ଏହା ଏକ ମାଇଲ ଖୁଣ୍ଟ ହେବ । ଆଜି ଉତ୍ସାହିତ ବିଜେପି ଶିବିର,ଓଡିଶା ପାଇଁ ଏକ ସୁବର୍ଣ୍ଣ ସୁଯୋଗ । ବିଶ୍ୱର ସର୍ବଶ୍ରେଷ୍ଠ ନେତୃତ୍ୱ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭୁବନେଶ୍ୱର ଆସିଛନ୍ତି । ଓଡିଶା ପାଇଁ ବିକାଶ ପଥ ଖୋଲିବ । ଖାଲି ପୋଲିସର କାର୍ଯ୍ୟକ୍ରମ ହେବ ନାହିଁ କର୍ଯ୍ୟକର୍ତ୍ତାଙ୍କ ମଧ୍ୟ ମନୋବଳ ବଢିବା ସଂଗେ ସଂଗେ ଓଡିଶା ପାଇଁ ବିକାଶ ହେବ । ସରକାର କିଭଳି ବିକାଶ କାର୍ଯ୍ୟ ତ୍ୱରାନ୍ୱିତ ହେବ । ପ୍ରଧାନମନ୍ତ୍ରୀ କିଭଳି ଭାବେ ଓଡ଼ିଶାର ଉନ୍ନତି ପାଇଁ ସ୍ୱପ୍ନ ଦେଖୁଛନ୍ତି । ମୋ ପାଇଁ ଏହା ଏକ ସୁବର୍ଣ୍ଣ ସୁଯୋଗ । ସମସ୍ତ କର୍ମୀ ବିକାଶ ବାର୍ତ୍ତା ନେଇ ଘରକୁ ଯିବେ । ପ୍ରଥମଥର ପାଇଁ ସାରା ଦେଶର ଆଲୋଚନା ହେବ । ଦେଶର ଆଭ୍ୟନ୍ତରୀଣ ସୁରକ୍ଷା ବିଷୟରେ ଆଲୋଚନା ହେବ । ନିର୍ବାଚନ ପ୍ରତିଥର ଆସିବ ଯିବ, ବିକାଶ ଆମ ମୂଳ ଲକ୍ଷ୍ୟ ହେବା ଦରକାର । ଓଡିଶା ଆଗେଇବା ଦରକାର ।’

ଓଡ଼ିଶାର ମୋ ପରିବାର ଲୋକ ଓ କାର୍ଯ୍ୟକର୍ତ୍ତା ବନ୍ଧୁଙ୍କ ମୁହଁର ହସ ମୋ ଭିତରେ ନୂଆ ଶକ୍ତି ଭରି ଦେଇଛି । pic.twitter.com/fdkGdy7lAA

— Narendra Modi (@narendramodi) November 29, 2024

ଏହା ମଧ୍ୟ ପଢନ୍ତୁ:

ଦେଖାଇହେବା ବଡ଼ କଥା ନୁହେଁ କାମ କରିବା ବଡ଼କଥା: ବିଜେଡି

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଓଡ଼ିଶା ଗସ୍ତକୁ ନେଇ ପ୍ରତିକ୍ରିୟା ରଖିଛି ବିଜେଡି । ବିଜେଡି ବିଧାୟକ ସାରଦା ଜେନା କହିଛନ୍ତି, ‘ଏବେ ବି ନବୀନ ସର୍ବାଗ୍ରେ ଲୋକପ୍ରିୟ ରହିଛନ୍ତି । 150 ଦିନର ରିପୋର୍ଟ କାର୍ଡରେ ବିକାଶ ମୂଳକ କାର୍ଯ୍ୟ ଠପ ହୋଇଯାଇଛି । ବିଭିନ୍ନ ପ୍ରସଙ୍ଗରେ ସରକାର ପଛରେ । ସବୁଠି ସରକାର ଫେଲରେ ଚାଲିଛି, ତେଣୁ ଏସବୁକୁ ଆଗକୁ ନେବାକୁ ପ୍ରଧାନମନ୍ତ୍ରୀ ଆସିଥାଇ ପାରନ୍ତି । ପ୍ରଧାନମନ୍ତ୍ରୀଙ୍କ ଗସ୍ତ ଦେଖେଇ ହେବା କାର୍ଯ୍ୟକ୍ରମ । ତେଣୁ ଦେଖାଇ ହେବା ବଡ଼ କଥା ନୁହେଁ କାମ କରିବାଟା ବଡ଼ କଥା । ମୁଁ ବିଜେପିର ବନ୍ଧୁ ମାନଙ୍କୁ ଅନୁରୋଧ କରିବି, ରାଜ୍ୟର ସ୍ୱାର୍ଥକୁ ଆପଣ ମାନେ ସହିତ ପ୍ରଧାନମନ୍ତ୍ରୀଙ୍କ ପାଖରେ ଉପସ୍ଥାପିତ କରନ୍ତୁ । ସେ ପୋଲାଭରାମ ପ୍ରକଳ୍ପ ହେଉ, ମହାନଦୀ ଜଳ ବିବାଦ ପ୍ରସଙ୍ଗ ହେଉ, ତା ସହିତ ରେଳବାଇ କ୍ଷେତ୍ରରେ ଅବହେଳା ପ୍ରସଙ୍ଗ ହେଉ ଉପସ୍ଥାପନ କରନ୍ତୁ ।’

ଓଡ଼ିଶାରେ ଡ଼ବଲ ଇଞ୍ଜିନ ସରକାର ନୂତନ ଷ୍ଟାର୍ଟ ଅପକୁ ପ୍ରୋତ୍ସାହନ ଦେବା ଦ୍ଵାରା ଯୁବବର୍ଗଙ୍କ ଉଜ୍ଜଳ ଭବିଷ୍ୟତର ଶିଳାନ୍ୟାସ ହୋଇଛି। -ପ୍ରଧାନମନ୍ତ୍ରୀ ଶ୍ରୀ @narendramodi #ModiInOdisha #UtkarshOdisha pic.twitter.com/1N0sHfdCvX

— BJP Odisha (@BJP4Odisha) November 29, 2024

ଓଡ଼ିଶାକୁ ସ୍ବତନ୍ତ୍ର ପ୍ୟାକେଜ ଦିଅନ୍ତୁ ପ୍ରଧାନମନ୍ତ୍ରୀ:

ପ୍ରଧାନମନ୍ତ୍ରୀଙ୍କ ଗସ୍ତକୁ ନେଇ କଂଗ୍ରେସ ମଧ୍ୟ ପ୍ରତିକ୍ରିୟା ରଖିଛି । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ କହିଛନ୍ତି, ‘ଓଡିଶାରୁ ବିଜେପି ସଂସଦୀୟ କ୍ଷେତ୍ର ପୋଛି ନେଇଛି । ୨୦ ଜଣ ସାଂସଦ ପାଇଁ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତୃତୀୟ ଥର ପାଇଁ ସରକାର ଗଢିବାରେ ସକ୍ଷମ ହୋଇଛନ୍ତି । ଓଡ଼ିଶାର ଅବଦାନ ନରେନ୍ଦ୍ର ମୋଦିଙ୍କ ପାଇଁ ବହୁଗୁରୁତ୍ୱ ବହନ କରେ । ସେଥିପାଇଁ ଓଡିଶା ଉପରେ ମୋଦିଙ୍କ ଫୋକସ ରହିଛି । ସେଥିପାଇଁ ମୋଦି ସ୍ୱତନ୍ତ୍ର ଧ୍ୟାନ ଦିଅନ୍ତୁ । ଓଡିଶାବାସୀ ଅନେକ ବିଶ୍ୱାସ କରି 20 ଜଣ ସାଂସଦ କେନ୍ଦ୍ରକୁ ପଠାଇଲେ । ପଡୋଶୀ ରାଜ୍ୟ ଆନ୍ଧ୍ରପ୍ରଦେଶ, ବିହାରକୁ ସ୍ୱତନ୍ତ୍ର ପ୍ୟାକେଜ ଦେଇଛନ୍ତି । ପ୍ରଧାନମନ୍ତ୍ରୀ ଆଜି ଓଡିଶା ଆସିଛନ୍ତି । ହେଲେ ସେପଟେ କନ୍ଧମାଳରେ ଆମ୍ବ ଟାକୁଆ ଯାଉ ଖାଇ ମୃତ୍ୟୁବରଣ କରୁଛନ୍ତି । ଓଡ଼ିଶାରେ ଚାଷ ପାଇଁ ପାଣିର ଅଭାବ, ପୋଲାଭରମକୁ ଜାତୀୟ ପ୍ରକଳ୍ପ ମାନ୍ୟତା ଦେଲେ ସରକାର ହେଲେ ଏହା ଫଳରେ ମାଲକାନଗିରିରେ ଅଧାରୁ ଅଧିକ ଜାଗା ଜଳମଗ୍ନ ହେବ । କୋଟିଆ ଓଡ଼ିଶାର ଏକ ଅଭିଚ୍ଛେଦ୍ୟ ଅଙ୍ଗ ତାକୁ ମଧ୍ୟ ସମାଧାନ କଲେ ନାହିଁ । ଓଡିଶାବାସୀ ଭଲ ପାଇ ଯେଉଁ ସରକାର ଦେଇଛନ୍ତି ଗାଁ ଗହଳିରେ କୋଉଠି ବି ବିକାଶ ହୋଇପାରିଲା ନାହିଁ । ଆମେ ଦାବି କରୁଛୁ ଓଡ଼ିଶାକୁ ସ୍ବତନ୍ତ୍ର ପ୍ୟାକେଜ ଦିଅନ୍ତୁ ପ୍ରଧାନମନ୍ତ୍ରୀ ।

ପ୍ରଧାନମନ୍ତ୍ରୀଙ୍କ ଗସ୍ତ ବେଶ ଗୁରୁତ୍ବ ବହନ କରୁଛି: ବରିଷ୍ଠ ସାମ୍ବାଦିକ

ବରିଷ୍ଠ ସାମ୍ବାଦିକ ରବି ଦାଶ କହିଛନ୍ତି, ‘ପ୍ରଧାନମନ୍ତ୍ରୀଙ୍କ ବ୍ୟସ୍ତ ବହୁଳ କାର୍ଯ୍ୟକ୍ରମ ଭିତରେ 3 ଦିନ ଭୁବନେଶ୍ୱରରେ ରହଣି ବହୁ ଗୁରୁତ୍ୱ ବହନ କରୁଛି । ମୋହନ ସରକାରଙ୍କୁ ଅଧିକ ଗତିଶୀଳ କରିବା ପାଇଁ ମୋଦି IPS, IAS ମାନଙ୍କୁ ଶାସନ ତନ୍ତ୍ରକୁ ଅଧିକ ଲୋକାଭିମୁଖୀ କରିବାକୁ ବାର୍ତ୍ତା ଦେଇପାରନ୍ତି । ତ୍ରିସ୍ତରୀୟ ପଞ୍ଚାୟତ ନିର୍ବାଚନ ରହିଛି, ପୌର ସମବାୟ ନିର୍ବାଚନ ମଧ୍ୟ ହେବ, ସେଥିପାଇଁ ସଂଗଠନକୁ ତୃଣମୂଳ ସ୍ତରରେ ଅଧିକ ସଶକ୍ତ କରିବାକୁ ମୋଦି,ବିଧାୟକ, ସାଂସଦ,ମନ୍ତ୍ରୀ ଏବଂ ବରିଷ୍ଠ ନେତା ମାନଙ୍କୁ ଗୁରୁମନ୍ତ୍ର ଦେଇପାରନ୍ତି । ମୋଦିଙ୍କ ଉପରେ ଭରସା କରି ଓଡ଼ିଶାର ଲୋକମାନେ ବିଜେପିକୁ ଭୋଟ ଦେଇ ସରକାର ଗଢିଛନ୍ତି । ଓଡ଼ିଶାରେ ଯେଉଁ ମୋଦିଙ୍କ ସରକାର ଚାଲିଛି,ତାହା ସେପରି ଗତିଶୀଳ ହୋଇପାରିନି । ସରକାରଙ୍କୁ ଗତିଶୀଳ କରିବା ପାଇଁ ଦଳର ମନ୍ତ୍ରୀ,ବିଧାୟକ ମାନଙ୍କୁ ଗୁରୁମନ୍ତ୍ର ଦେବେ ।’

ଏହା ମଧ୍ୟ ପଢନ୍ତୁ:

ସେ ଆହୁରି କହିଛନ୍ତି, ‘ପ୍ରଧାନମନ୍ତ୍ରୀ ମୋଦି ଜାଣିଛନ୍ତି ଆଗକୁ ପଞ୍ଚାୟତ,ପୌର, ସମବାୟ ନିର୍ବାଚନ ଆସୁଛି ସେ ବିଷୟରେ ମଧ୍ୟ ଆଲୋଚନା ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶାରେ 3 ଦିନ ରହିବା ଏକ ନୂଆ କଥା । ଡିଜିପି ସମ୍ମିଳନୀ ତ ହେବ । ହେଲେ ତାଙ୍କର ଗସ୍ତର ମୂଳ ଅଭିମୁଖ୍ୟ ହେଉଛି ମେନ ଫୋକସ ରହିଛି ଦଳ । ସରକାରକୁ ଗତିଶୀଳ କରେଇବା ସେହି ଅନୁସାରେ ସରକାରୀ କଳକୁ ଗୋଟିଏ ବାର୍ତ୍ତା ଦେବ ସରକାରକୁ ସହଯୋଗ କର । ଓଡ଼ିଶାରେ ବିଜେପି ସରକାରକୁ ଲୋକେ ସମର୍ଥନ ଦେଇଛନ୍ତି ।

ସେ ଆହୁରି କହିଛନ୍ତି, ‘ବିଜେପି କେବେ ଭାବିନଥିଲା ସେମାନେ ଓଡ଼ିଶାରେ ସରକାର ଗଢିବେ । 24 ବର୍ଷର ନବୀନ ପଟ୍ଟନାୟକ ସରକାରକୁ ପ୍ରତ୍ୟାଖ୍ୟାନ କରି ବିଜେପିକୁ ଭୋଟ ଦେଲେ । କେବଳ ବିଧାନସଭା ନୁହେଁ ଲୋକସଭାରେ 20 ଟି ଆସନ ପାଉଛି । ଏମିତି କି 20ଟି ସଂସଦୀୟ କ୍ଷେତ୍ର ଦେଇନଥିଲେ କେନ୍ଦ୍ରରେ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ହୋଇପାରି ନଥାନ୍ତେ । ସେଥିପାଇଁ ସେ ଓଡିଶା ପ୍ରତି କୃତଜ୍ଞ । ଓଡିଶା ଇତିହାସରେ ବିଜେପି ଗୋଟିଏ ଦଳ ଯିଏ 20ଟି ସାଂସଦ ପାଇଛି ।’



ଇଟିଭି ଭାରତ, ଭୁବନେଶ୍ବର