ଆଜିକାଲି ବଜାରରେ ଅନେକ ପ୍ରକାର ହେୟାର ସିରମ ମିଳୁଛି । କେଶର ବୃଦ୍ଧି, ଲମ୍ବା, ଘନ, ମଜଭୁତ କେଶ, ରୁପୀ ଓ ଝଡିବା ସମସ୍ୟା କମ୍ କରିବାକୁ ଦାବି କରୁଥିବା ଏହି ସିରମ ଆଜିକାଲି ପ୍ରାୟ ସବୁ ମହିଳା ଓ ପୁରୁଷ ବ୍ୟବହାର କରୁଛନ୍ତି । କ'ଣ ସତରେ ଏ ପ୍ରକାର ସିରମ କେଶ ଝଡିବା କମାଇବା ଓ କେଶ ବୃଦ୍ଧିରେ ସାହାଯ୍ୟ କରେ ? ଏନେଇ ବିଶେଷଜ୍ଞଙ୍କ କହିବା କଥା, କେତେକ ବିଶେଷ ଗୁଣ ଥିବା ସିରମ ବ୍ୟବହାର କଲେ କେଶ ସ୍ବାସ୍ଥ୍ୟରେ ଉନ୍ନତି ଆସିଥାଏ । କିନ୍ତୁ ସିରମ୍ର ସଠିକ ବ୍ୟବହାର ସହିତ ଅନ୍ୟ କିଛି ଜିନିଷକୁ ଧ୍ୟାନରେ ରଖିବା ଜରୁରୀ ।
କ'ଣ କୁହନ୍ତୁ ଏକ୍ସପର୍ଟ ?
ଡର୍ମେଟୋଲୋଜିଷ୍ଟ ଡଃ ଆଶିଷ ଗୁହା କହିଛନ୍ତି, କେଶ ଝଡିବା, ଅଧାରୁ ଛିଡିବା, ନ ବଢିବା ପଛରେ ଅନେକ କାରଣ ଥାଇପାରେ । ସେଥିମଧ୍ୟରୁ ସବୁଠୁ ସାଧାରଣ କାରଣ ହେଲା ମାନସିକ ଚାପ, ହରମୋନାଲ ଅସନ୍ତୁଳନ, ଖରାପ ଖାଦ୍ୟପେୟ, ପୋଷକ ତତ୍ତ୍ବର ଅଭାବ, ଜିନ ଓ ଭୁଲ୍ ହେୟାର କେୟାର ପ୍ରଡକ୍ଟର ବ୍ୟବହାର । ଯଦି ଶରୀରକୁ ପର୍ଯ୍ୟାପ୍ତ ମାତ୍ରାରେ ପ୍ରୋଟିନ, ଆଇରନ ଓ ଭିଟାମିନ ନମିଳେ ତେବେ କେଶ ଝଡିବା ଓ ଏହାର ବିକାଶ ଧିମା ହୋଇପାରେ । ଚାପ ଓ ଚିନ୍ତା କେଶର ସ୍ବାସ୍ଥ୍ୟକୁ ପ୍ରଭାବିତ କରିଥାଏ ।
ସେ କହିଛନ୍ତି, କେତେକ ମାମଲାରେ ହେୟାର ଗ୍ରୋଥ ସିରମ ଲାଭଦାୟକ ହୋଇଥାଏ । କିନ୍ତୁ ଏହାର ପ୍ରଭାବ ପ୍ରତ୍ୟେକ ବ୍ୟକ୍ତିଙ୍କ କେଶ ଉପରେ ଭିନ୍ନ ଭିନ୍ନ ହୋଇପାରେ । ଯଦି ସିରମରେ ସଠିକ୍ ତତ୍ତ୍ବ ଓ ପୋଷକ ପଦାର୍ଥ ଥାଏ ତେବେ ଏହା କେଶ ମୂଳକୁ ମଜଭୁତ କରିବାରେ ଓ କେଶ ବୃଦ୍ଧିରେ ସାହାଯ୍ୟ କରେ । ସିରମରେ ଥିବା ମିନୋକ୍ସିଡିଲ ବା ବାୟୋଟିନ କେଶ ମୂଳକୁ ପୋଷଣ ଯୋଗାଏ ଯାହାର ପ୍ରଭାବ ଧୀରେ ଧୀରେ ଦେଖାଯାଏ । କିନ୍ତୁ କେବଳ ହେୟାର ଗ୍ରୋଥ ସିରମ ବ୍ୟବହାର କରିଦେଲେ କେଶ ଝଡିବା ସମସ୍ୟାର ସମାଧାନ ହୋଇଯିବନି, ଏଥିପାଇଁ ଉଚିତ୍ ଖାଦ୍ୟପେୟ, ଜୀବନଶୈଳୀ ଓ ଯତ୍ନ ଜରୁରୀ । ଉତ୍ତମ ଖାଦ୍ୟପେୟ ଓ ଜୀବନଶୈଳୀ ଗ୍ରହଣ କଲେ ସିରମ ଭଲରେ କାମ କରିପାରେ ।
ସେ କହିଛନ୍ତି, ଯଦି କେଶର ଗ୍ରୋଥ ଚାହୁଁଛନ୍ତି ତାହେଲେ ପ୍ରଥମେ ନିଜ ଖାଦ୍ୟପେୟ ପ୍ରତି ଯତ୍ନବାନ ହୁଅନ୍ତୁ । ପର୍ଯ୍ୟାପ୍ତ ପରିମାଣରେ ପ୍ରୋଟିନ, ଭିଟାମିନ ଓ ମିନେରାଲରେ ଭରପୂର ଖାଦ୍ୟ ଯେପରିକି ସବୁଜ ପନିପରିବା, ଫଳ, ଡ୍ରାଏଫ୍ରୁଟ୍ସ ଓ ମାଛ ଖାଆନ୍ତୁ । ଏହାସହିତ ଉତ୍ତମ ଜୀବନଶୈଳୀ ଆପଣାଇବା ଆବଶ୍ୟକ । ପର୍ଯ୍ୟାପ୍ତ ନିଦ, ଚାପ କମାଇବା ଓ ନିୟମିତ ବ୍ୟାୟାମ କରିବା ଦ୍ବାରା କେଶ ସୁସ୍ଥ ରଖିବାରେ ସାହାଯ୍ୟ କରେ । କେଶରେ ଠିକ୍ ଭାବେ ସିରମ ବ୍ୟବହାର କରିବା ଜରୁରୀ । ତେବେ ବ୍ୟବହାର କରିବା ପୂର୍ବରୁ ଉକ୍ତ ସିରମରେ ଆପଣଙ୍କୁ ଯେପରି କୌଣସି ଆଲର୍ଜି ନଥାଏ ଯାଞ୍ଚ କରନ୍ତୁ ।