ପରୀକ୍ଷା ପ୍ରତ୍ୟେକ ଛାତ୍ରଛାତ୍ରୀଙ୍କ ପାଇଁ ଖୁବ୍ ଚାପପୂର୍ଣ୍ଣ ସମୟ ହୋଇଥାଏ । ପରୀକ୍ଷା ତାରିଖ ଯେମିତି ପାଖେଇ ଆସେ, ଛାତ୍ରଛାତ୍ରୀ ରାତି ରାତି ଅନିଦ୍ରା ରହି ପାଠ ପଢନ୍ତି । ବିଳମ୍ବିତ ରାତି ପର୍ଯ୍ୟନ୍ତ ନିଜକୁ ଜାଗ୍ରତ ରଖିବାକୁ ଚା' କିମ୍ବା କଫିର ସାହାରା ନିଅନ୍ତି । ହେଲେ ଏହି କିଛି ଦିନର ଅଭ୍ୟାସ ସେମାନଙ୍କ ସ୍ବାସ୍ଥ୍ୟ ପକ୍ଷେ ଅତ୍ୟନ୍ତ ହାନିକାରକ ହୋଇଥାଏ । ଏହା ଉଭୟ ଶାରିରୀକ ଓ ମାନସିକ ସ୍ବାସ୍ଥ୍ୟ ଗୁରୁତର ପ୍ରଭାବିତ କରିପାରେ । କାରଣ ବିଳମ୍ବିତ ରାତି ପର୍ଯ୍ୟନ୍ତ ଅନିଦ୍ରା ରହିବା ଏବଂ କଫିନଯୁକ୍ତ ଚା', କଫି ଅତ୍ୟଧିକ ସେବନ କରିବା ଦୀର୍ଘକାଳୀନ ସ୍ବାସ୍ଥ୍ୟ ସମସ୍ୟାର କାରଣ ହୋଇପାରେ ।
ବିଳମ୍ବିତ ରାତିରେ ପଢିବାର ପ୍ରଭାବ:
ବିଳମ୍ବିତ ରାତି ଯାଏ ଜାଗ୍ରତ ରହିବା ଓ ପର୍ଯ୍ୟାପ୍ତ ନ ଶୋଇବା ଦ୍ବାରା ଥକ୍କାପଣ, ମୁଣ୍ଡବିନ୍ଧା ଅନୁଭବ ହେବା ସହିତ ପ୍ରତିରକ୍ଷା ପ୍ରଣାଳୀ ଦୁର୍ବଳ ହୋଇପାରେ । ସେହିପରି ଦୀର୍ଘ ଦିନ ଧରି କଫିନ ସେବନ କରିବା ଯୋଗୁଁ ହୃଦସ୍ପନ୍ଦନ ଓ ରକ୍ତଚାପ ବା ବ୍ଲଡପ୍ରେସର ବୃଦ୍ଧି ସମସ୍ୟା ଦେଖାଦେଇପାରେ । ଏହା ପିଲାର ପାଠପଢା ଗୁଣବତ୍ତା ପ୍ରଭାବିତ କରିଥାଏ ।
ମାନସିକ ସ୍ବାସ୍ଥ ଉପରେ ପ୍ରଭାବ:
ନିଦ ପୁରା ନହେଲେ ଅଥବା ପର୍ଯ୍ୟାପ୍ତ ନ ଶୋଇଲେ ମାନସିକ ସ୍ବାସ୍ଥ୍ୟ ପ୍ରଭାବିତ ହୋଇଥାଏ । ଏହାଦ୍ବାରା ବିଦ୍ୟାର୍ଥୀଙ୍କ ସ୍ମରଣଶକ୍ତି କମିବା ସହିତ ଶିକ୍ଷଣ କ୍ଷମତା ଦୁର୍ବଳ ହୋଇପାରେ । ନିଦ ଅଭାବରୁ ଚାପ, ଚିନ୍ତା ବଢିଥାଏ ଯାହାକି ପିଲାଟିର ଶୈକ୍ଷିକ ପ୍ରଦର୍ଶନ ଉପରେ ନକରାତ୍ମକ ପ୍ରଭାବ ପକାଇଥାଏ ।
ଅଯଥା ଚାପ ପକାନ୍ତୁ ନାହିଁ:
ପରୀକ୍ଷା ସମୟରେ ଅଭିଭାବକ ଓ ଶିକ୍ଷକ ବିଦ୍ୟାର୍ଥୀଙ୍କ ଉପରେ ଅନାବଶ୍ୟକ ଚାପ ନ ପକାଇବା ଉଚିତ୍ । ଏହା ବଦଳରେ ସେମାନେ ପିଲାର ପରିଶ୍ରମର ପ୍ରଶଂସା କରନ୍ତୁ ଏବଂ ପାଠପଢା ପାଇଁ ଏକ ଶାନ୍ତ ଓ ଚାପମୁକ୍ତ ବାତାବରଣ ପ୍ରଦାନ କରନ୍ତୁ । ଉତ୍ତମ ସ୍ବାସ୍ଥ୍ୟ ବିନା ଅଧ୍ୟୟନରେ ସଫଳତା ମିଳିବା କଷ୍ଟସାଧ୍ୟ ବୋଲି ପିଲାଙ୍କୁ ବୁଝାନ୍ତୁ ।
ପାଠପଢା ଓ ସ୍ବାସ୍ଥ୍ୟ ମଧ୍ୟରେ ସନ୍ତୁଳନ:
ଛାତ୍ରଛାତ୍ରୀ ପାଠପଢା ସହିତ ଶାରିରୀକ ଓ ମାନସିକ ସ୍ବାସ୍ଥ୍ୟ ପ୍ରତି ଯତ୍ନବାନ ହେବା ଜରୁରୀ । ଠିକ୍ ସମୟରେ ଶୋଇବା, ଉଠିବା ଏବଂ ପାଠପଢା ପାଇଁ ନିର୍ଦ୍ଧିଷ୍ଟ ସମୟ ନିର୍ଦ୍ଧାରଣ କରିବା ପାଇଁ ପିଲାଙ୍କୁ ପ୍ରୋତ୍ସାହିତ କରନ୍ତୁ । କଫିନଯୁକ୍ତ ପାନୀୟ ବଦଳରେ ପିଲାଟି ଯେପରି ସୁସ୍ଥ ଆହାର ଗ୍ରହଣ କରିବ ସେ ଦିଗରେ ଧ୍ୟାନ ଦିଅନ୍ତୁ । ପିଲା ପାଠପଢା ମଝିରେ କିଛି ସମୟ ବ୍ରେକ ନିଅନ୍ତୁ । ଏହା ଶାରିରୀକ ଓ ମାନସିକ ଶକ୍ତି ବଜାୟ ରଖିବାରେ ସାହାଯ୍ୟ କରେ ।
ପରୀକ୍ଷାରେ ଭଲ ପ୍ରଦର୍ଶନ ପାଇଁ ଟିପ୍ସ:
ବିଳମ୍ବିତ ରାତି ପର୍ଯ୍ୟନ୍ତ ଉଜାଗର ରହି ପାଠ ପଢିବା ଅପେକ୍ଷା ଦିନ ବେଳା ଅଧିକ ସମୟ ପଢିବାକୁ ଚେଷ୍ଟା କରନ୍ତୁ । ସକାଳୁ ଶୀଘ୍ର ଉଠିବା ଏକ ଭଲ ବିକଳ୍ପ । ଛାତ୍ରଛାତ୍ରୀ ପାଠପଢା ଭିତରେ ଛୋଟ ଛୋଟ ବ୍ରେକ ନିଅନ୍ତୁ । ରିଭିଜନ ପାଇଁ ସମୟ ବାହାର କରନ୍ତୁ । ପର୍ଯ୍ୟାପ୍ତ ନିଦ, ସନ୍ତୁଳିତ ଆହାର ଓ ନିୟମିତ ବ୍ୟାୟାମ ଛାତ୍ରଛାତ୍ରୀଙ୍କୁ ଚାପମୁକ୍ତ ରଖିବା ଓ ତାଙ୍କର ଶୈକ୍ଷିକ ପ୍ରଦର୍ଶନ ଉନ୍ନତ କରିବାରେ ସହାୟକ ହୁଏ ।
Ref- https://pmc.ncbi.nlm.nih.gov/articles/PMC9424753/
https://www.jahonline.org/article/S1054-139X(13)00486-2/fulltext
