ହାଇଦ୍ରାବାଦ: ଆଜିକାଲି ପେଟ ବଢିବା ସାଧାରଣ ସମସ୍ୟା ହୋଇଛି । ଜଣେ ଯେତେ ସୁନ୍ଦର ହୋଇଥାଉ ନା କାହିଁକି ମୋଟାପଣ ବା ପେଟ ବାହାରିବା ଦ୍ବାରା ତା'ର ସୌନ୍ଦର୍ଯ୍ୟ ଫିକା ପଡିଯାଏ । ଆଜିର ବ୍ୟସ୍ତବହୁଳ ଜୀବନ ଓ ଅସ୍ବାସ୍ଥ୍ୟକର ଖାଦ୍ୟପେୟ କାରଣରୁ ଏଭଳି ସମସ୍ୟା ବହୁଳ ଦେଖାଯାଉଛି । ପେଟର ଚର୍ବି କମାଇବା ପାଇଁ ଲୋକେ ନାନା ମତେ ଚେଷ୍ଟା ଚଳାଇଛନ୍ତି । କେହି ଡାଏଟିଂ କରୁଛନ୍ତି ତ ଆଉ କିଏ ଜିମରେ ଝାଳ ବୁହାଉଛନ୍ତି । ଆଉ କେହି ପାର୍କରେ ଘଣ୍ଟା ଘଣ୍ଟା ଧରି ଦୌଡୁଛନ୍ତି । ହେଲେ ଏତେ ସବୁ ପରେ ବି ପେଟ ଭିତରକୁ ପଶିପାରୁନି ।
କଣ କହୁଛନ୍ତି ସ୍ବାସ୍ଥ୍ୟ ବିଶେଷଜ୍ଞ:
ସ୍ବାସ୍ଥ୍ୟ ବିଶେଷଜ୍ଞ କହିବା ଅନୁସାରେ, ପେଟରେ ଚର୍ବି ବଢିବା ଦ୍ବାରା ଅନେକ ସ୍ବାସ୍ଥ୍ୟଗତ ସମସ୍ୟା ଦେଖାଯାଏ । ହୃଦରୋଗ, ଉଚ୍ଚ ରକ୍ତଚାପ, ଡାଇବେଟିସ୍ ଭଳି ରୋଗ ହୋଇପାରେ । ହେଲେ ଅନେକ ଲୋକ ନିଜର ଖାଦ୍ୟପେୟ ପ୍ରତି ଯତ୍ନବାନ ହେବା ସତ୍ତ୍ବେ କାହିଁକି ପେଟ ବାହାରିଲା ଜାଣିପାରନ୍ତି ନାହିଁ । ସେମାନଙ୍କୁ ଲାଗେ, ଅଧିକ ଖାଇବା ଦ୍ବାରା ଚର୍ବି ବଢିଯାଏ । କିନ୍ତୁ ଏନେଇ ବିଶେଷଜ୍ଞ କହିଛନ୍ତି, ପେଟ ଆଖପାଖରେ ଚର୍ବି ବଢିବାର ଅନେକ କାରଣ ହୋଇପାରେ । ଆସନ୍ତୁ ଏହି ଖବରରେ ଜାଣିବା ପେଟରେ ଚର୍ବି ଜମା ହେବାର କାରଣ ସମ୍ପର୍କରେ...
ବ୍ୟାୟାମର ଅଭାବ:
ଆଜିକାଲିର ବ୍ୟସ୍ତବହୁଳ ଜୀବନ ଭିତରେ ଲୋକମାନେ ନିୟମିତ ବ୍ୟାୟାମ କରିବାକୁ ଭୁଲି ଯାଉଛନ୍ତି । ଏହି କାରଣରୁ ପେଟରେ ଚର୍ବି ଜମା ହେଉଥିବା ବିଶେଷଜ୍ଞ କହିଛନ୍ତି । ଯାହାକି ଭବିଷ୍ୟତରେ ହୃଦରୋଗ, ଉଚ୍ଚ ରକ୍ତଚାପ ପରି ବଡ ରୋଗର କାରଣ ହୋଇପାରେ । ତେଣୁ ନିଜକୁ ଫିଟ୍ ରଖିବାକୁ ହେଲେ ପ୍ରତିଦିନ କିଛି ସମୟ ବ୍ୟାୟାମ କରିବାକୁ ପରାମର୍ଶ ଦିଆଯାଏ ।
ସନ୍ତୁଳିତ ଖାଦ୍ୟ ନଖାଇବା:
ବିଶେଷଜ୍ଞଙ୍କ କହିବା କଥା, ପେଟ ଆଖପାଖରେ ଚର୍ବି ବଢିବାର ଅନ୍ୟ ଏକ କାରଣ ଅସନ୍ତୁଳିତ ଖାଦ୍ୟ । ଅଧିକାଂଶ ଲୋକ ଭୋକ ନ ଲାଗିବା ପାଇଁ ଦୈନିକ ଆବଶ୍ୟକତା ଠାରୁ ଅଧିକ କ୍ୟାଲୋରୀ ଯୁକ୍ତ ଖାଦ୍ୟ ଖାଇଥାନ୍ତି । ଏହି କାରଣରୁ ପେଟରେ ଚର୍ବି ବଢିଥାଏ ।