ହାଇଦ୍ରାବାଦ: ଶିରୋନାମାରେ ରହିଛନ୍ତି ଭାରତର ଶ୍ରେଷ୍ଠ ଗାୟକ, ସଂଗୀତକାର ଏବଂ ଗୀତିକାର ଏଆର ରେହମାନ । ସେ ୩୦ ବର୍ଷରୁ ଅଧିକ ସମୟ ଧରି ସଙ୍ଗୀତ ଦୁନିଆରେ କୃତିତ୍ବ ଲାଭ କରିବା ସହ ଦର୍ଶକଙ୍କ ମନ ଜିତିଛନ୍ତି । ରେହମାନ ଗୀତ ରଚନା ଏବଂ ଗାଇବାରେ ସୀମିତ ନୁହଁନ୍ତି, ସେ ତାଙ୍କ ସଙ୍ଗୀତକୁ ଏକ ଭିନ୍ନ ଢଙ୍ଗରେ ଆଗକୁ ନେଇଛନ୍ତି । ରେହମାନ ପ୍ରଥମେ ଭାରତରେ ସଙ୍ଗୀତ ଇଣ୍ଡଷ୍ଟ୍ରିରେ ଅଟୋ ଟ୍ୟୁନର ଟ୍ରେଣ୍ଡ ଆରମ୍ଭ କରିଥିଲେ । ବର୍ତ୍ତମାନ ପୁଣିଥରେ ତାଙ୍କ ସୃଜନଶୀଳତାକୁ ପରବର୍ତ୍ତୀ ସ୍ତରକୁ ନେଇଛନ୍ତି । ଏଆର ରେହମାନ ଦିବଙ୍ଗତ ଗାୟକଙ୍କ ସ୍ବରକୁ ପୁନର୍ଜୀବିତ କରି ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି ।
ନିକଟରେ ଏଆର ରେହମାନ ରଜନୀକାନ୍ତଙ୍କ ଆଗାମୀ ଚଳଚ୍ଚିତ୍ର 'ଲାଲ ସଲାମ' ପାଇଁ ଥିମିରି ୟେଜୁଦା ଗୀତ ପ୍ରସ୍ତୁତ କରିଛନ୍ତି, ଯାହା ମଧ୍ୟ କୃତ୍ରିମ ବୁଦ୍ଧିମତା (AI) ସାହାଯ୍ୟରେ ହୋଇଛି । ମ୍ୟୁଜିକ୍ ଇଣ୍ଡଷ୍ଟ୍ରିର ଲୋକପ୍ରିୟ କଣ୍ଠଶିଳ୍ପୀ ବାମ୍ବା ବାକ୍ୟା ଏବଂ ଶହୁଲ ହମିଦଙ୍କ ସ୍ବରକୁ ଏଆଇ ସାହାଯ୍ୟରେ 'ଲାଲ ସଲାମ'ର 'ଥିମିରି ୟେଜୁଦା' ଗୀତ ପ୍ରସ୍ତୁତ କରାଯାଇଛି । ଦିବଙ୍ଗତ କଣ୍ଠଶିଳ୍ପୀଙ୍କ ସ୍ବରକୁ ପୁନର୍ଜୀବିତ କରିବା ଇଣ୍ଡଷ୍ଟ୍ରିରେ ଏହା ପ୍ରଥମ ଥର ପାଇଁ ହୋଇଛି । ଯାହା ବର୍ତ୍ତମାନ ସମସ୍ତଙ୍କୁ ଚକିତ କରିବା ସହ ଗାୟକଙ୍କ ଏଭଳି ଅଭିନବ ପ୍ରୟାସକୁ ସମସ୍ତେ ବେଶ ପ୍ରଶଂସା କରିଛନ୍ତି ।
ସେପଟେ ଏଆର ରେହମାନ ସୋସିଆଲ ମିଡିଆ ଏକ୍ସରେ ଏକ ପୋଷ୍ଟ ସେୟାର କରି ଏହି ପ୍ରୟାସ ନେଇ ପ୍ରତିକ୍ରିୟା ଦେଇଛନ୍ତି । ସେ ଗୀତର ପୋଷ୍ଟର ସେୟାର କରି ଲେଖିଛନ୍ତି, ଯେପର୍ଯ୍ୟନ୍ତ AI ସଠିକ୍ ଭାବରେ ବ୍ୟବହାର ନହୁଏ ସେ ପର୍ଯ୍ୟନ୍ତ AI ବ୍ୟବହାର କରିବା କ୍ଷତିକାରକ ନୁହେଁ । ଗାୟକ ଏହା ମଧ୍ୟ କହିଛନ୍ତି ଯେ, ସ୍ବର୍ଗତ ଗାୟକଙ୍କ ପରିବାରଠାରୁ ଅନୁମତି ନେବା ପରେ ସେ ଏହି ଗୀତ ପ୍ରସ୍ତୁତ କରିଛନ୍ତି ।