ଚେନ୍ନାଇ: ଫିଲ୍ମ ଇଣ୍ଡଷ୍ଟ୍ରିରେ ନିଜର ଜଲୱା ଦେଖାଇବା ପରେ ଏବେ ରାଜନୈତିକ କ୍ଷେତ୍ରରେ ନିଜର କମାଲ ଦେଖାଇବାକୁ ଯାଉଛନ୍ତି ସାଉଥ ମେଗାଷ୍ଟାର ଥାଲାପତି ବିଜୟ । ଆଜି ଅଭିନେତା ଏନେଇ ଘୋଷଣା କରିବା ସହ ତାଙ୍କ ଦଳର ନାମ ମଧ୍ୟ ଘୋଷଣା କରିଛନ୍ତି । ବିଜୟ ତାଙ୍କ ଦଳର ନାମ 'ତାମିଲାଗା ଭେଟ୍ରି କାଝାଗାମ' ରଖିଛନ୍ତି। ଏହା ସହ ବିଜୟ ଏକ ବିବୃତ୍ତି ଜାରି କରିଛନ୍ତି ଯେଉଁଥିରେ ସେ କହିଛନ୍ତି ଯେ ସେ ୨୦୨୪ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ କିମ୍ବା ଏହି ନିର୍ବାଚନରେ ସେ କୌଣସି ଦଳକୁ ସମର୍ଥନ କରିବେ ନାହିଁ। ସାଧାରଣ ଏବଂ କାର୍ଯ୍ୟନିର୍ବାହୀ ପରିଷଦ ବୈଠକ ପାଇଁ ଆମେ ଏହି ନିଷ୍ପତ୍ତି ନେଇଛୁ ।
ବିଜୟ ଏକ୍ସରେ ନିଜ ରାଜନୈତିକ ଦଳ ଘୋଷଣା ସହ ଏକ ବିବୃତ୍ତି ଜାରି କରିଛନ୍ତି । ସେ କହିଛନ୍ତି ଯେ, ଆମ ଦଳ 'ତାମିଲାଗା ଭେଟ୍ରି କାଝାଗାମ'କୁ ପଞ୍ଜୀକରଣ କରିବାକୁ ଆମେ ଆଜି ନିର୍ବାଚନ ଆୟୋଗରେ ଆବେଦନ କରୁଛୁ । ଆମର ଲକ୍ଷ୍ୟ ହେଉଛି ଆଗାମୀ ୨୦୨୬ ବିଧାନସଭା ନିର୍ବାଚନରେ ପ୍ରତିଦ୍ବନ୍ଦ୍ବିତା କରିବା ଏବଂ ଜିତିବା ଏବଂ ମୌଳିକ ରାଜନୈତିକ ପରିବର୍ତ୍ତନ ଆଣିବାକୁ, ଯାହା ଲୋକମାନେ ଚାହୁଁଛନ୍ତି ।
ସେ ଆହୁରି କହିଛନ୍ତି ଯେ, ନିର୍ବାଚନ ଆୟୋଗର ଅନୁମୋଦନ ପାଇବା ପରେ ଦଳ ସାଧାରଣ ସଭା ଏବଂ କାର୍ଯ୍ୟକ୍ରମ ଆୟୋଜନ କରିବାକୁ ଯୋଜନା କରିଛି ଯେଉଁଠାରେ ସେମାନେ ସେମାନଙ୍କର ନୀତି ଏବଂ କାର୍ଯ୍ୟ ଯୋଜନା ଉପସ୍ଥାପନ କରିବେ ଏବଂ ପତାକା ଏବଂ ଦଳର ପ୍ରତୀକ ଉପସ୍ଥାପନ କରିବେ ।
ରାଜନୀତିରେ ଏଣ୍ଟ୍ରି ପରେ ଫିଲ୍ମ କରିବେ କି ଥାଲାପତି?
ଅଭିନେତା କହିଛନ୍ତି, ରାଜନୀତିରେ ମୋ ପାଇଁ ଆଉ ଏକ କ୍ୟାରିୟର ନାହିଁ । ଜନସେବା ଏକ ପବିତ୍ର କାର୍ଯ୍ୟ ଏବଂ ମୁଁ ଏହା ପାଇଁ ଦୀର୍ଘ ସମୟ ଧରି ନିଜକୁ ପ୍ରସ୍ତୁତ କରୁଥିଲି । ରାଜନୀତି ମୋ ପାଇଁ ଏକ ଶବ୍ଦ କିମ୍ବା ମୋର ସଉକ ନୁହେଁ । ଏହା ମୋର ହୃଦୟର ଇଚ୍ଛା । ମୁଁ ନିଜକୁ ଏଥିରେ ସାମିଲ କରିବାକୁ ଚାହୁଁଛି । ଯେହେତୁ ମୁଁ ପୂର୍ବରୁ ସ୍ବୀକାର କରିସାରିଛି, "ମୁଁ ଅନ୍ୟ ଏକ ଚଳଚ୍ଚିତ୍ର ସମ୍ବନ୍ଧୀୟ କର୍ତ୍ତବ୍ୟ ସଂପୂର୍ଣ୍ଣ କରିବାକୁ ଯାଉଛି ଯାହା ପାର୍ଟି କାର୍ଯ୍ୟରେ ବାଧା ସୃଷ୍ଟି କରିବ ନାହିଁ ଏବଂ ଲୋକଙ୍କ ସେବା ପାଇଁ ରାଜନୀତିରେ ଯୋଗ ଦେଇଛି । ସେ କହିଛନ୍ତି ମୁଁ ଏହାକୁ ତାମିଲନାଡୁବାସୀଙ୍କ ପ୍ରତି ମୋର କୃତଜ୍ଞତା ବୋଲି ମନେ କରୁଛି ।
ଏହା ମଧ୍ୟ ପଢନ୍ତୁ:ନିୟମ ଭାଙ୍ଗିଲେ ଥାଲାପତି ବିଜୟ, ଭରିବେ ଜରିମାନା
ଖବର ଅନୁସାରେ, ଥାଲାପତି ବର୍ତ୍ତମାନ ତାଙ୍କର ଆଗାମୀ ଚଳଚ୍ଚିତ୍ରର ସୁଟିଂରେ ବ୍ୟସ୍ତ ଅଛନ୍ତି, ଯାହାର ନାମ ହେଉଛି ଥାଲାପତି ୬୮ । ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ଭେଙ୍କଟ ପ୍ରଭୁ। ଏହି ଚଳଚ୍ଚିତ୍ର ପରେ କୁହାଯାଉଛି ଯେ ସେ ନିର୍ମାତା ଆରବି ଚୌଧୁରୀଙ୍କ ପ୍ରଡକ୍ସନ୍ ଅଧୀନରେ ସୁପରଗୁଡ ଫିଲ୍ମର ୧୦୦ତମ ଚଳଚ୍ଚିତ୍ରରେ ଅଭିନୟ କରିବାକୁ ରାଜି ହୋଇଛନ୍ତି । ଏହା ପରେ କୁହାଯାଉଛି ଯେ ଅଭିନେତା ବିଜୟ ପୂରା ସମୟ ରାଜନୀତିରେ ଯୋଗଦେବାକୁ ନିଷ୍ପତ୍ତି ନେଇଛନ୍ତି । ତେବେ ର୍ତ୍ତମାନ ସେ ରାଜନୀତିରେ ପ୍ରବେଶ କରିବା ନେଇ ନିଜ ଫ୍ୟାନ୍ସଙ୍କୁ ଆଉ ଏକ ଖୁସି ଖବର ଦେଇଛନ୍ତି ।
