ମୁମ୍ବାଇ: ଇତିହାସ ରଚିଲା '12th ଫେଲ' । ବିକ୍ରାନ୍ତ ମାସି ଏବଂ ମେଧା ଶଙ୍କରଙ୍କ ଅଭିନୀତ ଏହି ଫିଲ୍ମ ବକ୍ସ ଅଫିସରେ ଇତିହାସ ସୃଷ୍ଟି କରିଛି । ଅକ୍ଟୋବର 27 2023ରେ ମୁକ୍ତିଲାଭ କରିଥିବା ଏହି ଫିଲ୍ମ ପ୍ରେକ୍ଷାଳୟରେ 25 ସପ୍ତାହ ପୂରଣ କରିଛି । ଫିଲ୍ମ ମେକରସ୍ ଫିଲ୍ମର ସିଲଭର ଜୁବଲି ପାଳନ କରୁଛନ୍ତି । 12th ଫେଲ ବିଧୁ ବିନୋଦ ଚୋପ୍ରାଙ୍କ ଦ୍ୱାରା ନିର୍ଦ୍ଦେଶିତ ଏବଂ ଜି ଷ୍ଟୁଡିଓ ଦ୍ବାରା ନିର୍ମିତ ହୋଇଛି । 12th ଫେଲ, ଆଇପିଏସ୍ ଅଧିକାରୀ ମନୋଜ କୁମାର ଶର୍ମା ଏବଂ ଆଇଆରଏସ ଅଧିକାରୀ ଶ୍ରଦ୍ଧା ଯୋଶୀଙ୍କ ଦମଦାର ଯାତ୍ରା ଉପରେ ପ୍ରସ୍ତୁତ ହୋଇଛି ।
12th ଫେଲ UPSC ପାଇଁ ପ୍ରସ୍ତୁତ ହେଉଥିବା UPSC ଛାତ୍ରମାନଙ୍କ ଜୀବନ, ସେମାନଙ୍କର ଧୌର୍ଯ୍ୟ, କଠିନ ପରିଶ୍ରମ, ମନୋଭାବ ଏବଂ ବନ୍ଧୁତା ଉପରେ ଆଧାରିତ ହୋଇଥିବାରୁ ଏହାକୁ ଏପର୍ଯ୍ୟନ୍ତ ଦର୍ଶକ ପସନ୍ଦ କରୁଛନ୍ତି । କହିରଖୁଛୁ, ଏହାପୂର୍ବରୁ 2001 ମସିହାରେ ସନି ଦେଓଲ ଏବଂ ଅମିଶା ପଟେଲଙ୍କ ଅଭିନୀତ ରୋମାଣ୍ଟିକ-ଡ୍ରାମା ଚଳଚ୍ଚିତ୍ର 'ଗଦର' ଏତେ ଦିନ ଧରି ପ୍ରେକ୍ଷାଳୟରେ ଦର୍ଶକଙ୍କ ମନ କିଣିଥିଲା । ରିଲିଜ୍ ପୂର୍ବରୁ ଦିଲ୍ଲୀ, ମୁମ୍ବାଇ ଏବଂ ଭୋପାଳରେ ନିର୍ମାତାମାନେ '12th ଫେଲ'ର ସ୍ପେଶାଲ ସ୍କ୍ରିନିଂ ଆୟୋଜନ କରିଥିଲେ । ବିଶେଷ କରି ଭୋପାଳରେ ସ୍କ୍ରିନିଂ ସମୟରେ 200 ଛାତ୍ର ସେମାନଙ୍କ ପିତାମାତାଙ୍କ ସହ ବିକ୍ରାନ୍ତ ମାସିଙ୍କ ଫିଲ୍ମ '12th ଫେଲ' ଦେଖିଥିଲେ । ଫିଲ୍ମ ଦେଖିବା ପରେ ସମସ୍ତେ ପସନ୍ଦ କରିଥିବା ବେଳେ ଫିଲ୍ମର ସମୀକ୍ଷା ଭଲ ରହିଥିଲା ।