କେନ୍ଦ୍ରାପଡା: ପର୍ଯ୍ୟଟକ ମାନଙ୍କ ପାଇଁ ଖୁସି ଖବର । ଭିତରକନିକା ଜାତୀୟ ଉଦ୍ୟାନରେ ବଢ଼ିଲେ ବଉଳା କୁମ୍ଭୀର । ଗତବର୍ଷ ତୁଳନାରେ ଚଳିତବର୍ଷ ପନ୍ଦରଟି କୁମ୍ଭୀର ବଢିଥିବା ନେଇ ସୂଚନା ଦେଇଛନ୍ତି ରାଜନଗର ବନଖଣ୍ଡ ଅଧିକାରୀ ସୁଦର୍ଶନ ଗୋପୀନାଥ ଯାଦବ ।
ବଢିଲେ 15 ବଉଳା କୁମ୍ଭୀର:
ରାଜନଗର ବନଖଣ୍ଡ ଅଧିକାରୀ ସୁଦର୍ଶନ ଗୋପୀନାଥ ଯାଦବ କହିଛନ୍ତି, ‘ଚଳିତବର୍ଷ 22ଟି ଟିମ୍ ଗଠନ କରାଯାଇ 19 ତାରିଖରୁ 21 ତାରିଖ ପର୍ଯ୍ୟନ୍ତ ଗଣନା କରାଯାଇଥିଲା । ଦିନ ବେଳେ ବଡ଼ ଓ ରାତିରେ ଟର୍ଚ୍ଚ ଲାଇଟ୍ ମାଧ୍ୟମରେ 6 ଫୁଟରୁ କମ୍ କୁମ୍ଭୀର ଗଣନା କରାଯାଇଥିଲା । ଗତବର୍ଷ 1811ଟି କୁମ୍ଭୀର ଗଣନା କରାଯାଇଥିବା ବେଳେ ଚଳିତବର୍ଷ 1826କୁ ଏହି କୁମ୍ଭୀର ସଂଖ୍ୟା ବୃଦ୍ଧି ହୋଇଛି ।’
- ବଢିଲେ ବଉଳା କୁମ୍ଭୀରଙ୍କ ସଂଖ୍ୟା
- ଗତବର୍ଷ ଥିଲେ 1811 କୁମ୍ଭୀର
- ଚଳିତ ବର୍ଷ ଏହି ସଂଖ୍ୟା ପହଞ୍ଚିଛି 1826କୁ
3 ଦିନ ଚାଲିଥିଲା କୁମ୍ଭୀର ଗଣନା:
ଭିତରକନିକାରେ 3 ଦିନ ଧରି ଚାଲିଥିଲା କୁମ୍ଭୀର ଗଣନା । ଗତ 19 ଜାନୁଆରୀରୁ 21 ଜାନୁଆରୀ ପର୍ଯ୍ୟନ୍ତ କୁମ୍ଭୀର ଗଣନା କରାଯାଇଥିଲା । ଏଥିପାଇଁ 22ଟି ଟିମ ନିୟୋଜିତ ଥିଲେ । ତେବେ କୁମ୍ଭୀର ଗଣନା ପାଇଁ ଗତ 14ରୁ ପର୍ଯ୍ୟଟକଙ୍କ ପାଇଁ ଜାତୀୟ ଉଦ୍ୟାନକୁ ବନ୍ଦ କରାଯାଇଥିଲା ।
କୁମ୍ଭୀର ଗଣନା ରିପୋର୍ଟ (2025):
- ହାଚେଲିଂ(2 ଫୁଟିଆ) 585ଟି
- ୟାର୍ଲେଲିଂ (ବର୍ଷକର 2 ରୁ 3 ଫୁଟ) 403ଟି
- ଜୁଭେନାଇଲ (3ରୁ 6 ଫୁଟ) 328ଟି
- ସବ୍ଆଡଲ୍ଟ(6 ଫୁଟରୁ8 ଫୁଟ) 164ଟି
- ଆଡଲ୍ଟ(8 ଫୁଟରୁ ଅଧିକ) 346ଟି
କୁମ୍ଭୀର ଗଣନା ରିପୋର୍ଟ (2024)
- ହାଚେଲିଂ(2 ଫୁଟିଆ) 582ଟି
- ୟାର୍ଲେଲିଂ (ବର୍ଷକର 2 ରୁ 3 ଫୁଟ) 387ଟି
- ଜୁଭେନାଇଲ (3ରୁ 6 ଫୁଟ) 327ଟି
- ସବ୍ଆଡଲ୍ଟ(6 ଫୁଟରୁ 8 ଫୁଟ) 167ଟି
- ଆଡଲ୍ଟ(8 ଫୁଟରୁ ଅଧିକ) 348ଟି
କେବେଠୁ ହେଉଛି କୁମ୍ଭୀର ଗଣନା ?
1975 ମସିହାରେ ଭିତରକନିକାକୁ ବଉଳା କୁମ୍ଭୀର ମାନଙ୍କର ଅଭୟାରଣ୍ୟ ବା RAMSAR ସାଇଡ ଘୋଷଣା କରାଯିବା ପରେ 1976 ମସିହାରୁ ଭିତରକନିକାରେ କୁମ୍ଭୀର ଗଣନା ହୋଇଆସୁଛି । ପ୍ରତିବର୍ଷ ଜାନୁଆରୀ ମାସରେ 8 ରୁ 10 ଦିନ ପର୍ଯ୍ୟନ୍ତ ଜାତୀୟ ଉଦ୍ୟାନକୁ ପର୍ଯ୍ୟଟକ ମାନଙ୍କ ପାଇଁ ବନ୍ଦ ରଖାଯାଇ ବନ୍ଦର ଶେଷ 3 ଦିନରେ କୁମ୍ଭୀର ବିଶାରଦ,ପ୍ରାଣୀ ବିଶାରଦ,ବନ କର୍ମଚାରୀ ମାନଙ୍କ ସହାୟତାରେ ଏହି କୁମ୍ଭୀର ଗଣନା କାର୍ଯ୍ୟ କରାଯାଇଥାଏ ।
କିପରି କରାଯାଏ କୁମ୍ଭୀର ଗଣନା:
ଭିତରକନିକାକୁ ଜାତୀୟ ଉଦ୍ୟାନ ତଥା କୁମ୍ଭୀର ମାନଙ୍କର ଏନ୍ତୁଡ଼ିଶାଳ ଭାବରେ ପରିଚୟ ଦେବାକୁ ଚେଷ୍ଟା କରିଥିବା ଡଃ ସୁଧାକର କର କହିଛନ୍ତି,"ସାଧାରଣତଃ ଶୀତ ଦିନରେ କୁମ୍ଭୀର ମାନଙ୍କର ଗଣନା କରାଯାଏ । ଦିନରେ ଓ ରାତିରେ ମଧ୍ୟ କୁମ୍ଭୀର ମାନଙ୍କୁ ଗଣାଯାଏ । ଦିନବେଳେ ବଡ ବୋଟ ସାହାଯ୍ୟରେ ବଡ କୁମ୍ଭୀର ମାନଙ୍କର ଗଣନା କରାଯାଉଥିବା ବେଳେ ରାତିରେ ଆହୁଲାମରା ଡଙ୍ଗା ସାହାଯ୍ୟରେ ଛୋଟଛୋଟ କୁମ୍ଭୀର ମାନଙ୍କର ଗଣନା ହୁଏ । ବୋଟ, ଡଙ୍ଗା, ବାଇନାକୁଲାର,GPS,କ୍ୟାମେରା ଆଦି ଗଣନା ବେଳେ ବ୍ୟବହାର କରାଯାଏ । ’
ସେହିପରି ସେଞ୍ଚୁରିଆନ ୟୁନିଭରସିଟିର ପ୍ରାଣୀବିଜ୍ଞାନ ବିଭାଗର ପ୍ରାଧ୍ୟାପକ ଡ଼ଃ ଶିବପ୍ରସାଦ ପରିଡ଼ା କହିଛନ୍ତି,"ନିର୍ଦ୍ଦିଷ୍ଟ ସ୍ଥାନରେ GPS ଟ୍ରାକ ମାଧ୍ୟମରେ ଗଣନା କରାଯାଏ । ରାତିରେ କୁହୁଡି ଯୋଗୁ ଅନେକ ସମସ୍ୟାର ସମ୍ମୁଖୀନ କରିବାକୁ ପଡ଼ିଥାଏ ତାହାରି ମଧ୍ୟରେ ଗଣାଯାଏ ।’
ଇଟିଭି ଭାରତ, କେନ୍ଦ୍ରାପଡା
