ଶ୍ରୀନଗର: ଘାଟିରେ ସୁରକ୍ଷାବଳକୁ ବଡ ସଫଳତା । ଉଧମପୁର ଏରିଆରେ ଆଜି ସକାଳୁ ଜାରି ରହିଥିବା ଏନକାଉଣ୍ଟରରେ ୩ ଆତଙ୍କୀଙ୍କୁ ନିପାତ କରିଛି ସେନା । ଏବେ ମଧ୍ୟ ଏନକାଉଣ୍ଟର ଜାରି ରହିଛି । ଏକାଧିକ ଆତଙ୍କୀ ଉକ୍ତ ଅଞ୍ଚଳରେ ଆତ୍ମଗୋପନ କରିଥିବା ଇନପୁଟ ସୂଚନା ମିଳିବା ପରେ ସେନା ଓ ପାରା ମିଲିଟାରୀ ଫୋର୍ସ ଓ ସ୍ଥାନୀୟ ପୋଲିସର ମିଳିତ ଟିମ୍ ଅପରେସନ ଆରମ୍ଭ କରିଥିଲେ । ଏବେ ପୁରା ଏରିଆକୁ କର୍ଡନ କରାଯାଇ ସର୍ଚ୍ଚ ଅପରେସନକୁ ଜୋରଦାର କରାେଯାଉଛି ।
ନିକଟରେ କାଶ୍ମୀରରେ ବିଧାନସଭା ନିର୍ବାଚନ ହେବାକୁ ଯାଉଥିବା ବେଳେ ଆତଙ୍କୀ ହମଲାର ଆଶଙ୍କା ମଧ୍ୟ ରହିଛି । ତେଣୁ ସୁରକ୍ଷା ବଳ ଗୁଇନ୍ଦା ସଂସ୍ଥା ସମନ୍ବୟରେ ନିୟମିତ ଆତଙ୍କୀ ଗତିବିଧି ଉପରେ ନଜର ରଖିଛି । ଇନପୁଟ ସୂଚନା ଆଧାରରେ ତୁରନ୍ତ ଅପରେସନ ମଧ୍ୟ କରାଯାଉଛି । ଆଜି ଉଧମପୁର ଅଞ୍ଚଳରେ ଆତଙ୍କବାଦୀଙ୍କ ଏକ ଗୋଷ୍ଠୀ ଆତ୍ମଗୋପନ କରିଥିବା ସୂଚନା ମିଳିବା ପରେ ସେନାର ପାରା-ସ୍ପେଶାଲ ଫୋର୍ସ, ଏସଓଜି ଓ କାଶ୍ମୀର ପୋଲିସର ସଶସ୍ତ୍ର ଟିମ ଅପରେସନ ଆରମ୍ଭ କରିଥିଲେ ।
- ଆଜି ସକାଳେ ଭାରତୀୟ ପୋଷ୍ଟକୁ କରିଥିଲା ପାକିସ୍ତାନ ସେନା:-
ଅନ୍ୟପଟେ ଆଜି ସକାଳେ ନିୟନ୍ତ୍ରଣ ରେଖାରେ ଥିବା ଭାରତୀୟ ପୋଷ୍ଟକୁ ପାକିସ୍ତାନ ସେନା ଅତର୍କିତ ଗୁଳିମାଡ କରିଥିଲା । ଏଥିରେ ଜଣେ ‘ବିଏସଏଫ’ ଯବାନ ଆହତ ହୋଇଥିଲେ । ତାଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଥିଲା ଓ ସେ ଏବେ ଚିକିତ୍ସାଧୀନ ରହିଛନ୍ତି । ଭାରତୀୟ ସୁରକ୍ଷା ବଳର ଧ୍ୟାନ ହଟାଇ ଆତଙ୍କୀଙ୍କୁ ଅନୁପ୍ରବେଶ କରାଇବାରେ ସହଯୋଗ କରିବା ପାଇଁ ପାକିସ୍ତାନ ରେଞ୍ଜର୍ସ ଟିମ୍ ଏପରି ସିଜ-ଫାଏର ଉଲ୍ଲଂଘନ କରିବାର ଏକାଧିକ ନଜିର ରହିଛି । ଆଜି ମଧ୍ୟ ସେହିପରି କିଛି ଷଡଯନ୍ତ୍ରରେ ଭାରତୀୟ ପୋଷ୍ଟକୁ ଟାର୍ଗେଟ କରାଯାଇଥିବା ସନ୍ଦେହ କରାଯାଉଛି ।