ରାୟପୁର: ଛତିଶଗଡର ସର୍ବାଧିକ ନକ୍ସଲ ପ୍ରଭାବିତ ସୁକମାରେ ସୁରକ୍ଷାବଳକୁ ସଫଳତା ମିଳିଛି । ବୁର୍କଲଙ୍କା ଓ ବଡେ କେଡବାଲ ଜଙ୍ଗଲରେ ସର୍ଚ୍ଚ ଅପରେସନ ବେଳେ ସୁରକ୍ଷା ବାହିନୀ ଏକ ନକ୍ସଲ କ୍ୟାମ୍ପକୁ ଧ୍ବଂସ କରିଛନ୍ତି । ବହୁମାତ୍ରାରେ ନକ୍ସଲ ସାମଗ୍ରୀ ଓ ବିସ୍ଫୋରକ ଜବତ ହୋଇଛି । ବମ ନିଷ୍କ୍ରିୟକାରୀ ଟିମ ଜଙ୍ଗଲ ମଧ୍ୟରେ ଏହି ବିସ୍ଫୋରକ ସାମଗ୍ରୀକୁ ନଷ୍ଟ କରିଛି । ଇନଫର୍ମର ମାଧ୍ୟମରେ ଖବର ପାଇ ସ୍ଥାନୀୟ ପୋଲିସ ଓ କେନ୍ଦ୍ରୀୟ ଫୋର୍ସ ମିଳିତ ଭାବେ ଏହି ଅପରେସନରେ ସାମିଲ ହୋଇଥିଲେ । ହେଲେ କୌଣସି ସୂତ୍ରରୁ ସୂଚନା ପାଇ ନକ୍ସଲମାନେ କ୍ୟାମ୍ପ ଛାଡି ପଳାଇଥିଲେ । ନକଟବର୍ତ୍ତୀ ଜଙ୍ଗଲରେ କମ୍ବିଂ ଅପରେସନକୁ କଡାକଡି କରାଯାଇଛି ।
ତେବେ ସୂଚନା ଅନୁସାରେ,ବୁର୍କଲଙ୍କା ଓ ବଡେ କେଡବାଲ ଜଙ୍ଗଲ ଓ ଆଖପାଖ ଏରିଆରେ କୁଖ୍ୟାତ ମାଓନେତା କୁହରାମ ରାଜୁ ଓ ବେଟ୍ଟି ମଙ୍ଗଡୁଙ୍କ ନେତୃତ୍ବରେ ପ୍ରାୟ 30 ରୁ 40 ନକ୍ସଲ ଏକାଠି ହୋଇଥିବା ଖବର ମିଳିଥିଲା । ସେମାନେ ଜଙ୍ଗଲରେ ଅସ୍ଥାୟୀ କ୍ୟାମ୍ପ କରିବା ସହ କିଛି ବଡଧରଣର ଆକ୍ରମଣ ଘଟାଇବା ଯୋଜନାରେ ଥିଲେ । କ୍ୟାମ୍ପରେ ବିସ୍ଫୋରକ ସାମଗ୍ରୀ ମଧ୍ୟ ରଖିଥିଲେ । ଏହି ଆଧାରରେ ସ୍ଥାନୀୟ ପୋଲିସ, ବସ୍ତର ଫାଇଟର ଫୋର୍ସ, ଡିଆରଜି ଓ କେନ୍ଦ୍ରୀୟ ଫୋର୍ସର ଯବାନ ମିଳିତ ଅପରେସନରେ ବାହାରିଥିଲେ । ଆଜି ସକାଳୁ ଜଙ୍ଗଲରେ ସର୍ଚ୍ଚ ଓ କମ୍ବିଂ ଅପରେସନକୁ ଜୋରଦାର କରାଯାଇଥିଲା । ତେବେ କୌଣସି ସୂତ୍ରରୁ ସୂଚନା ପାଇଁ ନକ୍ସଲମାନେ କ୍ୟାମ୍ପ ଛାଡି ଜଙ୍ଗଲ ମଧ୍ୟକୁ ଖସି ଯାଇଥିବା ସନ୍ଦେହ କରାଯାଇଛି ।