ସମାଧି ନେଲେ ଜୈନ ମୁନି ଆଚାର୍ଯ୍ୟ ବିଦ୍ୟାସାଗର, 3 ଦିନ ଧରି ରଖିଥିଲେ ଉପବାସ

Acharya Vidyasagar Took Samadhi: ସମାଧି ନେଲେ ଜୈନ ମୁନି ଆଚାର୍ଯ୍ୟ ବିଦ୍ୟାସାଗର । ଜୈନ ମୁନିଙ୍କ ଦେହତ୍ୟାଗରେ ଶୋକବ୍ୟକ୍ତ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଅଧିକ ପଢନ୍ତୁ

ରାୟପୁର: ଦେହତ୍ୟାଗ କଲେ ଜୈନ ମୁନି ଆଚାର୍ଯ୍ୟ ବିଦ୍ୟାସାଗର । ଜୈନ ସମ୍ପ୍ରଦାୟର 'ମହାବୀର' ଆଚାର୍ଯ୍ୟ ବିଦ୍ୟାସାଗର ମହାରାଜ ଗତକାଲି (ଶନିବାର) ବିଳମ୍ବିତ ରାତିରେ ସମାଧି ନେଇଛନ୍ତି । ସୂଚନା ଅନୁସାରେ, ସେ 3 ଦିନ ଧରି ଉପବାସ ବ୍ରତ ରଖିଥିଲେ । ସମାଧି ନେବା ପୂର୍ବରୁ 3 ଦିନ ଧରି ଅନ୍ନ ଜଳ ତ୍ୟାଗ କରି ଏଭଳି ବ୍ରତ ଅବଲମ୍ବନ କରିଥିବାବେଳେ ଶନିବାର ତାଙ୍କର ପରଲୋକ ହୋଇଛି । ଛତିଶଗଡ଼ର ଡୋଙ୍ଗରଗଡ଼ରେ ଦେହତ୍ୟାଗ କରିଛନ୍ତି ଜୈନ ମୁନି ଆଚାର୍ଯ୍ୟ ବିଦ୍ୟାସାଗର । ତାଙ୍କର ପରଲୋକକୁ ନେଇ ଶୋକବ୍ୟକ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହାସହ ସେ ନିଜର ଏକ୍ସ ହ୍ୟାଣ୍ଡେଲରେ ଆଚାର୍ଯ୍ୟ ବିଦ୍ୟାସାଗରଙ୍କୁ ସାକ୍ଷାତ ସମୟର ଫଟୋ ସେୟାର କରିଛନ୍ତି ।

ଆଚାର୍ଯ୍ୟ ବିଦ୍ୟାସାଗର ଅନ୍ୟ ଜୈନ ମୁନିଙ୍କ ଉପସ୍ଥିତିରେ ସଂଘ ସମ୍ବନ୍ଧୀୟ ସମସ୍ତ କାର୍ଯ୍ୟରୁ ନିଜକୁ ନିବୃତ୍ତ ନେଇ ଘୋଷଣା କରିଥିଲେ । ଏହାସହ ଆଚାର୍ଯ୍ୟ ପଦ ମଧ୍ୟ ତ୍ୟାଗ କରିଥିଲେ । ତେବେ ଗତ କିଛି ଦିନ ଧରି ଅସୁସ୍ଥ ଥିଲେ ଆଚାର୍ଯ୍ୟ ବିଦ୍ୟାସାଗର ମହାରାଜ । ଛତିଶଗଡ଼ର ଡୋଙ୍ଗରଗଡ଼ ପର୍ବତ ଜୈନ ସମାଜର ପ୍ରମୁଖ ଧାର୍ମିକ ସ୍ଥଳ ହୋଇଥିବାବେଳେ ସେଠାରେ ସେ ରହିଆସୁଥିଲେ । ସେହି ସ୍ଥାନରେ ହିଁ ଜୈନ ମୁନି ଶେଷ ନିଶ୍ବାସ ତ୍ୟାଗ କରିଛନ୍ତି ।

ଗତବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୈନ ମୁନି ଆଚାର୍ଯ୍ୟ ବିଦ୍ୟାସାଗରଙ୍କୁ ସାକ୍ଷାତ କରିଥିଲେ । ବିଧାନସଭା ନିର୍ବାଚନର କିଛି ମାସ ପୂର୍ବରୁ ଡୋଙ୍ଗରଗଡ଼ ଗସ୍ତ କରିଥିଲେ ମୋଦି । ବିଭିନ୍ନ ବିଷୟରେ ଆଲୋଚନା କରିବା ସହ ଆଚାର୍ଯ୍ୟ ବିଦ୍ୟାସାଗରଙ୍କ ଆଶୀର୍ବାଦ ନେଇଥିଲେ । ଏହି ସାକ୍ଷାତ ସମୟର ଫଟୋ ନିଜ ସୋସିଆଲ ମିଡିଆ ହ୍ୟାଣ୍ଡେଲରେ ସେୟାର କରିଥିଲେ ପ୍ରଧାନମନ୍ତ୍ରୀ । ଜୈନ ଶାସ୍ତ୍ର ଏବଂ ଦର୍ଶନ ଶାସ୍ତ୍ରର ଅଧ୍ୟୟନ କରିଆସୁଥିଲେ ଆଚାର୍ଯ୍ୟ ବିଦ୍ୟାସାଗର । ସଂସ୍କୃତ ସହ ଅନେକ ଭାଷାରେ ମଧ୍ୟ ତାଙ୍କର ଦକ୍ଷତା ରହିଥିଲା । ଏପରିକି ସେ ବିଭିନ୍ନ ଭାଷାରେ ଆଧ୍ୟାତ୍ମିକ ପୁସ୍ତକ ରଚନା କରିଛନ୍ତି । ନିରଞ୍ଜନ ଶତାକା, ବବନ ଶତାକା, ସୁନୀତି ଶତାକା ଭଳି ଜୈନ ସମ୍ପ୍ରଦାୟର ଆଧ୍ୟାତ୍ମିକ ପୁସ୍ତକ ସେ ରଚନା କରିଛନ୍ତି । ସେ 1946 ମସିହା ଅକ୍ଟୋବର 10 ତାରିଖରେ କର୍ଣ୍ଣାଟକର ସାଦାଲଗାରେ ଜନ୍ମଗ୍ରହଣ କରିଥିଲେ । ମାତ୍ର 26 ବର୍ଷ ବୟସରେ ଆଚାର୍ଯ୍ୟ ହୋଇଥିବାବେଳେ 77 ବର୍ଷ ବୟସରେ ଦେହତ୍ୟାଗ କରିଛନ୍ତି ଆଚାର୍ଯ୍ୟ ବିଦ୍ୟାସାଗର ।