ଜୟପୁର: ଗଣ ବିବାହ ବା ସାମୂହିକ ବିବାହ, ଏହା ବିଷୟରେ ସଭିଏଁ ଅଳ୍ପ ବହୁତ ଜାଣିଛନ୍ତି । ଏ ପ୍ରକାର ବିବାହରେ ଏକାଠି ଏକ ସମୟରେ ଅନେକ ସଂଖ୍ୟକ ପୁଅ ଝିଅ ପରସ୍ପର ସହିତ ବୈବାହିକ ବନ୍ଧନରେ ବାନ୍ଧି ହୋଇଥାନ୍ତି । କିନ୍ତୁ ରାଜସ୍ଥାନରେ ଗୋଟିଏ ପରିବାରର ଏକା ସହିତ ୧୭ ଜଣ ସଦସ୍ୟଙ୍କ ବିବାହ ଏକ ସମୟରେ ହୋଇଛି । କଥାଟା ଗପ ଲାଗୁଥିଲେ ମଧ୍ୟ ଏକ ଦମ୍ ସତ କଥା ।
ରାଜସ୍ଥାନର ବିକାନେରର ନୋଖା ଅନ୍ତର୍ଗତ ଲାଲମଦେସର ଗାଁରେ ନିବାସୀ ସୁରଜାରାମ ଗୋଦାରା ସପରିବାର ସେଠାରେ ରହୁଛନ୍ତି । ତେବେ ସୁରଜାରାମ ନିଜର ସଂଯୁକ୍ତ ପରିବାରରେ ଥିବା ବିବାହଯୋଗ୍ୟ ନାତି ଓ ନାତୁଣୀମାନଙ୍କ ବିବାହ ଗୋଟିଏ ସମୟ ଓ ଗୋଟିଏ ମଣ୍ଡପରେ କରାଇବା ଘଟଣା ସ୍ଥାନୀୟ ଅଞ୍ଚଳରେ ବେଶ୍ ଚର୍ଚ୍ଚାର ବିଷୟ ପାଲଟିଛି । ତେବେ ଆଜିର ସମାଜରେ ଯେଉଁଠି ଲୋକମାନେ ଏକକ ପରିବାରକୁ ଆପଣାଉଥିବା ବେଳେ, ସୁରଜାରାମଙ୍କ ସଂଯୁକ୍ତ ପରିବାର ପାରିବାରିକ ସ୍ନେହ ଓ ସୌହାର୍ଦ୍ଦ୍ୟର ଉଦାହରଣ ସୃଷ୍ଟି କରିଛି । ଏହାସହ ବହୁ ବିବାହ ଜନିତ ଖର୍ଚ୍ଚକୁ କିଭଳି ଭାବେ ସୁନିୟୋଜିତ ଉପାୟରେ କମ୍ କରି ହେବ ତାକୁ ଦର୍ଶାଇଛନ୍ତି ସୁରଜାରାମଙ୍କ ପରିବାର । ଯାହାକୁ ନେଇ ବେଶ ପ୍ରଶଂସା ସାଉଁଟିଛନ୍ତି ଗୋଦାରା ପରିବାର ।