ନୂଆଦିଲ୍ଲୀ: ବହୁଚର୍ଚ୍ଚିତ ଦିଲ୍ଲୀ ଅବକାରୀ ଘୋଟାଲା ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟର 5ଟି ସମନକୁ ଏଡାଇ ଯାଇଥିବା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ଅଡୁଆ ବଢିଛି । ଏବେ ଏହି ମାମଲାରେ ହାଜର ହେବା ପାଇଁ କୋର୍ଟରୁ ଡାକରା ଆସିଛି । କେଉଁ କାରଣରୁ ପ୍ରବର୍ତ୍ତନ ନିର୍ଦ୍ଦେଶାଳୟ ଦ୍ବାରା ଜାରି କ୍ରମାଗତ 5 ସମନକୁ ଏଡାଇଲେ, ସେ ନେଇ ହାଜର ହୋଇ ପକ୍ଷ ରଖିବାକୁ କୋର୍ଟ କହିଛନ୍ତି । 17 ତାରିଖରେ କେଜ୍ରିଓ୍ବାଲ ଦିଲ୍ଲୀର ରାଉଜ ଆଭିନ୍ୟୁ କୋର୍ଟରେ ବ୍ୟକ୍ତିଗତ ଭାବେ ହାଜର ହୋଇ ପକ୍ଷ ରଖିବେ । ଫେବୃଆରୀ 3 ତାରିଖରେ କେଜ୍ରିଓ୍ବାଲଙ୍କ ବିରୋଧରେ ରାଉଜ ଆଭିନ୍ୟୁ କୋର୍ଟରେ କେନ୍ଦ୍ରୀୟ ସଂସ୍ଥା ଏହି ମାମଲା ଦାଏର କରିଥିଲା ।
ତେବେ କୋର୍ଟଙ୍କ ଏହି ସମନକୁ ଆମ ଆଦମୀ ପାର୍ଟି ସ୍ବୀକାର କରିଛି । କେଜ୍ରିଓ୍ବାଲ ନିର୍ଦ୍ଧାରିତ ତାରିଖରେ କୋର୍ଟରେ ହାଜର ହେବେ । ତଦନ୍ତକାରୀ ସଂସ୍ଥା ତାଙ୍କୁ ବାରମ୍ବାର ଜାରି କରିବାରେ ଲାଗିଥିବା ସମନକୁ ବେଆଇନ ବୋଲି ସେ କୋର୍ଟରେ ତର୍କ ମଧ୍ୟ ରଖିବେ ବୋଲି ଦଳ କହିଛି । ଯଦି କେଜ୍ରିଓ୍ବାଲ 17ରେ ହାଜର ନହୁଅନ୍ତି, ତେବେ ଏହାକୁ ଅଦାଲତ ଅବମାନନା ଭାବେ ଗ୍ରହଣ କରାଯିବ ।
ଏହି ବହୁଚର୍ଚ୍ଚିତ ମାମଲାରେ ଏକାଧିକ ‘ଆପ’ ନେତା ଏବେ ଗିରଫ ହୋଇ ଜେଲରେ ଅଛନ୍ତି । ତେବେ ଏହି ମାମଲାରେ ନଭେମ୍ବର 2 ତାରିଖରେ ମୁଖ୍ୟମନ୍ତ୍ରୀ କେଜ୍ରିଓ୍ବାଲଙ୍କୁ ପ୍ରଥମଥର ପ୍ରବର୍ତ୍ତନ ନିର୍ଦ୍ଦେଶାଳୟ ଜେରା ପାଇଁ ସମନ କରିଥିଲା । ତେବେ ସେ ହାଜର ନହେବା କାରଣରୁ ତାଙ୍କୁ କ୍ରମାଗତ ସମନ କରିଥିଲା ଇଡି । ତେବେ ତାଙ୍କୁ ଗତ ସପ୍ତାହରେ 5ମ ସମନରେ ହାଜର ହେବା ପାଇଁ କୁହାଯାଇଥିଲା । ସେ ଏହାକୁ ମଧ୍ୟ ଏଡାଇ ଯାଇଥିଲେ । ଏହା ପରେ ତଦନ୍ତକାରୀ ସଂସ୍ଥା କୋର୍ଟର ଦ୍ବାରସ୍ଥ ହୋଇଥିଲା ।