କେଜ୍ରିୱାଲଙ୍କ ଜାମିନ ଖାରଜ, ପୁଣି ବଢିଲା ନ୍ୟାୟିକ ହେପାଜତ ଅବଧି - Kejriwal Bail Plea Rejected

Kejriwal Bail Plea Rejected: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଜାମିନ ଖାରଜ ହୋଇଛି । ଏହାସହ ତାଙ୍କର ନ୍ୟାୟିକ ହେପାଜତ ଅବଧି ବୃଦ୍ଧି କରିଛନ୍ତି କୋର୍ଟ । ଅଧିକ ପଢନ୍ତୁ

ନୂଆଦିଲ୍ଲୀ: କେଜ୍ରିୱାଲଙ୍କ ଜାମିନ ଖାରଜ । ଆଜି (ବୁଧବାର) ରାଉଜ ଆଭେନ୍ୟୁ କୋର୍ଟ ଏହି ଆବେଦନ ଖାରଜ କରିଛନ୍ତି । ଏହାସହ କେଜ୍ରିୱାଲଙ୍କ ନ୍ୟାୟିକ ହେପାଜତ ଅବଧି ୧୯ ଜୁନ ଯାଏଁ ବୃଦ୍ଧି କରାଯାଇଛି । ଯାହାର ଶୁଣାଣି କରିଛନ୍ତି ସ୍ପେଶାଲ ଜଜ୍ କାବେରୀ ବାବେଜା । ଇଡି ପକ୍ଷରୁ କୁହାଯାଇଛି ଯେ, କେଜ୍ରିୱାଲଙ୍କୁ ଯେଉଁ ଔଷଧ ଦିଆଯାଉଛି ତାହା ସୁଗାର କମ୍ କରିବା ପାଇଁ ସହାୟକ ହୋଇଥାଏ । କେଜ୍ରିୱାଲ ଜେଲରୁ ବାହାରିବା ପରେ ଅନେକ ଶୋଭାଯାତ୍ରାରେ ସାମିଲ ହୋଇଛନ୍ତି । କେଜ୍ରିୱାଲ କିନ୍ତୁ ମେ ୨୦ରେ କିଟୋନ ବଢିବା ନେଇ ଡାକ୍ତରଙ୍କୁ କହିନଥିଲେ । ବରଂ ୨୪ ମେ ରେ ସେ ଏହି ଅଭିଯୋଗ ଆଣିଥିଲେ । ଯାହାଦ୍ବାରା ତାଙ୍କୁ ଅନ୍ତରୀଣ ଜାମିନ ମିଳିପାରିବ ।

୧ ସପ୍ତାହ ପାଇଁ ଜାମିନ କାହିଁକି ଆବଶ୍ୟକ ବୋଲି କୋର୍ଟ ପ୍ରଶ୍ନ କରିଥିଲେ । ଏହି ପ୍ରଶ୍ନ କୋର୍ଟ କେଜ୍ରିୱାଲଙ୍କ ଓକିଲ ଏନ ହରିହରନଙ୍କୁ ପଚାରିଥିଲେ । ଯାହାର ଉତ୍ତର ରଖି ହରିହରନ କହିଥିଲେ, "ଏହି ସ୍ବାସ୍ଥ୍ୟ ପରୀକ୍ଷା ପାଇଁ କେଇ ଘଣ୍ଟା ଲାଗିପାରେ । କାରଣ ହୋଲଟର ଟେଷ୍ଟ ସମୟ ସାପେକ୍ଷ । ଏଥିପାଇଁ ଆବଶ୍ୟକୀୟ ସମସ୍ତ ପଦ୍ଧତି ପୂରଣ ପରେ ଟେଷ୍ଟ କରାଯାଏ ।"

କେଜ୍ରିୱାଲଙ୍କ ଓକିଲ ଉତ୍ତର ରଖିବା ପରେ ସଲିସିଟର ଜେନେରାଲ ତୁସାର ମେହଟ୍ଟା ଏବଂ ଏନ ବି ରାଜୁ କହିଛନ୍ତି, ଏହି ଟେଷ୍ଟ ଗତ ୨୫ ରୁ ୧ ତାରିଖ ମଧ୍ୟରେ କରାଯାଇପାରିଥାନ୍ତା । ଏପରିକି ଯଦି ସମସ୍ତ ନିୟମର ଅନୁପାଳନ କରି କେଜ୍ରିୱାଲଙ୍କୁ ଜେଲ ଭିତରେ ଚିକିତ୍ସା ସୁବିଧା ଯୋଗାଇ ଦେବାପାଇଁ ବି କୁହାଯାଏ ତାହେଲେ ଏହା ଆଇନର ମଜାକ୍ ଉଡ଼ାଇଲା ଭଳି କଥା ହେବ । ଏହାପରେ ଏସ ବି ରାଜୁ କେଜ୍ରିୱାଲଙ୍କ ଏକ ଭିଡିଓ ଦେଖାଇ କହିଥିଲେ ଯେ, ସେ ସେପରି ଗୁରୁତର ନାହାନ୍ତି । ଏହି ରେକର୍ଡିଂ କେଉଁଠୁ ଆସିଲା ବୋଲି କୋର୍ଟ ପ୍ରଶ୍ନ କରିଥିଲେ । ଏହାର ଉତ୍ତର ରଖି ଏନ ବି ରାଜୁ କହିଥିଲେ ଯେ, ଏହି ଭିଡିଓଟି ହେଉଛି ଏକ ନ୍ୟୁଜ ଏଜେନ୍ସିର । ସୂଚନା ଅନୁସାରେ, ବର୍ତ୍ତମାନ କେଜ୍ରିୱାଲଙ୍କ ନ୍ୟାୟିକ ହେପାଜତ ଅବଧି ୧୯ ଜୁନ ଯାଏଁ ବୃଦ୍ଧି କରାଯାଇଛି ।