शिवजयंतीला किल्ले शिवनेरीवर असा असेल बंदोबस्त, शिवभक्तांनी सकाळी 10 नंतर किल्ल्यावर येण्याचं पोलिसांचं आवाहन

पुणे Shiv Jayanti 2024 : येत्या 19 तारखेला शिवजयंती असून किल्ले शिवनेरीवर मोठ्या संख्येनं शिवभक्त येत असतात. तसंच राज्याचे मुख्यमंत्री यांच्या प्रमुख उपस्थितीत मुख्य कार्यक्रम हा होत असतो. यंदा देखील शिवजयंतीला शिवभक्त मोठ्या प्रमाणावर किल्ले शिवनेरीवर येणार आहेत. हे बघता शिवनेरीवर अकराशे पोलीस आणि होमगार्डचा बंदोबस्त तैनात केला जाणार आहे. शिवप्रेमींनी सकाळी 10 नंतर गडावर यावं, असं आवाहन पुणे ग्रामीण पोलीस अधीक्षक पंकज देशमुख यांनी केलं आहे. पोलीस अधीक्षक देशमुख म्हणाले की, दरवर्षी मुख्यमंत्र्यांच्या उपस्थितीत साडेनऊ वाजता शिवनेरी गडावरील कार्यक्रमास सुरुवात होते. मात्र, यावेळेस हा कार्यक्रम लवकर सुरू करण्यासाठी आणि साडेनऊ वाजता संपवण्यासाठी आम्ही प्रयत्न करत आहोत. हा कार्यक्रम संपला की, नागरिकांना दहा वाजल्यापासून गडावर सोडण्यात येणार आहे.