गणेश जन्म सोहळ्यानिमित्त श्रीमंत दगडूशेठ हलवाई गणपती मंदिरात भाविकांची मोठी गर्दी; पाहा व्हिडिओ - GANESH JAYANTI 2025

पुणे : प्रतिवर्षाप्रमाणं यंदाही माघ शुद्ध चतुर्थीला पुण्यातील श्रीमंत दगडूशेठ हलवाई गणपती मंदिरात गणेशजन्म सोहळा (Ganesh Jayanti 2025) थाटात साजरा करण्यात येत आहे. यानिमित्तानं मंदिराला आकर्षक फुलांची आरास आणि विद्युतरोषणाई करण्यात आली आहे. तसंच आज दिवसभर मंदिरात विविध कार्यक्रमांचं आयोजन करण्यात आलंय. गणेश जन्म सोहळ्याच्या निमित्तानं मंदिरात आज पहाटे 3 वाजता ब्रह्मणस्पती सूक्त अभिषेक करण्यात आला. तर पहाटे 4 ते 6 यावेळेत सुप्रसिद्ध गायिका प्रियांका बर्वे आणि त्यांच्यासोबत असलेल्या कलाकारांनी स्वराभिषेक कार्यक्रम सादर केला. त्यानंतर सकाळी 6 ते 11 आणि दुपारी 1.30 ते सायंकाळी 6 यावेळेत गणपती सूक्त अभिषेक होणार आहे. तसंच सकाळी 8 ते 11.30 आणि दुपारी 2 ते 5 वाजेपर्यंत गणेशयाग होणार आहे. सायंकाळी 6 वाजता नगरप्रदक्षिणा मिरवणूक निघेल. रात्री 8.30 वाजता श्रींची महाआरती होईल आणि रात्री 10 ते पहाटे 3 वाजेपर्यंत श्री गणेश जागर करण्यात येणार आहे, अशी माहिती यावेळी कोषाध्यक्ष महेश सूर्यवंशी यांनी दिली.