कुणी पती निधनानंतर रोवला विजयाचा झेंडा, कुणी नणंदेचा केला पराभव; जाणून घ्या लोकसभेतील विजयी 'रणरागिणी' - Lok Sabha Election Result 2024

Lok Sabha Election Result 2024 : लोकसभा निवडणूक निकाल 2024 मध्ये भाजपाला मोठा धक्का बसला. या निवडणुकीत सात महिलांनी विजय संपादन केला. यात चंद्रपूरच्या उमेदवार प्रतिभा धानोरकर, सोलापूरच्या उमेदवार प्रणिती शिंदे, सुप्रिया सुळे, स्मिता वाघ, रक्षा खडसे, वर्षा गायकवाड, शोभा बच्छाव आदींचा समावेश आहे.

हैदराबाद Lok Sabha Election Result 2024 : लोकसभा निवडणूक 2024 चा निकाल मंगळवारी 4 जूनला जाहीर करण्यात आला. या लोकसभा निवडणूक 2024 मध्ये अनेक धक्कादायक निकाल हाती आल्यानं अनेकांच्या तोंडचं पाणी पळालं आहे. चारशे पारचा नारा देणाऱ्या भाजपाचं स्वप्न धुळीला मिळालं आहे. त्यामुळे राज्यातील अनेक दिग्गज नेत्यांना पराभवाचा सामना करावा लागला. मात्र दुसरीकडं या निवडणुकीत महिला उमेदवारांनी चांगलीच बाजी मारली आहे. चंद्रपूरच्या उमेदवार प्रतिभा धानोरकर यांनी पतीच्या निधनानंतर डगमगून न जाता मोठ्या धैर्यानं लोकसभा निवडणूक लढवली. या निवडणुकीत धानोरकर यांनी भाजपाचे दिग्गज नेते सुधीर मुनगंटीवार यांचा पराभव केला.

बारामतीत नणंद भावजईमध्ये भावजई ठरली वरचढ : बारामती लोकसभा मतदार संघाच्या लढतीकडं देशभरातील नागरिकांचं लक्ष लागलं होतं. अत्यंत चुरशीच्या झालेल्या लढतीत भावजय असलेल्या सुप्रिया सुळे यांनी नणंद सुनेत्रा पवार यांच्यावर मोठ्या मताधिक्क्यानं विजय मिळवला. बारामती लोकसभा मतदार संघातील निवडणूक ही काका शरद पवार विरुद्ध पुतण्या अजित पवार अशीचं रंगली. यात काका शरद पवार यांची सरशी झाल्याचं दिसून आलं.

पती निधनानंतर मारली प्रतिभा धानोरकरांनी बाजी :चंद्रपूर लोकसभा मतदार संघाचे खासदार बाळू धानोरकर यांचं अकाली निधन झालं. त्यांच्या निधनानंतर काँग्रेसनं राज्यात एकमेव असलेला खासदार गमावला. मात्र त्यानंतर त्यांच्या पत्नी आमदार प्रतिभा धानोरकर यांनी डगमगून न जाता मोठ्या धैर्यानं निवडणूक लढवली. विजय वडेट्टीवार यांच्यासारखा पक्षांतर्गत विरोधक असतानाही प्रतिभा धानोरकर यांनी एकेकाळचे भाजपाचे प्रदेशाध्यक्ष आणि दिग्गज नेते सुधीर मुनगंटीवार यांना पराभूत केलं. त्यांच्या या विजयानं काँग्रेसला राज्यात मोठं बळ मिळालं आहे.

वर्षा गायकवाड यांनी राखला मुंबईचा गड :मुंबई काँग्रेसच्या अध्यक्ष वर्षा गायकवाड यांनी पक्षाची मुंबईत धुरा सांभाळताना भाजपाच्या उज्वल निकम यांचा पराभव केला. वर्षा गायकवाड यांची लोकसभा निवडणूक निकाल 2024 मध्ये सुरुवातीपासून पिछेहाट झाली होती. मात्र अखेरच्या काही फेऱ्यांमध्ये वर्षा गायकवाड यांनी तब्बल 56 हजार मतांची लीड तोडून उज्वल निकम यांना पराभवाला सामोरं जाण्यास भाग पाडलं. उज्वल निकम यांनी मुंबई बॉम्बस्फोटातील आरोपींना फासावर लटकावण्यात महत्वाची भूमिका निभावली. मात्र तरीही त्यांच्यासारख्या तगड्या उमेदवाराला नागरिकांनी नाकारलं.

धुळ्यात शोभा बच्छाव यांनी उडवला धुरळा :धुळे लोकसभा मतदार संघात महाविकास आघाडीच्या उमेदवार शोभा बच्छाव यांनी माजी केंद्रीय मंत्री सुभाष भामरे यांच्यावर विजय मिळवला. विशेष म्हणजे धुळ्यात भाजपाचे उमेदवार सुभाष भामरे, महाविकास आघाडीकडून शोभा बच्छाव आणि वंचित बहुजन आघाडीकडून अब्दुल रहमान यांच्यात तिरंगी लढत झाली. त्यामुळे धुळ्यातील विजय हा महाविकास आघाडीसाठी महत्वाचा आहे. शोभा बच्छाव यांनी तिहेरी लढतीत यश खेचून आणलं.

भाजपाच्या वाघिणींनी उधळला विजयाचा गुलाल :महाविकास आघाडीकडून लोकसभा निवडणूक निकालात भाजपाला मोठा धक्का बसला. या धक्यातून सावरण्यासाठी भाजपाच्या दोन महिला उमेदवारांनी चांगलाच हातभार लावला. रावेर मतदार संघातून रक्षा खडसे आणि जळगाव लोकसभा मतदार संघातून स्मिता वाघ यांनी अगोदरपासूनचं आघाडी घेतली होती. या दोन्ही महिला उमेदवारांनी विजयाचा गुलाल उधळत महाविकास आघाडीच्या उमेदवारांना रोखलं. रावेर मतदार संघातून रक्षा खडसे यांनी हॅटट्रीक करत श्रीराम पवार यांचा पराभव केला. रक्षा खडसे यांना तब्बल 6 लाख 27 हजार 672 मतं पडली. तर जळगाव लोकसभा मतदार संघातून स्मिता वाघ यांना 6 लाख 62 हजार 579 मतं पडली. स्मिता वाघ यांनी उबाठा गटाचे उमेदवार करण पवार यांचा 2 लाख 47 हजार मतानं पराभव केला.

सोलापूरच्या लेकीनं बांधलं विजयाचं तोरण :सोलापूर लोकसभा मतदार संघात प्रणिती शिंदे यांनी विजयी पताका फडकावली. सोलापूर लोकसभा मतदार संघात पंतप्रधान नरेंद्र मोदी यांनीही राम सातपुते यांच्यासाठी सभा घेतली होती. मात्र तरीही सोलापूर मतदार संघातून प्रणिती शिंदे यांनी विजय मिळवल्यानं हा महाविकास आघाडीसाठी मोठा विजय ठरला.

हेही वाचा :