मी नकली तर तुम्ही XXXX ; पंतप्रधानांवर बोलताना उद्धव ठाकरेंची जीभ घसरली - Lok Sabha Election 2024

Lok Sabha Election 2024 : तेलंगाणात बोलताना पंतप्रधान नरेंद्र मोदी यांनी उद्धव ठाकरे हे बाळासाहेब ठाकरेंचे नकली पूत्र आहेत, अशी टीका केली होती. त्यावर उबाठा प्रमुख उद्धव ठाकरे यांनी हल्लाबोल केला. मात्र यावेळी पंतप्रधानांवर बोलताना त्यांची जीभ घसरली.

अहमदनगर Lok Sabha Election 2024 :उबाठा गटाचे नेते उद्धव ठाकरे यांनी शिर्डी लोकसभा मतदार संघाचे उमेदवार भाऊसाहेब वाकचौरे यांच्या प्रचारार्थ श्रीरामपूर इथं जाहीर सभा घेतली. या सभेत उद्धव ठाकरे यांनी पंतप्रधान नरेंद्र मोदी यांच्यावर हल्लाबोल केला. मात्र पंतप्रधान नरेंद्र मोदी यांच्यावर बोलताना उद्धव ठाकरे यांची जीभ घसरली. "मी नकली, तर तुम्ही XXXX असं वादग्रस्त विधान त्यांनी केलं. माझ्या आई वडिलांचा अपमान करणार असाल तर तुम्हाला तुमची जागा दाखवून देईल," असा हल्लाबोलही उद्धव ठाकरे यांनी पंतप्रधान नरेंद्र मोदी यांच्यावर केला.

नकली पूत्रावरुन पंतप्रधान नरेंद्र मोदींवर हल्लाबोल :तेलंगणातील एका सभेत बोलताना पंतप्रधान नरेंद्र मोदी यांनी उद्धव ठाकरे बाळासाहेबांचे नकली पूत्र आहेत, असा उल्लेख केला. पंतप्रधानांच्या टीकेनं उद्धव ठाकरे चांगलेच बिथरले. त्यांनी पंतप्रधान मोदींच्या या वक्तव्याचा श्रीरामपूर इथं चांगलाच समाचार घेतला.

पंतप्रधान मोदींना सगळीकडं उद्धव ठाकरेच दिसतात :शिर्डी लोकसभा मतदारसंघाचे उबाठा गटाचे उमेदवार भाऊसाहेब वाकचौरे यांच्या प्रचारार्थ श्रीरामपूर इथं गुरुवारी उद्धव ठाकरे यांची जाहीर सभा पार पडली. या सभेत बोलताना, "पंतप्रधान मोदींना सगळीकडं केवळ उद्धव ठाकरेच दिसत आहेत. गेल्या दोन दिवसांपूर्वी तेलंगणातील एका सभेदरम्यान पंतप्रधान मोदी बोलताना म्हणाले की, उद्धव ठाकरे बाळासाहेबांचा नकली पूत्र आहे. पंतप्रधान मोदीजी मी नकली असेल तर तुम्ही XXXX आहेत. हा माझा अपमान नाही. हा माझ्या वडिलांचा म्हणजेच बाळासाहेबांचा आणि माझ्या आईचा अपमान आहे. त्यांच्यावर कदाचित आई वडिलांचे संस्कार झाले नसतील. पण माझ्यावर झाले आहेत. मी सुसंस्कृत घरातला आहे," असं प्रत्युत्तर उद्धव ठाकरे यांनी दिलं.

तुम्ही आईला रांगेत उभं करुन पाप केलं :"नोटबंदीच्या वेळी तुम्ही तुमच्या आईला रांगेत उभं करुन पाप केलं. 90 वर्षांच्या माऊलीचा वापर तुम्ही तुमच्या स्वार्थासाठी केला. तेवढा मी निर्दयी नाही. मातृदेवो भव आणि पितृदेवो भव हे मानणारं आमचं हिंदुत्व आहे. त्यामुळे तुम्ही जास्त बोलू नका. बाळासाहेब म्हणायच्या आधी हिंदुहृदयसम्राट म्हणायला शिका. नाही तर मी तुम्हाला शिकवणी लावतो. तुम्हाला हिंदुहृदयसम्राट म्हणायला जमत नसेल, तर ते महाराष्ट्राची जनता तुम्हाला शिकवेल," अशी टीकाही त्यांनी यावेळी केली.

बाळासाहेबांनी वाचवलं नसतं तर . . . :"पंतप्रधान नरेंद्र मोदी मला आणि माझ्या शिवसेनेला नकली म्हणत आहेत. 2014 आणि 2019 मध्ये आम्ही भाजपाबरोबर होतो. त्यावेळी त्यांनी आमच्या पाठीत वार केले. त्यामुळे आम्ही त्यांची साथ सोडली, तर ते आम्हाला नकली म्हणत आहेत. बाळासाहेबांच्या पुत्राला नकली म्हणत आहेत. जर 2001 मध्ये बाळासाहेबांनी मोदींना वाचवलं नसतं तर अटलबिहारी वाजपेयींनी त्यांना केराच्या टोपलीत टाकलं असतं," अशी टीकाही उद्धव ठाकरेंनी पंतप्रधान नरेंद्र मोदी यांच्यावर यावेळी केली.

हेही वाचा :