मुंबईत मंत्र्यांच्या बंगल्याचा वीजपुरवठा खंडित - Shambhuraj Desai press conference

Electricity Supply Cut : ऐन उन्हाळ्याचा कडाका सुरू असताना आज मुंबईतील मंत्रालयासमोरील अनेक मंत्र्यांच्या बंगल्यात घामाच्या धारा सुरू होत्या. ऐन दुपारी या मंत्रांच्या बंगल्यातील लाईट गेल्यानं मंत्र्यांसह सर्व कर्मचाऱ्यांना उकाडा सहन करावा लागला. यावेळी मंत्री शंभूराजे देसाई यांची पत्रकार परिषदेही अंधारातच पार पाडण्यात आली.

मुंबई Electricity Supply Cut:ग्रामीण आणि शहरी भागांमध्ये वीज पुरवठा खंडीत होण्याचे प्रकार घडत असताना शुक्रवारी दुपारी राज्याचा कारभार चालवणाऱ्या मंत्र्यांच्या मुंबईतील बंगल्यातील वीज पुरवठा खंडीत झाला. लोकसभा निवडणुकीची आचारसंहिता असल्यामुळं मंत्री शंभूराज देसाई वगळता अन्य मंत्री बंगल्यात मुक्कामाला नाहीत. पण याचा फटका बंगल्यातील कर्मचाऱ्यांना बसला. चोवीस तास गारेगार वातावरणात वावरणारे कर्मचारी घामाघूम झाले होते. मंत्री शंभूराज देसाई यांच्या दालनात पत्रकार परिषद सुरू असतानाच वीज गेल्यानं अंधारातच पत्रकार परिषद पुरकावी लागली.

डीपीमध्ये तांत्रिक अडचण :राज्याच्या कारभार पाहणाऱ्या मंत्र्यांची मलबार हील, वाळकेश्वर आणि मंत्रालयासमोर शासकीय निवासस्थानं आहेत. त्यापैकी मंत्रालयासमोरील शासकीय निवासस्थानांसमोरील डीपीमध्ये तांत्रिक अडचण निर्माण झाल्यामुळं या भागातील विज पुरवठा खंडीत झाला. या डीपीतून अतुल सावे, राष्ट्रवादी काँग्रेस पक्ष कार्यालय, डॉ. तानाजी सावंत, अदिती तटकरे, दादा भुसे, रविंद्र चव्हाण, शंभूराज देसाई, बाळासाहेब भवन, विरोधी पक्षनेते अंबादास दानवे आणि विजय वडेट्टीवर यांच्या निवासस्थानांना विजपुरवठा होतो. शुक्रवारी दुपारी दोन वाजेच्या सुमारास या मंत्र्यांच्या बंगल्यांचा वीज पुरवठा खंडीत झाला. दोन तासापेक्षा जास्त वेळ वीज पुरवठा खंडीत होता.

हे वाचलंत का :