संतोष देशमुख हत्याकांड : वाल्मिक कराडला घेऊन सीआयडी पथक न्यायालयात दाखल, सरकारी वकिलांचा खटला लढण्यास नकार

वाल्मिक कराड आज पुणे येथील सीआयडी कार्यालयात शरण आला आहे. वाचा, सरपंच संतोष देशमुख खून प्रकरणाचे अपडेट

बीड- केज तालुक्यातील मस्साजोग येथील आवादा पवनचक्कीच्या आवादा कंपनीला मागितलेल्या खंडणीप्रकरणातील आरोपी वाल्मिक कराड आज सीआयडीला शरण आला आहे. वाल्मिक कराडनं व्हिडिओ जारी करत सीआयडी कार्यालयात शरण येत असल्याच जाहीर केलं होतं. "राजकीय हेतूनं आपल्यावर आरोप होत आहे. संतोष देशमुख यांच्या हत्येशी संबंध नाही," असा दावा कराडनं व्हिडिओमध्ये केला आहे. दरम्यान वाल्मिक कराडला घेऊन सीआयडीचं पथक केजकडं रवाना झालं आहे.

Live updates

वाल्मिक कराडविरोधात केस लढण्यास सरकारी वकिलाचा नकार :

• बीड इथल्या खंडणी प्रकरणात वाल्मिक कराड याला सीआयडी अधिकाऱ्यांनी केज न्यायालयात दाखल केलं. मात्र वाल्मिक कराडविरोधात खटला लढण्यासाठी सरकारी वकिलांनी नकार दिला. वैयक्तिक कारणामुळे आपण खटला लढणार नसल्याचं सरकारी वकिलांनी न्यायालयात पत्र सादर केलं. त्यामुळे या खटल्यात नवीन सरकारी वकील म्हणू बी बी शिंदे यांची नियुक्ती करण्यात आली.

• पुणे : केज तालुक्यातील मस्साजोग येथील पवनचक्कीच्या आवादा कंपनीला मागितलेल्या खंडणीप्रकरणातील आरोपी वाल्मिक कराड आज सीआयडीला शरण आला आहे. तब्बल दोन ते तीन तासांच्या चौकशीनंतर कराड याला घेऊन केज न्यायालय इथं घेऊन जाण्यात आलं असून रात्री उशिरा कराड याला न्यायालयात हजर करण्यात येणार आहे. याबाबत सीआयडी पोलीस उपमहानिरीक्षक सारंग आव्हाड म्हणाले, की "केज पोलीस स्टेशन येथील खंडणीच्या गुन्ह्यातील फरार आरोपी वाल्मिक कराड हा सकाळी साडे बारा वाजल्याच्या सुमारास स्वतः हुन सीआयडी मुख्यालय येथे शरण आला आहे. त्याला सीआयडी पुणे यांनी ताब्यात घेतला आहे. त्याची चौकशी करून आमच्या टीमसह बीड येथे रवाना करण्यात आलं आहे. याबाबत सीआयडीचे डीवायएसपी तपास करत असून त्यांच्या ताब्यात या फरार आरोपीला देण्यात आलं आहे," असं यावेळी आव्हाड म्हणाले.
• संतोष देशमुख यांच्या हत्या प्रकरणावर कारवाईची मागणी लावून धरणारे आमदार सुरेश धस यांनी मुख्यमंत्री देवेंद्र फडणवीस यांची भेट घेतली. भेटीनंतर त्यांनी माध्यमांशी संवाद साधला. ते म्हणाले," मुख्यमंत्री फडणवीस यांच्या कारवाईमुळे कराडला शरण यावे लागले. मी मुख्यमंत्र्यांचे आभार मानतो. मारहाणीचा व्हिडिओ कॉल पाहणारे यांच्यावरदेखील खुनाचा गुन्हा दाखल करा. त्यांची संपत्ती जप्त करा. कंपनी अधिकाऱ्याचं अपहरण करून खंडणी मागितली जायची. खंडणी मागण्यासाठी कोण माणसं पाठवायचे? सुदर्शन घुलेचादेखील हत्येत सहभागी आहे. सरकारचे नाव खराब होत आहे. पण, मी पावणेतीन तालुक्यांचा आमदार आहे. मी छोटा माणूस आहे. बीड प्रकरणात विशेष सरकारी वकील उज्जवल निकम यांची नियुक्ती करावी. धनंजय मुंडेंचा राजीनामा घ्यावा की नाही हे अजित पवार यांनी ठरवावे. हा अधिकार त्यांचा आहे. आरोपींची सर्व संपत्ती जप्त करावी, अन्यथा आम्हाला दुसरा मार्ग स्वीकारावा लागेल".
• पुढे आमदार धस म्हणाले, " संपत्ती जप्तीची भीती आणि त्यांच्या घरातील लोकांची चौकशी या कारणानं ते शरण आले आहेत. स्वखुशीनं शरण आले नाहीत. संतोष देशमुख हा अमानवीपणे खून झाला आहे. पालकमंत्री हा झंटाफंटा कार्यक्रम आहे. त्यांचे सोडून द्या. विशेष बाब म्हणून देवेंद्र फडणवीस यांनी बीडचे पालकत्व स्वीकारावे. यापूर्वी त्यांनी नक्षलवादी जिल्ह्याचं पालकत्व स्वीकारावे. वाळूचोर, राखचोर, मुरुमचोर यांना सरळ करण्यासाठी त्यांनी जबाबदारी स्वीकारावी. तपास झाल्यानंतर आकावर (वाल्मिक कराड) ३०२ चा गुन्हा दाखल होईल.
• वाल्मिक कराडची सीआयडी चौकशी करण्यात येणार आहे. चौकशीनंतर त्याला केज न्यायालयात हजर करण्यात येण्याची शक्यता आहेत.
• कराडच्या अटकेनंतर सामाजिक कार्यकर्त्या अंजली दमानिया यांनी माध्यम प्रतिनिधींना प्रतिक्रिया दिली आहे. सर्व तपास यंत्रणा मॅनेज असून वाल्मिक कराडचे सर्व राजकीय नेत्यांशी संबंध असल्याची टीका दमानिया यांनी केली.
• वाल्मिक कराड शरण येणार असल्याच्या शक्यतेनं पुण्यातील सीआयडी कार्यालयाबाहेर पोलीस बंदोबस्त वाढविण्यात आला.
• संतोष देशमुख यांचे भाऊ धनंजय देशमुख यांनी मनोज जरांगे यांची भेट घेतली. "संतोष देशमुख यांच्या हत्येनं समाज खवळला आहे. आरोपींसह आरोपींना मदत करणाऱ्यांना अटक करा," अशी मागणी मराठा आरक्षणाचे आंदोलक मनोज जरांगे यांनी केली. "सरकारला सोपे जाणार नाही. आम्ही महाराष्ट्रभर आंदोलन करणार आहोत. आमदार, मंत्री, खासदार आणि कोणी असले तरी सोडू नका," अशी मागणी जरांगे यांनी केली.
• सरपंच देशमुख यांच्या निषेधार्थ यवतमाळ, वाशिम आणि गोंदिया जिल्ह्यातील हजारो ग्रामपंचायती ३ दिवस कामबंद आंदोलन करणार आहेत.

मी सीआयडी ऑफीस येथे शरण होतोय. पोलीस तपासात दोषी आढळलो तर शिक्षा भोगायला तयार आहे. संतोष देशमुख यांचे जे आरोपी असतील त्यांना अटक करण्यात यावी-वाल्मिक कराड

खंडणी प्रकरणात आरोपी असलेल्या वाल्मिक कराडच्या अटकेसाठी विरोधकांनी फडणवीस सरकारला धारेवर धरलं आहे. तसेच नागरिकांमधून प्रचंड असंतोष व्यक्त करण्यात येत आहे. वाल्मिक कराडला पुण्यावरून बीडला आणण्यात येईल. त्यानंतर मग पुढील कारवाई होईल, अशी खात्रीलायक माहिती सूत्रांकडून मिळाली आहे. बीड जिल्ह्यातील संतोष देशमुख हत्या प्रकरण आणि त्याच तालुक्यातील खंडणी प्रकरणावरून सध्या राज्यात गदारोळ सुरू आहे.

शरण आल्यानंतर पोलिसांकडून शौर्याचा रंग लावला जाईल-जितेंद्र आव्हाड यांनी एक्स मीडियावर पोस्ट करत वाल्मिक कराडच्या शरण येण्यावर अंदाज व्यक्त केला होता. त्यांच्या पोस्टमधील माहितीनुसार वाल्मिक कराड हा पोलिसांकडे स्वाधीन होईल, तो स्वतः पोलिसांना स्वाधीन झाल्यानंतर पोलिसांकडून पत्रकार परिषद घेण्यात येईल. त्याला पुण्याजवळील एका घाटात गाडीतून गोवा किंवा असे कुठे तरी दूरच्या ठिकाणी पोलिसांनी पाठलाग करून आणल्याच्या कहाण्या सांगितल्या जातील. त्याच्या कॉलरला धरून त्याला खेचत गाडीत बसविल्याचंदेखील सांगितलं जाईल. पण, महाराष्ट्रानं अशा कुठल्याही कहाण्यांवर विश्वास ठेवू नये. कारण, पकडायचे असते तर यापूर्वीच पकडले असते. तो शानमध्ये, कडक कपडे घालून पुण्यातील किंवा महाराष्ट्रातील कुठल्या तरी पोलीस ठाण्यात येईल. स्वतःहून स्वाधीन होईल. पण, त्याला रंग शौर्याचा देऊन त्याला फरफटत आणल्याच्या बातम्या लावायला सुरूवात केली जाईल. मला या सरकारला एवढेच सांगायचे आहे, 'जो बूंद से गयी हो हौद से नही आती'. अजूनही त्याला 302 चा आरोपी का करत नाहीत? त्याला मोक्का कधी लावणार? याचे उत्तर मिळालेले नाही. न्यायालयीन चौकशीसाठी कोण न्यायाधीश चौकशी करणार? याचे उत्तर मिळालेले नाही".

हेही वाचा-