पुणे (मावळ) : सध्या जगभरात 'व्हॅलेंटाईन विक' सुरू असून दररोज विविध डे साजरा केले जात आहेत. तसेच येत्या १४ तारखेला जगभरात 'व्हॅलेंटाइन डे' (Valentines Day 2025) साजरा केला जाणार आहे. या दिवशी प्रेमभावना व्यक्त करण्यासाठी गुलाबाचं फूल एकमेकांना दिलं जातं. अशा या व्हॅलेंटाइन डे निमित्त पुणे जिल्ह्यातील मावळ येथील गुलाब उत्पादक शेतकऱ्यांची मोठी लगबग सुरू झालीय. यंदाच्या वर्षी व्हॅलेंटाइन डेला मावळमधून जवळपास 25 ते 30 लाख गुलाबांची निर्यात होणार असल्याची माहिती फुल उत्पादक शेतकरी मुकुंद ठाकर यांनी दिली.
फुल उत्पादक शेतकऱ्यांची लगबग सुरू :मावळमध्ये गेल्या काही वर्षापासून मोठ्या प्रमाणावर फुलांची शेती केली जाते. व्हॅलेंटाइन डे अर्थात 14 फेब्रुवारीला प्रेमाचं प्रतीक म्हणून गुलाबाचं फुल दिलं जातं. या गुलाबाच्या फुलांना देश-विदेशातून मोठी मागणी आहे. या निमित्तानं मावळमध्ये एक महिन्यापासूनच फुल उत्पादक शेतकऱ्यांची लगबग सुरू झाली आहे. या गुलाबांच्या निर्यातीला 26 जानेवारीला सुरुवात झाली असून रोज विविध देशात मावळमधील गुलाबाची फुले पाठवली जात असल्याची माहिती शेतकऱ्यांनी दिली.
निसर्गाचा फटका गुलाब उत्पादक शेतकऱ्यांना बसला : याबाबत फुल उत्पादक शेतकरी मुकुंद ठाकर म्हणाले की, "दरवर्षी 'व्हॅलेंटाईन डे' च्या निमित्तानं सर्व शेतकऱ्यांकडून मोठी तयारी केली जाते. सर्व शेतकरी वर्षभर मेहनत करून आपला माल कसा जास्त येईल यासाठी प्रयत्न करतो. आम्ही गेल्या १५ वर्षापासून या क्षेत्रात काम करत आहोत. सुरूवातीला जेव्हा कमी शेतकरी होते तेव्हा अनेक अडचणी येत होत्या. आता मात्र या क्षेत्राकडं अनेक शेतकरी वळल्यानं अडचणी कमी झाल्या आहेत. यावर्षी सहा ते सात देशात गुलाबाची फुले पाठवली जात आहेत. तसेच दरवर्षी पेक्षा यावर्षी जास्त ऑर्डर घेण्यात आली आहे. पण निसर्गामुळं आमचं प्लॅनिंग कोलमडलं आहे. पाऊस जास्त झाल्यानं सर्वांनी अंदाज असा बांधला होता की, थंडी जास्त पडेल पण थंडी कमी पडल्यानं जे फुल ५० ते ५२ दिवसात येईल अशी अपेक्षा होती, ते फुलं ४२ ते ४५ व्या दिवशीच निघालं. म्हणजेच 'व्हॅलेंटाईन डे' च्या दहा दिवस आधीच फुले निघाली, त्यामुळं माल कमी पडला. पण स्थानिक बाजारपेठेत फुलांची आवक जास्त राहिल्यानं मागणी कमी झाली आहे."